Алімпійская рада Азіі прапанавала дапускаць спартсменаў з Беларусі да спаборніцтваў у рэгіёне ў нейтральным статусе
Алімпійскі савет Азіі (АСА) вылучыў ініцыятыву, якая дазваляе ўдзельнічаць у спаборніцтвах на тэрыторыі кантынента спартсменам з Беларусі і Расіі.
Як паведамляе МАК, у ходзе спрэчак падчас Алімпійскага саміту пераважная большасць удзельнікаў пагадзіліся, што санкцыі супраць Расіі і Беларусі павінны заставацца ў сіле. Нагадаем, яны былі ўведзеныя ў адказ на вайну, якую з 24 лютага працягвае Расія ва Украіне з выкарыстаннем тэрыторыі Беларусі.
Пры абмеркаванні нядопуску прадстаўнікоў Беларусі і Расіі да міжнародных спаборніцтваў такая мера была названа ахоўнай. Аднак выконваючы абавязкі кіраўніка АСА індыец Рандзір Сінх заявіў, што ў Азіі на дадзены момант няма прычын для абмежаванняў у дачыненні да расійскіх і беларускіх спартсменаў, пасля чаго прапанаваў садзейнічаць удзелу спартсменаў з Беларусі і Расіі ў спаборніцтвах у Азіі пад кантролем АCA. Пры гэтым Сінх гарантаваў выкананне санкцый – забарону дзяржсцягаў, дзяржгімнаў і любых іншых пазначэнняў прыналежнасці спартсменаў да Беларусі або Расіі.
У выніку Алімпійскі саміт аднагалосна пастанавіў, што МАК павінен узначаліць далейшае вывучэнне ініцыятывы АСА ў дачыненні да спартсменаў, якія поўнасцю выконваюць Алімпійскую хартыю і не парушаюць забарон. Акрамя таго, некаторыя прадстаўнікі міжнародных федэрацый заявілі, што кожная з іх павінна асобна ацаніць для свайго віду спорту, ці захоўваюцца ў ім прычыны для нядопуску ўсіх спартсменаў з Расіі і Беларусі.
Алімпійскі саміт у сувязі з гэтым запатрабаваў у Выканкама МАК «у поўнай меры прыняць да ўвагі» дадзеныя заявы.
