Вядомыя беларусы выйгралі Д4 Польшчы па хакеі ў камандзе з такой жа назвай, пад якой у Мінску гуляюць ахоўнікі Лукашэнкі
Комік, які смяшыў Зяленскага, і сын таго самага Сафар'яна.
18 траўня ў Польшчы завяршыўся чэмпіянат краіны па хакеі сярод каманд трэцяй лігі, то бок мясцовым чацвёртым дывізіёне (так, суседзі маюць і такія хакейныя нетры). Пераможцам рэгулярнага чэмпіянату і плей-оф стаў варшаўскі «Легіён». Вы спытаецеся: якая нам да гэтага справа? Усё проста – за гэты клуб гуляюць адразу шасцёра беларусаў.
Самы медыйныя з іх – 36-гадовы абаронца Максім Канавал. Яго асноўная справа – камедыя. Ураджэнец Наваполацка пераехаў ва Украіну ў 2012-м годзе, дзе і пачаў займацца стэндапам. Некалькі разоў удзельнічаў у папулярным украінскім шоў «Рассмяшы Коміка», у журы якога сядзеў цяперашні прэзідэнт Украіны Уладзімір Зяленскі. У 2016-м і 2020-м Канавалу ўдалося забраць галоўны прыз праекту – 50 тысяч грыўнаў (каля дзвюх тысяч долараў па курсе на той час).
Пасля ўварвання Расіі ў 2022 годзе Канавал пераехаў у Польшчу. Выступаў на разагрэве ў Славы Камісаранкі, а разам з іншымі беларускімі стэндаперамі заснаваў аб'яднанне комікаў Pan Standup. Пра жыццё ўдзельнікаў гэтага варушняка рабіў выпуск Аляксандр Івулін, а непасрэдна з Канавалам паўгода таму выходзіла вялікае інтэрвʼю ў Мікіты Мелказерава. Абавязкова паглядзіце, калі яшчэ не бачылі.
«Як беларус я вельмі люблю хакей – так прапісана ў нас у канстытуцыі», – жартаваў Канавал, калі яшчэ жыў у Кіеве. Івуліну ён паказаў сваю хакейную форму, якую сушыў пасля трэнінгу наўпрост у кватэры, дадаўшы, што жонка праз гэта не заходзіць у пакой.
Гумарыст кажа, што не лічыць хакей атрыбутам лукашэнкаўскай дыктатуры, бо аддзяляе «спорт і людзей, якія ім займаюцца». Пры гэтым яго бянтэжыць, што людзі, якія дэманструюць на лёдзе мужнасць і смеласць, па-за яго межамі паводзяцца як баязліўцы. Гэта тычыцца і падзей 2020 года, і рэакцыі на напад Расіі на Украіну.
– Больш за ўсе мяне засмуціў зварот зборнай Беларусі, дзе яны віншавалі Лукашэнку з яго днём народзінаў, – прызнаецца Канавал, а яшчэ згадвае, як у родным Наваполацку выпіваў на адной турбазе з братамі Касціцынымі, які на той момант ужо выступалі ў НХЛ. Маўляў, вяртаючыся дадому, яны не вельмі трымаліся спартыўнага рэжыму.
Сам жа Канавал у чэмпіёнскім сезоне правёў за «Легіён» восем матчаў і набраў пяць (4+1) пунктаў.
Яшчэ адзін цікавы беларус з «Легіёна» – 40-гадовы Іван Сафарʼян. Абаронца зʼяўляецца сынам былога намесніка старшыні АБФФ Сяргея Сафарʼяна. На пачатку нулявых не без дапамогі бацькі спрабаваў будаваць карʼеру футбольнага суддзі – у 2011-м стаў найлепшым арбітрам першай лігі, праходзіў двухгадовую стажыроўку ва УЕФА, абслугоўваў матчы вышэйшай лігі. Скончыў судзейскую карʼеру ў 2017-м праз праблемы са спінай, але з футбола не сышоў – працаваў фітнэс-інструктарам у судзейскім дэпартаменце АБФФ.
Зусім нядаўна Івана Сафар'яна згадалі ў расследаванні BELPOL аб дзейнасці «лукашэнкаўскага спартыўнага клубу», які рэжым выкарыстоўвае для каламутных фінансавых схем.
Бацька былога суудзі займае ў клубе пасаду намесніка старшыні цэнтральнай рады. Вядома, што Іван Сафар'ян цяпер стала жывае ў Польшчы і валодае фірмамі Diva Express і Delikasa, якія займаюцца продажам матацыклаў. Прычым ад Diva Express выдадзеная даверанасць Сяргею Сафар'яну на ажыццяўленне дзеянняў на тэрыторыі Беларусі.
Сафар'ян-малодшы – адзін з нямногіх гульцоў «Легіёна», хто мае досвед выступлення на прафесійным узроўні: у далёкім сезоне-2000/01 ён згуляў адзін матч за «Юнацтва» ў чэмпіянаце Беларусі. У мінулым сезоне польскага Д4 Іван Сафар'ян узяў удзел у 13 матчах і набраў 22 (6+16) пункты.
Яшчэ адзін гулец «Легіёна» з бэкграўндам у беларускім хакеі – 19-гадовы Арцемій Аўсейка. Форвард займаўся ў мінскай СДзЮШАР імя Руслана Салея і выступаў за яе каманду ў чэмпіянаце Беларусі U-18.
Аўсейка ўвогуле стаў найлепшым бамбардзірам польскага Д4 – у 13 матчах выбіў 55 (28+27) пунктаў! У фінальнай гульні супраць «Хусарыі» (8:3) запісаў на рахунак асістэнцкі хет-трык і адну шайбу:
Аўсейку прызналі найлепшым гульцом фінальнага турніру, які складаўся з двух паўфіналаў, матча за трэцяе месца і фіналу – кожная стадыя адбывалася ў адзін матч.
Другім бамбардзірам усяго чэмпіянату стаў 27-гадовы беларус Кірыл Замкоў, на рахунку якога 20+25 у 13 сустрэчах. У фінальнай гульні ён вызначыўся асістэнцкім покерам і галявым дублем. Вось так Замкоў закідваў шостую шайбу ў фінальным матчы:
За «Легіён» ва ўсіх 14 матчах мінулага сезона згуляў 30-гадовы Дзмітрый Вырко. На рахунку беларускага абаронцы 18 (8+10) пунктаў.
Спорт для Вырко – хобі, а так ён з'яўляецца дырэктарам вараўшскай фірмы MIK-MONTAŻ, якая займаецца ўсталяваннем электрычнага абсталявання.
11 матчаў за «Легіён» у мінулым сезоне згуляў 30-гадовы брамнік з Беларусі Алег Богдан і прапусціў 22 шайбы.
Цікава, што ў Мінску таксама ёсць хакейная каманда «Легіён». У мінулым сезоне яна заняла шостае месца ў Чэлендж лігі – самым нізкім узроўні аматарскіх чэмпіянатаў Мінска. Складаецца той «Легіён» у асноўным з былых і дзейных ахоўнікаў Лукашэнкі, а тыя хакеісты-аматары, якія не маюць дачынення да службы бяспекі дыктатара, з'яўляюцца выхадцамі з рэжымных сілавых структур.
Іншыя пасты карыстальніка
