Беларускі фаварыт на золата АГ застаўся без медалёў – вёў 6:0, але прайграў французу з драмай на апошніх секундах
Георгій Гурцыеў быў упэўнены ў поспеху, але суддзі вырашылі інакш.
7 жніўня на Алімпіядзе стартаваў натуралізаваны ў Беларусь расіянін Георгій Гурцыеў. У статусе нейтральнага атлета тхэквандыст пачаў з 1/8 фіналу ў катэгорыі да 58 кг. Гэта было асабліва цікава з улікам таго, што вядомае ў свеце спартыўнае выданне Sports Illustrated нечакана прадказала Гурцыеву золата АГ.
Аднак чэмпіёнства ў спартсмена ўжо дакладна не будзе. У першай стадыі яму на шляху трапіўся француз Кірыян Равэ, за якога актыўна заўзела хатняя арэна. Спачатку здавалася, што гэта не дапамагае – у Гурцыева прайшло два ўдары ў галаву, і ён павёў 6:0 па ачках за 33 секунды да канца першага раўнда. Але пасля гэтага Равэ перайшоў у рэжым лютасці, парай сваіх удараў зрабіў лік 6:6 – а за секунду да канца раунда Гурцыеву прысудзілі штраф, падобна, за тое, як ён спрабаваў ухiлiцца ад чарговай атакi француза. Так раўнд скончыўся 7:6 на карысць гаспадара турніру.
У другім раўндзе Равэ зноў трапіў у галаву Гурцыева, а пасля серыі штрафаў трымаўся лік 4:2 на карысць француза. Але за дзве секунды да сірэны беларускі спартсмен правёў нешта падобнае на ўдар у галаву з развароту – а гэта адразу пяць ачкоў, што пераварочвала б раўнд. Гурцыеў, які пасля прыёму апынуўся на маце, пераможна ўскінуў рукі.
Але суддзі, паглядзеўшы паўтор, вырашылі, што Гурцыеў у момант удару парушыў правілы – і не залічылі прыём, ды яшчэ і далі ачко французу.
Праз секунды француз, які коштам малога штрафу проста ўцёк ад апошняй атакі Гурцыева, святкаваў перамогу (7:6, 5:3).
Беларускаму спартсмену заставалася спадзявацца, што Равэ выйдзе ў фінал – таму што ўсе, хто прайграе фіналісту, у тхэквандо змагаюцца за бронзу паміж сабой. Але француз у чвэрцьфінале ва ўпартым паядынку саступіў карэйцу Парку Тэджуну. Такім чынам, Гурцыеў скончыў свой алімпійскі шлях без медалёў.
Іншыя пасты карыстальніка
