Сабаленка сама ўзяла ды спыніла матч супраць украінкі, хаця суддзя сказала гуляць далей – і ніхто нічога ёй не зрабіў

Арына Сабаленка не без цяжкасцяў прайшла ўкраінку Марту Касцюк (WTA 36) у чвэрцьфінале мадрыдскага тысячніка – беларуска перамагала пасля двух тай-брэйкаў 7:6, 7:6. Але матч запомніцца не толькі ўпартай барацьбой, але і скандальнай сітуацыяй.

Падчас тай-брэйка ў другім сэце, пры ліку 5:4 на карысць Касцюк, прыйшла чарга Сабаленкі падаваць. Тая дапусціла памылку пры першай падачы, а затым падышла да суддзі з просьбай закрыць дах – падчас матча пачаўся дождж. Але рэферы з Кітаю Хуан Чжан адмовіла, аргументаваўшы тым, што «ўсё не настолькі дрэнна». Тады Сабаленка вярнулася на корт, нібыта зазбіралася зрабіць другую спробу, але перадумала, пасля чаго пайшла ў месца адпачынку і захуталася ў ручнік – па факце, адмовілася гуляць далей. Але ніякіх санкцый на свой адрас не атрымала – замест гэтага суддзя, як і хацела Сабаленка, прыпыніла матч. Касцюк абуралася, але гэта не дало ніякага плёну.

ВІДЭА

Пасля паўзы Сабаленке далі дзве спробы падаць, але ёй гэта не дапамагла: яна саступіла ў розыгрышу – лік стаў 4:6. Касцюк атрымала шанц забраць сэт, але беларуска здолела перавярнуць падзеі і ў выніку выйграла другі тай-брэйк з лікам 9:7.

Пасля сустрэчы Касцюк традыцыйна адмовілася ціснуць руку беларусцы, а яшчэ падышла да сваёй каманды і сказала: «Пайшло ўсё да д'ябла! Яна ніколі не выйграе прыз за спартыўныя паводзіны. Гэта дакладна!».

Сабаленка пасля гульні казала, што ганарыцца сабой, маўляў, былі цяжкія ўмовы, у якіх перамога залежыць не ад тэнісіста, а выйграць можа любы. Наконт самога эпізоду з прыпыненнем сказала: «Падаваць пад дажджом было немагчыма. Я паспрабавала выканаць першую падачу, але зразумела, што павінна спыніцца, бо вада трапляла ў вочы. Гэта было немагчыма. Я ведала, што зараз зраблю падвойную памылку, і не хацела гэтага дапусціць, таму вырашыла, што гульню трэба спыніць».

Тэніснае камʼюніці ўчынак Сабаленкі не ацаніла. Вось меркаванне журналіста New York Times Крыстафера Клерэя:

Была думка і пра тое, што Сабаленку варта пакараць штрафным пунктам:

Але знайшліся і тыя, хто падтрымаў Сабаленку:

Для Касцюк гэта паражэнне стала асабліва крыўдным. Пасля пачатку вайны ў сябе на Радзіме ўкраінка паслядоўна выступае за адхіленне ад міжнародных спаборніцтваў тэнісістаў з беларускімі і расійскімі пашпартамі. Як вядома, тэнісныя міжнародныя арганізацыі такія заклікі ігнаруюць, таму ўкраінцы выказваюць сваю нязгоду тым, што не ціснуць расіянам і беларусам рукі пасля матчаў. У студзені Касцюк прызнавалася, што не хоча паціскаць рукі тэнісістаў з РФ і Беларусі да канца кар'еры.

Наогул, выглядае на тое, што ў арганізатараў мадрыдскага топ-турніру асаблівае стаўленне да Сабаленкі. 28 красавіка ў Іспаніі і Партугаліі здарыўся блэкаўт – абедзьве краіны ледзь не цалкам аказаліся без святла. Пацярпеў праз гэта і турнір у сталіцы Іспаніі – некаторыя матчы ў той дзень дагульваліся без розных судзейскіх сістэм і электронных табло, а некаторыя гульні былі перанесеныя.

Многіх заўзятараў знікненне святла заспела проста на арэнах. Адным з прысутных у той момант на турніры быў журналіст расійскага Sports.ru Андрэй Васільеў. У рэпартажы ён расказаў, што, каб адцягнуць людзей ад праблем з электрычнасцю, арганізатары вывелі трэнавацца на цэнтральны корт Сабаленку.

Па калідорах комплексу тады хадзіў мужчына з мікрафонам і паведамляў, што на вялікай пляцоўцы можна пабачыць Сабаленку. Людзі накіроўваліся туды, але выявілася, што ўваход на цэнтральны корт – толькі па асобных білетах. У нейкі момант паміж мужчынам з гучнамоўнікам і дзяўчынай-сцюардам адбыўся цікавы дыялог: «Навошта вы ўсіх зазываеце? Мы не можам пусціць». – «Мне так сказала маё кіраўніцтва». – «А маё мне кажа, што пускаем толькі з квіткамі».

У паўфінале Сабаленка згуляла з яшчэ адной украінкай Элінай Світолінай (WTA 17). Суперніца беларускі знаходзілася на серыі з 11 перамог запар, але гэта не дапамагло – лідарка сусветнага рэйтынгу перамагла 6:3, 7:5 (лік у асабістых сустрэчах стаў 5:1 на яе карысць) і выйшла ў фінал, дзе ў суботу сустрэнецца з амерыканкай Коры Гаўф.