Член выканкама АБФФ Булойчык: «У Літве і Латвіі дыктатура – у кулуарах просяць прабачэння, публічна баяцца. Беларусь гатова правесці ЧЕ па футзале»
Кіраўнік упраўлення спорту і турызму выканкама Лукашэнкі па Мінскай вобласці, член выканкама АБФФ Яўген Булойчык пракаментаваў сітуацыю з выхадам зборнай Беларусі на чэмпіянат Еўропы-2026 па футзале.
Турнір запланаваны ў Латвіі і Літве, дзе адмаўляюцца прымаць беларускую каманду.
– Беларусь сама гатова правесці [ЧЕ] у сябе, калі б нам далі такую магчымасць (правядзенне турніраў пад эгідай УЕФА ў Беларусі забаронена ў адказ на вайну, якую з 24 лютага 2022 года працягвае Расія ва Украіне з выкарыстаннем Беларусі – Tribuna.com). Гэта палітыка.
Калі кранаць грамадзян гэтых краін, то ў іх абсалютна іншае стаўленне. У нас ёсць асабістыя адносіны, мы маем зносіны. На жаль, там такія ўмовы… Вось менавіта там дыктатура: чалавек баіцца публічна нешта сказаць. У кулуарах, сам-насам ці пры асабістай гутарцы гатовыя нават прасіць прабачэння перад намі. А калі гэта выходзіць ужо на агульны фармат, пачынаюць паводзіць сябе не па-мужчынску.
Беларусь – міралюбівая краіна, дзе ўсё даступна, у тым ліку для занятку спортам. І шмат іншых краін, якім далёка да нас, – сказаў Булойчык.
