«Ведаеш, з кім гаворыш?» Сабаленку хацелі выгнаць з рэстарану ў Маямі – але гэта толькі адзін бок гісторыі
Прычапіўся пранкер, вядомы «канфліктамі» з чэмпіёнам АГ і багатым ураджэнцам Бабруйску.
Пасля перамогі ў Маямі Арына Сабаленка патрапіла ў канфлікт у адным з рэстаранаў горада, але не ўсё так проста. Відэа з інцыдэнтам завірусілася ў сацсетках.
У роліку нейкі хлопец просіць як мага хутчэй вызваліць столік Сабаленку, трэнера па фізпадрыхтоўцы Джэйсана Стэйсі і бойфрэнда тэнісісткі Георгіса Франгуліса. Мужчыны ў сваю чаргу бароняць «каралеву Маямі», а першая ракетка свету ўвесь час пасмяхаецца і толькі ў самым канцы прапануе знерваванаму суразмоўцу перакусіць.
Госць: «Рабяты, не хачу быць грубым. Ёсць і іншыя людзі, якія чакаюць свой стол».
Стэйсі: «Так, і мы тут першыя. Гэта вельмі дрэнна, я мяркую».
Франгуліс: «Вы разумееце, з кім вы размаўляеце? Вы ведаеце, хто гэта? Вы ведаеце, што яна каралева Маямі? Першая тэнісістка года».
Госць: «Мне ўсё роўна, хто гэта. Я проста кажу, што ў мяне таксама ёсць стол. Я проста пытаюся, ці можаце вы, хлопцы, прыспешыцца!?»
Франгуліс: «Вы тут працуеце?»
Госць: «Не, але я ведаю ўласніка. І ён можа выйсці і забраць гэты стол».
Менеджарка: «Ці магу я вам дапамагчы, сэр?»
Госць: «Я проста сказаў, што гэтым людзям трэба згортвацца. Я чакаў гэты канкрэтны стол».
Сабаленка: «Хочаце перакусіць?»
За 13 гадзін відэа набрало мільён праглядаў у Instagram, яшчэ мільён у TikTok. Нібыта канфлікт узнік не проста так: той самы знерваваны госць – 24-гадовы блогер Арыс Егер.
У сваіх відэа ён парадыруе капрызнага і распешчанага сына багатых бацькоў з Еўропы. Некаторыя з ролікаў набіраюць дзясяткі мільёнаў праглядаў. Часцяком у пастановачных пранках Егера (у класічных варыянтах «ахвяры» не ведаюць, што іх здымаюць) здымаюцца селебрыці: прадпрымальнікі, іншыя блогеры, музыкі і г.д.
Спалучэнне «вядомы спартсмен + рэстаран» таксама не новы сюжэт. У мінулым годзе ў падобным да Сабаленкі відэа зняліся зорка серыялу «Дзённікі Вампіра» Ніна Добраў і яе не менш зорны бойфрэнд – амерыканскі сноўбардзіст, трохразовы алімпійскі чэмпіён (2006, 2010 і 2018) Шон Уайт.
А ў жніўні Егер крытыкаваў тэнісныя скілы Джэйка Пола. Каб не пастановачны характар, тое было б небяспечна, бо праз тры месяцы Пол перамог легендарнага Майка Тайсана ў баксёрскім паядынку.
Апроч Сабаленкі Егер перасякаўся з яшчэ адным ураджэнцам Беларусі. У 2023-м «сын багатага таты» атрымліваў парады ад прадпрымальніка, бізнес-коўча, аўтара чатырох бестселераў паводле The New York Times Гары Вайнерчука, які нарадзіўся ў Бабруйску ў 1975 годзе і пры нараджэнні быў Генадзем. Праз тры гады сям'я пераехала ў ЗША, а на пачатку 2000-х мужчына стаў вядомы як знаўца вінаў, здолеўшы павялічыць абарот сямейнага бізнесу па продажу напою з 3 да 60 млн долараў на год. Пазней Вайнерчук сышоў у дыджытал і ў 2017-м быў прызнаны журналам Forbes самым уплывовым лідарам меркаванняў у сацсетках.
«Хопіць. Cтань самастойным, стань на дзве свае чортавы нагі. Хопіць татавых грошай. Ты не будзеш шчаслівы, прымаючы ад яго грошы», – казаў Вайнерчук блогеру.
Нягледзячы на тое, што Егер гіпербалізуе паводзіны залатой моладзі ў сваіх відэа, сам ён ніколі не жыў бедна: нарадзіўся ў Грэцыі, скончыў прыватную школу ў Бельгіі, пасля чаго вывучаў бізнес у прыватным універсітэце Бостана. Вядома, што яго сям'я валодае нерухомасцю ў Маямі, ды і з 3 мільёнамі падпісантамі ў Instagram і TikTok дакладна бедаваць не будзешь. Апроч блогерскай актыўнасці Арыс Егер з'яўляецца прадстаўніком па развіццю маркетынгавай платформы Lefty, якая дазваляе розным бізнесам знайсці інфлюэнсераў для супрацы.
Іншыя пасты карыстальніка
