Кіраўнік БСК Комлева – пра міжнародны бан: «Рашэнне па допуску Беларусі зноў не вынеслі. Чакаем станоўчыя зрухі перад АГ-2026»
Старшыня Беларускага саюза канькабежцаў (БСК) Юлія Комлева расказала пра магчымы допуск беларусаў да міжнародных спаборніцтваў.
Нагадаем, што шматлiкія беларускія каманды і спартсмены былі адхіленыя ад міжнародных спаборніцтваў у адказ на вайну, якая з 24 лютага 2022 года працягваецца Расiяй ва Украіне з выкарыстаннем тэрыторыі Беларусі.
– Што можна сказаць па допуску беларускіх спартсменаў на міжнародную арэну. Як хутка мы там зможам аказацца?
– Мы знаходзімся ў пастаянным дыялогу з міжнародным саюзам канькабежцаў. Нашы НАК і мінспорту працуюць над тым, каб мы былі дапушчаны. Але ўлічваючы тую складаную сітуацыю, якая складваецца, працягваюць дзейнічаць старыя дакументы міжнароднага саюза канькабежцаў пра тое, што мы часова адхілены.
– А новае рашэнне – калі?
– Мы чакалі, што гэтае пытанне будзе разглядацца на канферэнцыі ў Лазане, якая прайшла месяц таму. Але па нашым допуску зноў не вынеслі рашэнне. Чакаем, што, можа, станоўчыя зрухі пачнуцца напярэдадні Алімпійскіх гульняў, – сказала Комлева.
