Галавацюк пра допуск беларусаў да адбору АГ-2026: «Абмежаванні абыдуць не ўсё – трэба добра падумаць, ці трэба ехаць пры такіх умовах»

Лідар мужчынскай спрынтарскай каманды Беларусі па канькабежным спорце Ігнат Галавацюк падзяліўся меркаваннем пра рашэнне ISU па допуску беларусаў на міжнародныя спаборніцтвы ў нейтральным статусе.

«Як толькі даведаліся пра гэта рашэнне, то ўзрадаваліся, але, калі пачалі разбірацца ва ўмовах допуску, узнікла шмат пытанняў. Прысутнічае маса абмежаванняў, якія абыдуць не ўсе.

Ёсць падазрэнне, што «абрэжуць» менавіта лідараў зборнай і дапусцяць не самых галоўных прэтэндэнтаў на ўзнагароды.

Камандзе дадуць усяго па адной квоце на кожную дыстанцыю, гэта значыць будзе нешматлікі склад, да таго ж нельга ўдзельнічаць у камандных дысцыплінах. Трэба добра падумаць, а ці трэба ехаць пры такіх умовах. Да лютага ёсць час вызначыцца.

У 2024-м годзе нам упершыню ўдалося зрабіць тры высакагорныя зборы. Гэта станоўча адбілася на нашым фізічным складальніку, уся каманда дабілася прагрэсу.

Так, у жаночай зборнай Кацярына Гагіева і Ганна Дамарацкая зараз маюць вынікі ў дзесятцы наймацнейшых сусветнага рэйтынгу. Я ж плаўна набіраю форму і лічу, што гэта пакуль мой найлепшы адрэзак кар'еры ў гэтым плане.

Сезон яшчэ не скончаны, наперадзе тры важныя старты. Хочацца палепшыць асабістыя і нацыянальныя рэкорды ў спрынтарскіх відах, а таксама падцягнуць дыстанцыю 1500 метраў», – заявіў Галавацюк.

Нагадаем, МАК лічыць магчымым удзел у АГ спартсменаў з Беларусі і Расіі толькі ў статусе індывідуальных нейтральных атлетаў (AIN) пры выкананні шэрагу патрабаванняў, сярод якіх адсутнасць «актыўнай падтрымкі» вайны ва Украіне, а таксама кантракта з ваеннымі ці сілавымі ведамствамі Беларусі або Расіі.