Неверагодны Протас у лічбах: стаў найлепшым сярод беларусаў у НХЛ па пунктах за сезон, а вось чым уражвае на ўзроўні лігі

Адбылося тое, ува што перад стартам сезона-2024/25 было складана паверыць. Рэкорд па пунктах сярод беларусаў за адзін рэгулярны чэмпіянат цяпер належыць Аляксею Протасу. Гістарычнай стала першая галявая перадача форварда ў ноч з аўторка на сераду па беларускім часе, калі яго «Вашынгтон» гуляў з «Дэтройтам» і перамог 4:1. Прычым менавіта нараджэнец Віцебску зрабіў асіст на пераможны кідок:

ВІДЭА

А ўжо праз шэсць хвілін Протас аформіў асістэнцкі дубль:

ВІДЭА

Проста цяпер на рахунку форварда 61 (29+32) пункт у 68 матчах гэтага сезона. Да канца рэгуляркі яшчэ 14 матчаў і, хутчэй за ўсё, Протас палепшыць сваё і без таго ўражальнае дасягненне. Мы ж пакуль раскажам цікавыя факты, якія здарыліся на шляху да рэкорду.

• Самым выніковым сезонам дагэтуль для Протаса быў папярэдні. Год таму ён завяршыў рэгулярку з 29 (6+23) пунктамі ў 78 матчах. Да таго былі сціплыя 9 (3+6) балаў у 33 гульнях дэбютнага сезона-2021/22 і 15 (4+11) у 58 сустрэчах розыгрышу-2022/23. Асабістыя рэкорд выніковасці ў НХЛ за сезон Протас перасягнуў яшчэ 29 снежня, калі аддаў асіст у пераможнай гульні з «Таронта» (5:2).
• Каб устанавіць беларускі рэкорд па выніковасці за сезон, Протасу спатрэбілася 68 матчаў. Перасягнуў ён Ягора Шаранговіча, які толькі ў мінулым сезоне пераўзышоў паказнікі Міхаіла Грабоўскага з чэмпіянату-2009/10. Калі Грабоўскі ў найлепшы год выбіў 58 (29+29) пунктаў за 81 гульню, то Шаранговіч выдаў 59 (31+28) за 82, гуляючы за «Калгары». Сярэдні паказнік выніковасці ў Шаранговіча і Грабоўскага, калі яны імкнуліся да рэкорду, склаў 0,72 пункты за матч, а Протас на сёння трымае планку 0,9!
• У Пратаса наперадзе 14 матчаў, каб стаць найлепшым снайперам і найлепшым асістэнтам сярод беларусаў за сезон у НХЛ. Больш за ўсё за адзін рэгулярны чэмпіянат вызначыўся Шаранговіч у мінулым сезоне – 31 раз. Столькі ж шайб, але з улікам плэй-оф, аднойчы было ў Андрэя Касціцына. Протасу для паўтарэння засталося нанесці два трапных кідкі.
• Рэкорд па асістах пакуль трымае Уладзімір Цыплакоў. У сезоне-1997/98 ён запісаў на рахунак 34 галявыя перадачы ў рэгулярцы (у Протаса на сёння 32), а пасля дадаў яшчэ адну ў плэй-оф.
• Проста цяпер Протас другі бамбардзір «Вашынгтона», а «Кэпіталз» лідаруюць у агульнай табліцы рэгуляркі НХЛ! Найлепшым па пунктах у камандзе з'яўляецца канадзец Дылан Строўм – 67 (22+45) пунктаў. У лізе беларус займае 38-е месца ў спісу бамбардзіраў.
• Па асістах Протас чацвёрты ў «Вашынгтоне» (тут лідар той жа Строўм), а па галах – трэці ўслед за Аляксандрам Авечкіным (34 галы) і канадца Тома Уілсана (30).

• Протас з адрывам найлепшы гулец усяго НХЛ па паказніку карыснасці – «+42». Другім у гэтым рэйтынгу ідзе амерыканец Раян Макдона – «+34». Праўда, пра рэкорд у лізе за сезон тут марыць не выпадае – найлепшыя лічбы належаць хакеістам, якія выступалі ў сярэдзіне мінулага стагоддзя. Рэкорд у канадца Бобі Ора, які скончыў рэгулярку 1970/71 з «+124».
• Протас ужо паўтарыў дасягненне Андрэя Касціцына па пунктах за сезон з улікам плей-оф. У чэмпіянаце-2007/08 навапалачанін набраў 61 (31+30) пункт за 90 матчаў з «Манрэалем» з улікам 12 гульняў на выбыванне, у якіх былі набраныя 8 (5+3) балаў.
• На рахунку Протаса шэсць пераможных шайб у гэтым сезоне. Гэта найлепшы паказнік у «Вашынгтоне», які таксама маюць Авечкін і канадзец Джэйкаб Чукрана. Адну з гэтых шайб беларус закінуў у авертайме – у снежаньскай гульні з «Калабусам» (2:1). Першая шайба «Вашынгтона» ў той сустрэчы таксама была на рахунку Протаса.
• Любімая каманда Протаса ў гэтым сезоне – «Дэтройт». У трох матчах супраць яго беларус набраў 5 (2+3) пунктаў, а «Вашынгтон» здабыў дзве перамогі. Па чатыры пункты Протас набраў супраць «Каламбуса» (3+1, дзве перамогі ў дзвюх сустрэчах), «Таронта» (2+2, дзве перамогі ў трох сустрэчах), «Рэйнджэрс» (2+2, тры перамогі ў трох сустрэчах), «Манрэаля» (1+3, адна перамога ў трох сустрэчах).
• Самая доўгая серыя Протаса з набранымі пунктамі доўжылася шэсць матчаў і выпала на перыяд з 19 па 31 студзеня 2025 года. Усяго ж беларус набіраў пункты ў 40 матчах сезона з 68. «Вашынгтону» ўдалося перамагчы ў 37 з іх! З трох параз адна была ў асноўны час, адна ў авертайме і адна па булітах.
• Проста цяпер Протас уваходзіць у топ-3 па працэнты рэалізацыі кідкоў сярод гульцоў лігі, якія правялі больш за 13 матчаў у сезоне. Паказнік знаходзіцца на неверагоднай адзнацы 22,7% пры 128 кідках у плошчу брамы. Лепшыя лічбы толькі ў форварда «Вініпега» Марка Шайфлі (23,3%, 144 кідкі, 69 гульняў) і форварда «Сіэтла» Шэйна Райта (23,3%, 73 кідкі, 66 матчаў).
• І напрыканцы. Протас займае шостае месца ў спісе самых каштоўных гульцоў НХЛ у сезоне-2024/25 па версіі Benchrates. Рэйтынг складзены на аснове статыстычных звестак і з улікам заробкаў хакеістаў, якія ўнеслі найбольшы ўнёсак у поспехі сваіх каманд. Кэпхіт Пратаса (3,375 мільёна долараў) амаль у тры разы меншы за тое, што ён мог бы атрымліваць, калі адштурхоўвацца толькі ад паказнікаў бягучага сезоне (9,716 мільёна долараў).