Багдановіч усеўся на «Чырвоны сцяг», а Баскаў – на «Бэнтлі». Але на закрыцці хакейнага сезону былі і больш дзіўныя аўто
Забаўляла гасцей закаханая ў Пуціна.
30 красавіка ў Мінску прайшла цырымонія закрыцця хакейнага сезона. Мерапрыемства традыцыйна адбылася ў рэстаране «Лябяжы», дзеля якога на загад Лукашэнкі быў адрэзаны кавалак тэрыторыі запаведніка.
Вядоўцам цырымоніі быў Дзмітрый Аўрамчык, які выконвае гэтую ж ролю на матчах хакейнага мінскага «Дынама» і аматарскіх гульнях каманды дыктатара . А хэдлайнерам вечарыны стала расійская спявачка Люся Чабоціна. У снежні падчас адной з расійскіх музычных прэмій яна прызнавалася ў любві да Уладзіміра Пуціна. На спецыяльных сайтах, дзе прапануюць замовіць зорак, пазначана, што цэнік на Чабоціну стартуе ад 36,5 тысяч долараў.
Традыцыйна для гэтага мерапрыемства многія госці прыязджалі на пафасных аўтамабілях. Прычым на шмат на якіх машынах дзяржнумар быў закрыты надпісам «Закрыццё сезона 2024-2025». Адзначым, што згодна з рэжымным адміністрацыйным кодэксам кіраванне транспартным сродкам «з загадзя схаваным, падробленым ці іншым чынам змененым нумарам або без прысвоенага рэгістрацыйнага або нумарнога знака мяркуе адказнасць у выглядзе штрафу ў памеры ад 10 да 20 базавых велічынь (420-840 BYN)».
Чэмпіёны цяперашняга сезона Экстралігі з «Юнацтва» з'явіліся на лімузіне:
Галоўнай зоркай «Юнацтва» ў гэтым сезоне быў Валянцін Дземчанка.
На цырымоніі ён забраў адразу чатыры ўзнагароды: найлепшы бамбардзір, найлепшы нападнік, самы карысны гулец рэгулярнага чэмпіянату і найлепшы хакеіст Экстралігі. А прыехаў ён на імпрэзу на рэтракары, які вельмі падобны да маркі EMW, якая выпускалася ва Усходняй Нямеччыне ў 1950-я гады. Дзяржнумар, дарэчы, не былі схаваныя:
На ўзнагароджанні Дземчанка дзякаваў партнёрам, а свой спіч скончыў фразай: «Каратнула троху. Прабачце».
Форварда «Гомеля» Алега Качалоўскага, абаронцу «Брэста» Уладзіслава Мартынюка і абаронцу «Авіятара» Марка Рудакоўскіага прывезла карэта-лімузін.
Кошт арэнды такога аўто залежыць ад колькасці гадзін, але наўрад ці хакеістам давялося плаціць шмат:
Рудкоўскі атрымаў узнагароду як «самы медыйны хакеіст». Абаронца вядзе тэлеграм на 580 падпісчыкаў, інстаграм на 4,5 тысячы і Цік Ток на 12,3 тысячы, куды выкладае забаўляльныя рылсы на хакейную тэму. На цырымоніі Рудкоўскі не прапусціў магчымасць сфатаграфавацца з Чабоцінай:
Кіраўнік ФХБ лукашыст Аляксандр Багдановіч і няўдака-лыжнік генеральны сакратар ФХБ Андрэй Башко прыехалі на кітайскім прэміюм-аўтамабілі Hongqi, што ў перакладзе азначае «Чырвоны сцяг». Па відэа выглядае, што гэта электрычная мадэль HS9 120 kWh. Каштуе яна ў дыяпазоне ад 90 да 132 тысяч долараў у залежнасці ад камплектацыі.
Натуральна, гэтае мерапрыемства не абышлося без Дзмітрыя Баскава – сябра «парламента» Лукашэнкі і былога кіраўніка ФХБ, які мае дачыненне да забойства Рамана Бандарэнкі ў лістападзе 2020-га. Яму забаронена мець дачыненне да хакейных спраў, але каму гэта важна ў рэжымнай Беларусі.
На цырымонію Баскаў заявіўся разам з жонкай Аляксандрай на Bentley Continental GT першага пакалення, якое ўжо знятае з вытворчасці. Кошт аўто ва ўжываным стане ў залежнасці ад камплектацыі вар'іруецца ад 24,5 да 252,5 тысяч еўра. Але магчыма, што Баскаў узяў машыну ў арэнду. У адным з мінскіх пракатных салонаў падобная даступная за 974 рублі за суткі.
Гэты ролік у сваім інстаграме апублікавала прэс-служба федэрацыі. У каментарах карыстальнікі звярнулі ўвагу, што машына Баскава не мае нумароў, затое з нанесеным танаваннем. Праўда, неўзабаве гэтыя каментарыі былі выдаленыя. Але нумары на машыне Баскава ўсё ж ёсць. Проста, як і ў іншых гасцей, іх закрылі надпісам:
У Беларусі забароненае самастойнае танаванне лабавога і бакавога шкла, але яно дазволенае, калі гэта зрабіў вытворца. Пры гэтым святлопрапусканне лабавога і пярэдняга бакавога шкла аўтамабіля павінна складаць не менш за 70%.
Іншыя пасты карыстальніка
