Для пазадкаў з прапаганды правялі пацешны турнір з Лукашэнкам і Баскавым – вось хто там быў ад галоўнага спортканала краіны
Дачка Захарава, каментатар-«небарака», аўтар здагадкі, што туалет разумнейшы за яе.
Журналіст – творчая прафесія: факт ці меркаванне трэба падаць так, каб гэта выклікала цікавасць аўдыторыі, ад якой у адэкватных сістэмах залежыць камерцыйны і агульны поспех любога выдання. Беларускія прапагандысты, якія жывуць на дзярждатацыі, патрэбай праяўляць крэатыў не абцяжараныя, затое маюць неабходнасць працаваць фізічна. Напрыклад, іх пасылаюць на суботнікі, дзе трэба працаваць граблямі і рыдлёўкамі.
А днямі для найбольш амаральнай часткі грамадства прыдумалі нават спецыяльны турнір на фізнагрузку – спаборніцтвы па колцы дроў. Тэма для Беларусі актуальная – за дзесяцігоддзі «сацыяльнай палітыкі» былі газіфікаваныя далёка не ўсе населеныя пункты, таму там даводзіцца тапіць печы дровамі, а пра праблемы з іх пакупкай і дастаўкай расказваюць нават дзяржвыданні. Але ў прапагандыстаў праблем не ўзнікла – ім прывезлі выдатны матэрыял для рубкі, а іх палітычны кумір Аляксандр Лукашэнка асабіста паказаў, як «правільна калоць», у суправаджэнні верных паслугачоў, экс-кіраўніка федэрацыі тэніса Сяргея Цяцерына і забаненага ІІХФ на пяць гадоў непрызнанага члена НАК Дзмітрыя Баскава.
Але на спаборніцтвах прысутнічалі і іншыя ўладальнікі звязанага са спортам бэкграўнду – бо былі на турніры і прадстаўнікі прапагандыстаў ад «Беларусь 5». Прычым у сторыс неяк больш засвяціліся прадстаўніцы жаночага полу – вось хто менавіта.
Крысціна Захарава
Дачка шматгадовага трэнера «Юнацтва» і хакейнай зборнай Беларусі Міхаіла Захарава ля пляцоўкі для колкі дроў з'явілася з двума палотнішчамі – дзяржсцягам Беларусі і сцягам БТРК.
Захарава ў дзяцінстве стаяла на каньках – займалася фігурным катаннем, але спартсменкай не стала. На дзяржТБ пачала працаваць яшчэ ў 2015-м, будучы студэнткай. Шмат гадоў яе кар'ера нікуды не рухалася – Крысціна заставалася простым карэспандэнтам, робячы інтэрв'ю і сюжэты. Часцей патрапіць у кадр дапамаглі выбары-2020 – пасля іх на канале не змаглі працаваць па меркаваннях сумлення некалькі топавых вядучых, і ў выніку перастановак следам Захарава стала тварам праграмы «Спорт-цэнтр». У 2022-м яна з'ездзіла на зімовыя АГ ў Пекін, дзе таксама была карэспандэнтам, а ў сацсетках заяўляла, што «кайфуе ад таго, што адбываецца ў жыцці».
Цяпер акаўнт Захаравай у Instagram закрыты, таму мы не можам расказаць пра яе непрацоўнае жыццё. У працоўным жа ўсё па-ранейшаму – хiба што ў жніўні, стаўшы госцяй размоўнай перадачы на канале, яна скардзілася, што ў яе рэдка здараюцца выходныя. У той жа праграме Крысціна сказала, што «ўвайшла ў спартыўны рэжым», і нават паказала некалькі практыкаванняў у спартзале на камеру.
Марыя Багатыр
На спаборніцтвах была недзе побач з Захаравай і таксама трымала сцяг, але, прынамсі, Багатыр бачылі і з чыімсьці інструментам у руцэ, хоць і відавочна па-за конкурсам.
Марыя прыйшла на «Беларусь 5» у 2015-м – але да таго паспела пабываць і на іншых дзяржканалах. У адным інтэрв'ю Багатыр прызнавалася, што для здымкі першага сюжэта схлусіла, што ў яе ўжо быў такі досвед, а прапанову са спортканала атрымала, калі «паслала ў космас думку, што яшчэ якая-небудзь праца не перашкодзіла б».
