Помніце «Легенду 77» Кітарава? Яму 37, а ён усё яшчэ ў справе – і нават забівае шайбы галавой!
І ўсё гэтак жа выдаляецца на роўным месцы.
Чатыры тытулы чэмпіёна Беларусі з «Юнацтвам», пераможная шайба ў вароты амерыканцаў на чэмпіянаце свету-2015, топ-3 па колькасці матчаў за мінскае «Дынама» ў КХЛ – гэта ўсё пра Аляксандра Кітарава. У свой час форвард сваімі стараннем і самааддачай так улюбіў ў сябе заўзятараў «зуброў», што тыя далі яму мянушку «Легенда 77», хоць і асаблівай выніковасцю нараджэнец Наваполацку не вызначаўся – у асноўным гуляў у трэцім звяне і толькі тройчы набіраў больш за 10 пунктаў за сезон.
Пасля сезона-2019/20, у якім Кітараў набраў усяго шэсць (3+3) пунктаў за 59 матчаў, Крэйг Вудкрафт вырашыў ад яго паслуг адмовіцца. Новы сезон дасведчаны форвард пачаў у «Куньлуне», але там за шэсць матчаў не набраў ніводнага балу і ў лістападзе 2020-га вярнуўся на Радзіму ў «Юнацтва», дзе выступае дагэтуль.
У «Юнацтве» ў Кітарава пайшло не адразу. Пасля пераходу ён доўга не мог вызначыцца – першую шайбу закінуў толькі ў 27-м матчы, якая ў той рэгулярцы так і засталася для яго адзінай. Затое ў плэй-оф Кітараў набраў ажно шэсць балаў у 12 гульнях і дапамог «Юнацтву» аформіць яе апошняе на сёння чэмпіёнства. Пасля другога матчу фінальнага супрацьстаяння з «Гомелем» (5:1) тагачасны галоўны трэнер «Юнацтва» Яўген Есаулаў называў Кітарава, які вызначыўся дублем, кубкавым ваяром, але дадаваў, што і дурныя выдаленні, за якія крытыкавалі ў «Дынама», на месцы.
Сам Кітараў пасля заваёвы тытула расказваў, што з усмешкай ставіцца да мянушкі «Легенда №77». «Калі людзі прыдумалі, і ім падабаецца так называць мяне – калі ласка. Абы ім гэта прыносіла задавальненне», – казаў хакеіст.
А яшчэ цягам таго сезона Кітараў як мінімум двойчы станавіўся донарам імуннай плазмы анты-COVID-19. Увогуле, разам з жонкай Дар'яй яны рэгулярна здаюць кроў. Хакеіст расказваў, што гэта важна для яго, таму што падчас складанай аперацыі пацыенту пераліваецца да васьмі літраў крыві, то бок у гэты момант як мінімум 16 донараў дапамагаюць жыццю аднаго чалавека.
Але вяртаемся да хакея. Пакуль што чэмпіёнскі поспех першага сезона пасля вяртання ў «Юнацтва» Кітараву паўтарыць не ўдалося. Затое форвард паправіў сваю выніковасць і ў апошніх трох рэгулярках набіраў 20 (10+10), 17 (10+7) і – увага! – 25 (11+14) пунктаў у 50 матчах мінулага сезона. Больш у ЧБ форвард выбіваў толькі двойчы: у далёкіх рэгулярках 2008/09 (16+14 у 41 матчы) і 2010/11 (16+21 у 43 гульнях). І так, Кітараў працягвае зарабляць непатрэбныя выдаленні: у кастрычніку 2022-га на гэта скардзіўся Есаулаў, нават нягледзячы на тое, што падапечны ў гульні з «Лідай» (7:3) выбіў хет-трык. А вось такое выдаленне на роўным месцы, якое пацягнула на матч-штраф, форвард зарабіў у гульні з «Гомелем» (1:2) у мінулым сезоне:
У апошніх двух сезонах Кітараў з'яўляецца капітанам «Юнацтва». А на пачатку бягучага мінчукам удалося выйграць Кубак Беларусі. Кітараў паўдзельнічаў ва ўсіх сустрэчах, а ў гульнях групавога этапа набраў чатыры (3+1) пункты. Пасля фінальнай гульні з «Шахцёрам» (4:3) 37-гадовы капітан узняў чарговы трафей над галавой:
Пакуль што ў гэтым сезоне ў «Юнацтва» ўсё ў парадку. Каманда ўпэўнена лідаруе ў рэгулярцы Экстралігі, а на рахунку Кітарава 16 (6+10) пунктаў у 39 матчах. Цяпер ён 11-ы бамбардзір каманды, але лічбы для форварда не галоўнае – трэнеры заўсёды яго шанавалі за ўменне гуляць у звёнах стрымлівання. Акрамя таго Кітараў прыносіць карысць і ў селекцыйнай працы: напрыклад, у тым ліку з яго парады кантракт з мінчукамі падпісаў расійскі форвард Павел Кулікоў, з якім яны разам гулялі за «Нафтахімік».
А днямі Кітараў яшчэ і вызначыўся футбольным голам – замкнуў галавой перадачу партнёра. Праўда, суддзі гол не залічылі, а «Юнацтва» ў выніку прайграла «Гомелю» (0:2):
Чаму не залічылі? Таму што гулец акцэнтавана біў галавой, а ў хакеі забіваць можна толькі клюшкай. Яшчэ дазваляюцца рыкашэты ад канькоў і цела, у тым ліку ад галавы, але Кітараў дзейнічаў як выдатны форвард-футбаліст.
Затое ў гэтым сезоне яму можа скарыцца ўнікальная лічба – 600 матчаў у чэмпіянатах Беларусі. Да яе «Легендзе 77» засталося правесці ўсяго 14 гульняў.
Іншыя пасты карыстальніка
