Карына Казлоўская: «Я давярала свайму трэнеру, але калі я сказала, што збегла з Беларусі, яна патэлефанавала ў «міністэрства»
Беларуская лучніца з польскім пашпартам Карына Казлоўская адказала на пытанне польскіх журналістаў пра тое, як зразумела, што жыве ў нявольнай краіне.
– Калі вы зразумелі, што жывяце не ў свабоднай краіне?
– Калі пачалася пандэмія, небяспеку якой улады пераменшылі. Яны пачалі ўсё кантраляваць.
Не было ніякай свабоды, я адчувала, што нешта не так. У жніўні 2020 года былі выбары, і тады ўсё стала зразумела.
Я брала ўдзел у пратэстах супраць фальсіфікацыі вынікаў выбараў, і праз гэта мной зацікавіліся спецслужбы.
Мне не раз даводзілася ўцякаць ад АМАП. У 2022 годзе, пасля пачатку вайны ва Ўкраіне, я зразумела, што мне трэба з'ехаць.
І вось тады пачаліся самыя вялікія рэпрэсіі.
– Чым вам пагражалі?
– Пакаранне, верагодна, складзе тры ці чатыры гады пазбаўлення волі.
Калі я вырашыла ўцячы, я нікому пра гэта не казала, бо чакала, што інфармацыя дойдзе да спецслужбаў.
Перасякаючы мяжу, я напісала свайму трэнеру, з якім працавала 9 гадоў. Я давярала ёй, але была асцярожная. І добра.
Яна адразу ж патэлефанавала ў міністэрства і сказала, што я збегаю, бо яна думала, што я яшчэ не перасекла мяжу.
Калі б я сказала ёй раней, ахоўнікі напэўна спынілі б мяне. Потым да маіх сяброў прыйшла міліцыя і адправіла іх на суткі – на два тыдні.
Яны званілі і крычалі, каб я вярталася. Яны прыгразілі, што не адпусцяць іх, пакуль я не вярнуся, але я ведала, што шляху назад няма. Мне ўдалося перавезці ў Польшчу сваю сям'ю, – сказала Казлоўская.
