Кіраўнік Рады беларускага лыжнага саюза Грэбнёў: «З FIS на сувязі па пытаннях допуску беларускіх спартсменаў»

Нагадаем, у адказ на вайну, якая з 24 лютага 2022-га працягваецца Расіяй ва Украіне з выкарыстаннем тэрыторыі Беларусі, МАК 28 лютага 2022-га апублікаваў рэкамендацыю адхіліць прадстаўнікоў Расіі і Беларусі ад міжнародных спаборніцтваў, як i зрабiла большасць сусветных федэрацый па відах спорту.

28 сакавіка 2023-га МАК абвясцiў, што з гэтага моманту рэкамендуе дапускаць да міжнародных спаборніцтваў беларускіх і расійскіх індывідуальных атлетаў у нейтральным статусе, калі такія спартсмены не дапускалі «актыўнай падтрымкі» вайны ва Украіне, а таксама не маюць кантракта з ваеннымі або сілавымі ведамствамі Беларусі ці Расіі.

– Пытанне аб допуску беларускіх і расійскіх спартсменаў да ўдзелу ў міжнародных стартах было ўнесена ў парадак дня майскага пасяджэння савета FIS, аднак яго разгляд быў адкладзены.

Такім чынам, на дадзены момант проста не было прынятае ніякага рашэння, паколькі пытанне допуску нават не разглядалі. Адпаведна, яго адклалі на пазнейшы тэрмін да далейшага апавяшчэння, а ў сіле засталося рашэнне, прынятае на радзе ў кастрычніку 2022 года.

У сваю чаргу, FIS прымае да ўвагі рэкамендацыі МАК, але адзначае, што для прапрацоўкі ўсіх нюансаў для кожнага канкрэтнага віду спорту неабходны час.

Разам з тым, 25 траўня адбыўся кангрэс FIS, які ў няцотныя гады праходзіць у анлайн-фармаце. Беларускі лыжны саюз як паўнапраўны член міжнароднай арганізацыі прыняў у ім удзел, у тым ліку ў галасаванні па ўсіх ключавых пытаннях.

Акрамя раней названых мерапрыемстваў, у міжнародным календары FIS праводзяцца вясенняя і восеньская канферэнцыі, на якіх таксама абмяркоўваюцца пытанні бягучай дзейнасці арганізацыі і пытанні развіцця тых ці іншых відаў спорту.

Беларускі лыжны саюз па-ранейшаму з'яўляецца членам FIS, мае доступ да ўсёй неабходнай інфармацыі. Мы знаходзімся ў цесным кантакце з міжнароднай федэрацыяй лыжнага спорту, у тым ліку ўвесь час на сувязі з яе кіраўніцтвам па пытаннях допуску беларускіх спартсменаў да міжнародных стартаў.

У дадзены момант завяршаецца атэстацыя нацыянальных каманд, ніякіх панічных настрояў няма. Спартсмены трэніруюцца і рыхтуюцца згодна з планамі.

Лёс спаборніцкага сезона 2023-2024, у якім не запланавана адборачных турніраў да Алімпіяды 26 года, а таксама чэмпіянатаў свету, будзе вырашацца на восеньскай Канферэнцыі міжнароднай федэрацыі лыжнага спорту. Яна адбудзецца ў канцы верасня, – сказаў Грэбнёў.