МАК дапускае зняцце міжнароднага бана з беларускіх спартсменаў, калі яны не выказвалі «актыўнай падтрымкі» вайны ва Украіне
Міжнародны алімпійскі камітэт (МАК) выпусціў «Заяву пра салідарнасць з Украінай, санкцыi супраць Расіі і Беларусі і статус спартсменаў з гэтых краін», з якой вынікае, што МАК дапускае магчымасць выступлення на міжнародных спаборніцтвах беларускіх і расійскіх спартсменаў, калі тыя не былі заўважаны ў «актыўнай падтрымцы» вайны ва Украіне.
Нагадаем, што многія беларускія каманды і спартсмены застаюцца адхіленыя ад міжнародных спаборніцтваў у адказ на вайну, якая з 24 лютага працягваецца Расiяй ва Украіне з выкарыстаннем тэрыторыі Беларусі.
«Выканкам МАК сабраўся для разгляду аднагалосных высноў Алімпійскага саміту. 17 і 19 студзеня 2023 года таксама былі праведзены кансультацыйныя сходы з членамі МАК, глабальнай сеткай прадстаўнікоў спартсменаў, міжнароднымі федэрацыямі і нацыянальнымі алімпійскімі камітэтамі.
Што да асобных спартсменаў з расійскім ці беларускім грамадзянствам, пераважная большасць удзельнікаў кожнага з кансультацыйных сходаў заявілі, што ніводнаму спартсмену нельга перашкаджаць ва ўдзеле ў спаборніцтвах толькі з-за яго пашпарта, значыць, трэба дадаткова вывучыць шлях да допуска гэтых спартсменаў да спаборніцтваў пры выкананні строгіх умоў.
Адна з такіх строгіх умоў: спартсмены будуць удзельнічаць у спаборніцтвах як «нейтральныя атлеты» і ніякім чынам не прадстаўляць сваю дзяржаву або любую іншую арганізацыю сваёй краіны.
Іншая строгая ўмова: спаборнічаць змогуць толькі тыя, хто не выступалі супраць місіі мiру МАК праз актыўную падтрымку вайны ва Украіне. Для допуску любога спартсмена павінны праводзіцца індывідуальныя праверкі.
У выпадку невыканання якім-небудзь спартсменам строгіх умоў міжнародная федэрацыя і/цi арганізатары мерапрыемства павінны неадкладна зняць спартсмена з мерапрыемства, адхіліць ад наступных мерапрыемстваў і паведаміць пра ўсё у МАК, каб ён разгледзеў далейшыя захады і санкцыі.
Пераважная большасць удзельнікаў кожнага з кансультацыйных сходаў прасілі МАК працягнуць вывучэнне вышэйпададзенай канцэпцыі праз двухбаковыя кансультацыі, а таксама віталі і высока ацанілі прапанову Алімпійскага камітэта Азіі прадаставіць расiйскім і беларускім спартсменам доступ да азіяцкіх спаборніцтваў», – гаворыцца ў заяве МАК.
