У Гомелі заўзятар з клюшкай абліў дзёрзкага сына трэнера гасцей – у адказ пабачыў сярэдні палец і пахвіну
Малады хлопец збірае штрафныя хвіліны і не баіцца скінуць крагі.
18 лютага ў Экстралізе «Гомель» на сваім лёдзе абгуляў «Магілёў» 4:1. У канцы матчу здарыўся скандальны эпізод.
На 57-й хвіліне ўжо пры ліку 4:1 малы штраф за грубую гульню атрымаў 18-гадовы форвард магілёўцаў, сын іх галоўнага трэнера Аляксандра Мацярухіна – Мацвей. Пакуль той каціўся ў бокс для штрафнікоў, заўзятары «Гомеля» сталі яго абражаць. У прыватнасці, крычалі «валасаты сабака», а адзін з фанатаў стаў стукаць клюшкай па шкле за лаўкай штрафнікоў (незразумела, як заўзятар пранёс на трыбуны клюшку). Мацярухін-малодшы, уваходзячы ў бокс, паказаў таму язык і жэст «каза»:
На лаўцы штрафнікоў у гэты момант ужо сядзей форвард Руслан Наўрузаў, які раней атрымаў пяціхвілінны штраф за атаку суперніка ў галаву. Як сказаў каментатар матчу Антон Козік, расіянін, аказаўшыся за бортам, абліваў заўзятараў вадой, праўда, на відэа гэтыя дзеянні не зафіксаваныя. Затое з некалькіх ракурсаў знялі эпізод, які здарыўся праз некалькі секунд – заўзятар «Гомеля», які тыкаў клюшкай у штрафны бокс, сам пачаў паліваць гульцоў «Магілёва» з пластыкавай бутэлькі. Хакеісты адразу сталі апеляваць да арбітраў, а затым Мацярухін паказаў заўзятарам сярэдні палец, за што атрымаў матч-штраф.
Пакідаючы пляцоўку, Мацярухін працягваў жэстыкуляцыю на адрас заўзятараў. Ужо за межамі лёду гулец стаў хапаць сябе за вобласць пахвіны, а затым адбіў пяць аднаму з заўзятараў «Магілёва»:
Мацярухін-старэйшы пасля гульні дзеянні сына не каментаваў. Яго візаві Уладзімір Копаць падзякаваў заўзятарам «Гомеля» за падтрымку і дадаў, што канцоўка сустрэчы атрымалася гарачай праз правакацый хакеістаў «Магілёва», якія, на яго меркаванне, сталі так сябе паводзіць праз лік на табло.
Як гуляе Мацярухін-малодшы?
Выхаванец магілёўскага хакея ў адрозненне ад бацькі, які нарадзіўся ў Кіеве, мае толькі беларускі пашпарт. Мацярухін-малодшы гуляў за зборную Беларусі U-17 (шэсць матчаў), а на дарослым узроўні дэбютаваў у мінулым сезоне – правёў 16 матчаў без выніковых дзеянняў. Затое стаў першым хакеістам 2006 года нараджэння, які згуляў у Экстралізе. Пункты прыйшлі да Мацярухіна ў гэтым розыгрышы – першую шайбу закінуў у другой вераснёўскай гульні з «Хімікам» (4:5):
А за два дні да гэтага, у першым матчы з навапалачанамі пабіўся з капітанам «Хіміка» Паўлам Чарновым, на рахунку якога 12 сезонаў у КХЛ. У той сутычцы Мацярухін як мінімум не прайграў:
Усяго ў гэтым сезоне Мацярухін-малодшы правёў 41 матч, набраў 11 (8+3) пунктаў пры каэфіцыенце карыснасці «-6». Па выніках снежня, , у якім закінуў чатыры шайбы за дзевяць гульняў, атрымаў званне найлепшага маладога хакеіста месяца ў лізе. Пры гэтым хлопец мае праблемы з дысцыплінай – проста цяпер ён другі гулец у «Магілёве» па агульным штрафным часе (46). Больш у камандзе парушае толькі 27-гадовы абаронца Андрэй Клепча (59 хвілін за 45 сустрэч).
У верасні Мацвей ставіў мэту за сезон набраць 15-20 пунктаў. На яго думку, такі паказнік дассць шанцы на прапановы з Расіі ці Амерыкі. «Вядома, хацелася б больш за акіян паляцець», – прызнаваўся Мацярухін-малодшы.
Як працуе з бацькам?
Аляксандр Мацярухін вядомы тым, што любіць публічна пакрытыкаваць сваіх гульцоў, праўда, звычайна трэнер не персаналізуе:
Мацвей жа прызнаваўся, што на трэнінгах яму прылятае ад бацькі «ў два-тры разы часцей, чым астатнім». Але гулец не крыўдуе. А ўвогуле бацьку ён лічыць прыкладам: казаў, што хоча пабудаваць такую ж кар'еру і нават узяў 28-ы нумар, пад якім Мацярухін-старэйшы гуляў у мінскім «Дынама» і зборнай Беларусі.
Бацька ж і сам прызнаваў, што крытыкуе сына куды часцей, чым іншых. «Калі б іншыя хакеісты атрымлівалі столькі ж, то яны б ужо скончылі», – казаў трэнер у лютаўскім інтэрвʼю. Пры гэтым ён адзначаў, што не супраць адпусціць сына ў іншую каманду Экстралігі, каб той атрымаў досвед самастойнага жыцця – у Магілёве Мацвей жыве з бацькамі.
Цікава, што і старэйшы, і малодшы Мацярухін мараць разам згуляць за адну каманду. У верасні 2023-га трэнер дапускаў, што праз некалькі гадоў дзеля гэтага можа «выскачыць на лёд». Тады ж пра гэта казаў і сын – маўляў, выйсці на лёд разам з бацькам, набраць пункты, забіць гол – галоўная мара яго дзяцінства. Мацярухін-старэйшы казаў, што такое магло здарыцца на старце цяперашняга сезону, але ў ФХБ сказалі «не, не трэба».
***
У гэтым сезоне «Магілёву» засталося правесці два матчы з «Віцебскам». Турнірных задач каманда Мацярухіных ужо не вырашае – яна гарантавана фінішуе на 13-м месцы па-за межамі плэй-ін.
Іншыя пасты карыстальніка