У сістэме БТРК Багатыр, акрамя стварэння рэпартажаў, адразу стала вядучай – навіны спорту, тэматычныя праграмы («Хакей для ўсіх», «Піт-стоп»), а ўжо год вядзе (на спартыўным канале, так) кулінарнае шоу. У жніўні 2021-га Багатыр адправілася ў Токіа выходзіць у эфір са сваёй першай Алімпіяды – і запомнілася захапленнем ад клазета: «Туалет з падагрэвам! Мне здаецца, гэты туалет разумнейшы за мяне, я сур'ёзна кажу. Сэнсарныя панэлі, некалькі пераключальнiкаў. Захапленне! А яшчэ я ўпершыню ў жыцці бачыла люстэрка, якое не пацее. Магія».
У 2022-м Багатыр свяцілася не толькі на ТБ – напрыклад, была «асістэнтам галоўнага трэнера» ў выставачным жаночым матчы ад ФХБ, апісаўшы сваю ролю як «такая мамка, якая павінна ўсяляць упэўненасць», і вяла цырымонію закрыцця сезона для аматарскага «Шчыта», каманды Дзмітрыя Лукашэнкі. Па працы ж яна не раз ездзіла ў Расію на мясцовыя турніры з беларускімі ўдзельнікамі, а таксама асвятляла вайсковыя гульні – там скасплеіла вядомы мем і слала паветраны пацалунак на фоне прадстаўнікоў расійскай арміі, якая з 24 лютага працягвае вайну ва Украіне з выкарыстаннем тэрыторыі Беларусі.
У Instagram Багатыр у асноўным посціць працу і адпачынак. Бываюць і фота з кветкамі, але большага пра асабістае жыццё няма – вядучая, за плячыма якой ёсць развод, казала, што не бачыць сэнсу рабіць публікацыі на падобныя тэмы.
Дарына Запольская
Яна на турнiры патрапіла не ў кадр – яе голас суправаджаў адно з відэа, на якім дровы калоў адзін з удзельнікаў. Магчыма, на падставе гэтага «Наша Ніва» заявіла, што Запольская каментавала ўвесь турнір, але пацверджанняў гэтаму ў нас няма – магчыма, яна проста ўключыла звыклы рэжым, заўзеючы за калегу па прапагандысцкай машыне.
Запольская таксама трапіла ў дзяржСМІ яшчэ студэнткай – праўда, спачатку гэта была беларускамоўная газета «Звязда». У 2013-м Запольская прайшла на «Беларусь 5» праз кастынг каментатараў, якім і стала, і застаецца да гэтага часу. Таксама Запольская вядзе з моманту стварэння ў 2018-м тэнісную перадачу «Матч-пойнт».
Запольскай з ходу прыйшлося каментаваць усё, куды ставілі (на АГ-2016 далі веласпорт, у якім Дарына не разбіралася). У 2017-м гэта прыцягнула ўвагу Аляксандра Лукашэнкі – ён у цэлым раскрытыкаваў «Беларусь 5» як канал, назваўшы яго «проста ніякім», і дадаў: «Каментатараў нармальных не могуць знайсці. У іх Дарына гэтая, небарака, каментуе ўсе віды: і тэніс, і футбол, і баскетбол, і біятлон… Яна не глыбокі спецыяліст у гэтым плане, але дзякуй Богу, хоць яна нешта робіць».
Але Запольская засталася мультыкаментатарам – так, на АГ-2020 працавала на цырымоніі адкрыцця, тэнісе, настольным тэнісе і некалькіх відах гімнастыкі. Менавіта пад яе голас на канале глядзелі за ўзяццем адзінага для беларускай каманды залатога медаля – праўда, сама Запольская пасля выступу батутыста Івана Літвіновіча запэўніла гледачоў, што гэта пралёт міма ўзнагарод, і ўжо падбадзёрвала спартсмена не здавацца на наступных спаборніцтвах.
У 2022-м Дарына з'ездзіла і на зімовыя АГ ў Кітай, дзе каментавала фігурнае катанне і фрыстайл. А потым стала адной з нямногіх супрацоўніц канцэрна прапаганды, якая пайшла супраць транслiраванага ім наратыву, што Расея нібыта мела права пачаць вайну. Аказалася, што Запольская – сама напалову ўкраінка, а яе дзед напачатку вайны жыў у Чаркаскай вобласці (добра яшчэ, не самым атакаваным рэгіёне, але і туды прыляталі ракеты).
«Мне ўвогуле ўсё роўна, хто мае рацыю, хто вінаваты і чые ракеты лятаюць. Я ведаю адно: яны ўвогуле не павінны лятаць. Як бы гэта не называлася – спецаперацыяй, абаронай ці вайной», – заявіла Запольская 1 сакавіка. Зрэшты, працягваць працаваць на БТРК гэта ёй не перашкаджае – проста без ранейшай лёгкасці на душы, якая была да вайны (рэпрэсіі да суграмадзянаў, відаць, настолькі каментатара не хвалявалі).
