Дыктатары будуць выкарыстоўваць спорт для апраўдання сваіх злачынстваў – меркаванне заснавальніка «Трыбуны» наконт заявы МАК аб магчымым допуску беларусаў і расіян
Прапаганда займаецца гэтым і цяпер.
25 студзеня Міжнародны алімпійскі камітэт апублікаваў заяву, з якой вынікае, што арганізацыя ўсур'ёз разглядае магчымасць допуску беларусаў і расіян да міжнародных спаборніцтваў (няхай і з абмежаваннямі ў выглядзе нейтральнага статусу і гэтак далей). Гэта выклікала шмат крытыкі з боку тых прадстаўнікоў спорту, якія пакутуюць ад дзеянняў дыктатарскіх рэжымаў гэтых краін – украінцаў і беларусаў.
Так, прэзідэнт Украіны Уладзімір Зяленскі выступіў са зваротам, у якім у крытыкуючым тоне выказаўся пра Томаса Баха (кіраўнік МАК – Tribuna.com) і запрасіў яго ў Бахмут. Пазней, украінскі лідар даслаў лісты прэзідэнтам вядучых міжнародных спартыўных федэрацый наконт магчымага вяртання беларусаў і расіян.
Зусім не станоўча да ідэі МАК ставіцца кіраўнік Беларускага фонду спартыўнай салідарнасці Аляксандр Апейкін. Каментуючы прапанову арганізацыі, ён назваў яе «небяспечным прэцэдэнтам».
Хапае і шмат супрацьлегласцяў: напрыклад, пазіцыю МАК падтрымалі Еўрапейскія алімпійскія камітэты, але НАК Нарвегіі, які ўваходзіць у арганізацыю, выступае супраць вяртання Беларусі і Расіі. Парадокс, пасля якога абвінавачванні «Спартсменаў за Украіну» у падкантрольнасці Міжнароднага алімпійскага камітэту Расіі не падаюцца беспадстаўнымі.
Сваімі думкамі на тэму падзяліўся заснавальнік «Трыбуны» Дзмітрый Навоша:
– «Адхіленне з-за пашпарта не адпавядае каштоўнасцям», – кажа кіраўнік МАК Томас Бах, і прамацвае зараз ваду ідэяй «ну згуляюць пуціністы/лукашысты на Алімпіядзе пад нейтральным сцягам, што тут такога».
Я раскажу вам, што. На прыкладзе, Сабаленка і лукашыстаў.
Перамога жыхаркі Штатаў Арыны Сабаленка (домам яна ва ўсіх інтэрв'ю называе Маямі) нават пад нейтральным сцягам – рэдкая нагода для самасцвярджэння людаедскай дыктатуры. Удалы акампанемент праклёнам і пагрозам у адрас тых, хто з дыктатурай змагаецца. Даважка да пра-ваеннай антыўкраінскай ўсіх прапагандысцкіх рэсурсах.
Думаю, МАК і Томас Бах дзейнічаюць з лепшых, ідэалістычных памкненняў. Выбухаў з Лазаны не чуваць, злачынствы дыктатур не змяшчаюцца ў галаву (і таму ігнаруюцца як не маюць дачынення да справы), вайна далёка на перыферыі іх свядомасці. Прапанова Зяленскага Баху зрабіць візіт у Бахмут – больш, чым каламбур. Гэта праўда дапамагло б кіраўніку МАК зразумець больш.
Спорт не проста «можа» выкарыстоўвацца расійскай і беларускай дыктатурамі для нармалізацыі ненармальнага, для апраўдання ранейшых злачынстваў і планавання новых. Ён БУДЗЕ для гэтага выкарыстоўвацца. Цяпер, калі дыктатурам тэрмінова патрэбныя хоць нейкія пацверджанні сваёй правасці, хоць нейкія поспехі, новыя рэсурсы мабілізацыі, ён БУДЗЕ ВЫКАРЫСТАНЫ ТОЛЬКІ ТАК, – напісаў Навоша ў сваім Telegram-канале, дадаўшы да допісу скрыншоты з рэакцыяй на перамогу Сабаленкі.
А таксама рэакцыі прапагандыстаў і звязаных з імі рэсурсаў.