Іспанскі тэнісіст Карлас Алькарас (ATP №3) пракаментаваў паразу ў матчы супраць нарвежца Каспера Рууда (ATP №7) у стартавай гульні на Выніковым турніры ATP – 1:6, 5:7.

«Так, я хварэў да таго, як прыехаў сюды. Калі я прыехаў, трэніроўкі праходзілі добра, я адчуваў сябе добра, нягледзячы на хваробу, я мог спаборнічаць, мог гуляць, удзельнічаць у працяглых розыгрышах. Я спадзяваўся, што з днямі будзе лепей, але сёння, не ведаю, ці былі гэта нервы з-за першага матча, але я адчуваў сябе не зусім добра.

Мой страўнік моцна абмяжоўваў мяне ў магчымасці гуляць і адчуваць сябе камфортна. Так, я мог бы згуляць лепш. Гэта тое, чаму я мушу навучыцца. Мы не будзем адчуваць сябе добра ў кожным матчы, які гуляем на працягу года, але гэта вельмі ўскладніла для мяне розыгрышы, аднаўленне паміж ачкамі, праблема з тым, што я не магу добра дыхаць і адчуваю удушша, гэта вельмі абмяжоўвала мяне.

Я не люблю казаць пра такія рэчы, таму што гэта гучыць як апраўданне і абясцэньвае працу і ўзровень Каспера, але ў рэшце рэшт я павінен сказаць, што я адчуваю.

Смею сказаць, што ўсе гульцы стаміліся маральна. Калі хтосьці кажа вам, што ён свежы - ён хлусіць. Хтосьці спраўляецца з гэтым лепш за іншых. Я стаміўся. Псіхалагічна я стаміўся. Шмат матчаў у вельмі шчыльным графіку, у напружаным годзе з не надта вялікай колькасцю выхадных дзён, мала перыядаў, калі можна адпачыць дома. Вы адчуваеце, што па заканчэнні тыдня ці тура ў вас ёсць два-тры дні адпачынку, а затым вы павінны ехаць гуляць турніры ў іншай частцы свету. З пачатку года назапашваюцца гадзіны і дні, і ты прыходзіш да гэтага моманту стомленым. Думаю, у гэтым годзе я гуляю значна лепш, чым у мінулым годзе, але мне трэба знайсці спосаб гуляць у добры тэніс, нягледзячы на псіхалагічную стомленасць.

Ну, пасля сённяшняга дня я не хачу шмат думаць (пра выхад у паўфінал – заўв.). Калі я буду адштурхоўвацца ад сённяшніх адчуванняў, дык складана думаць пра паўфінал. У тэнісе добра тое, што аднойчы ты можаш адчуваць сябе вельмі дрэнна, а на наступны – зусім інакш. Магчыма, у дзень матча я згуляю адзін з найлепшых матчаў года. Хто ведае. Магу толькі сказаць, што многія гульцы прайгравалі першы матч, а ў выніку выйгравалі турнір.

Я, напрыклад, у мінулым годзе не адчуваў сябе добра ў сваім першым матчы і ў выніку дайшоў да паўфіналу. Я не хачу адштурхоўвацца ад сённяшніх адчуванняў і не хачу думаць аб тым, прайду далей ці не. Я хачу жыць дзень пры дні, спадзяюся, буду адчуваць сябе лепш, і тады мы ўбачым, што адбудзецца ў наступным матчы. Я засяроджуся і падрыхтуюся як мага лепш», - сказаў Алькарас.

Аўтар: Ryhor Bartaševič