Tribuna/Футбол/Блогі/О духе времени/Кіраўнік АБФФ вачыма тых, хто з ім працаваў: не ўнікае ў нецікавае сабе, хоча быць побач толькі з поспехамі, можа дапамагчы, калі гэта не супраць загаду

Кіраўнік АБФФ вачыма тых, хто з ім працаваў: не ўнікае ў нецікавае сабе, хоча быць побач толькі з поспехамі, можа дапамагчы, калі гэта не супраць загаду

На футболе заўважаны не быў, затое дапамог штангiстам праз хакей.

Аўтар — bytribuna com
29 сакавіка, 10:17
0
Кіраўнік АБФФ вачыма тых, хто з ім працаваў: не ўнікае ў нецікавае сабе, хоча быць побач толькі з поспехамі, можа дапамагчы, калі гэта не супраць загаду

З 22 сакавіка ў АБФФ новы старшыня – экс-памочнік Лукашэнкі, шматгадовы работнік сельскай гаспадаркі Мікалай Шарснёў. У сваіх перадвыбарных прамовах ён даволі падрабязна расказваў пра сябе і свае погляды, але сваімі прамовамі не ўразіў тых, з кім камунікаваў асабіста.

Удзельнік канферэнцыі АБФФ: «У тых, каго Шарснёў знаёміў са сваёй праграмай, склалася меркаванне, што лепш бы пакінулі Базанава»

Пакуль жа «Трыбуна» знайшла людзей, якія ўжо перасякаліся з новым босам АБФФ да яго новага этапу кар'еры. Яны падзяліліся сваімі ўражаннямі і выказалi меркаванне, што ён можа даць беларускаму футболу.

– Мне давялося перасякацца з ім як з начальнікам. Дакладна памятаю, што ў многія пытанні, якія не ўваходзілі ў яго кампетэнцыю, ён асабліва не ўнікаў. Шарснёў аддаваў перавагу перанакіраваць рашэнне нейкаму профільнаму намеснiку, а не разбірацца самому і даведвацца нешта новае, – распавядае адзін з нашых суразмоўцаў.

Сем гадоў, з 2014-га па 2021-ы, Шарснёў прабыў старшынёй выканкама рэжыму Лукашэнкі па Віцебскай вобласці. Як там былі справы са спортам у гэты час?

– Акрамя гір, дзе Шарснёў атрымаў поспех, нічога і не развівалася. Ён ні разу не быў заўважаны ні на футболе, ні на хакеі, ні на іншых спаборніцтвах. Можна сказаць, што яму не было цікава. Затое, памятаю, неяк прыехаў у Оршу і загадаў у лядовым палацы пабудаваць залу для цяжкай атлетыкі. Толькі грошы з бюджэту не выдаткавалі. Наколькі памятаю, тады залу зрабілі за кошт мясцовага хакейнага клуба «Лакаматыў» – загад ёсць загад, тым больш ад такога начальніка, – кажа крыніца «Трыбуны».

Пры гэтым, па словах нашых суразмоўцаў, перыядычна Шарснёў рабіў і нешта карыснае. Хаця, адзначым, пры iм Віцебская вобласць заставалася адной з самых бедных у Беларусі.

– Больш увагі ён надаваў развіццю эканомікі, дарогам, прадпрыемствам. Дакладна памятаю, што пры ім у рэгіёне развіваліся вельмі многія дзяржаўныя і прыватныя прадпрыемствы, нейкія нават ствараліся з нуля. І ён умеў знайсці грошы на іх развіццё, умеў пераконваць, каб [міністры Лукашэнкі] уключалі прадпрыемствы ў інвестыцыйныя планы, каб выдзялялі грошы з дзяржбюджэту. А для ў такой сферы для кіраўніка гэта вельмі добрае ўменне, – успамінае адзін з суразмоўцаў.

У цэлым жа партрэт малюецца просты – тыповы чыноўнік рэжыму Лукашэнкі.

– Ён чалавек сістэмы і будзе падпарадкоўвацца рэжыму да канца. Як загадваюць «зверху», так ён і робіць, нават калі ён з нечым не згодны. Ён чыноўнік у пятым калене, ведае ўсе шаблоны сваёй працы – і калі ёсць загад, кроку ў бок не зробіць. Калі яму дазволена самому прыняць рашэнне, ён можа адысці ад шаблону, але ў тыя часы, калі я з ім перасякаўся, такое здаралася вельмі-вельмі рэдка. У асноўным – выкананне загадаў пры жаданні выслужыцца, – успамінае адзін з функцыянераў.

Такі тыповы чыноўнік гатовы кіраваць у любой сферы, куды яго вылучыць рэжым, што і пацвярджаюць нашыя суразмоўцы.

– Сельская гаспадарка або гіры – вось гэта яго. Астатняе – не. Але працаваць ён гатовы ўсюды, дзе яму скажуць. Пры гэтым ён не жадае ўнікаць у тое, што яму нецікава. Тым, у чым не разбіраецца, займаюцца ягоныя падначаленыя, якія нешта разумеюць. З-за гэтага я б яго ахарактарызаваў як не надта разумнага начальніка, – кажа яшчэ адзін наш суразмоўца.

І, вядома, як водзіцца ў сістэме, Шарснёў хоча асацыявацца толькі з поспехамі.

– Напрыклад, Шарснёву на стол кладуць паперу з прапановамі па развіцці сферы, у якой ён нічога не разумее. Ён перадае падначаленым, каб яму разжавалі. Яны кажуць, што гэта сапраўды трэба і не патрабуе вялікіх укладанняў – акей, ён падпіша дакумент, дасць дабро. Спрацуюць прапановы – Шарснёў адразу дае зразумець, што гэта яго заслуга: накіраваў сваёй рукой на правільны шлях. Не спрацуюць – будзе вінаваты хто заўгодна, але толькі не Шарснёў, – успамінае функцыянер з былога атачэння цяперашняга кіраўніка АБФФ.

Пры гэтым, як кажуць нашыя суразмоўцы, Шарснёў не адрозніваецца яшчэ адной тыповай рысай рэжымнага чыноўніка – крыважэрнасцю. Тыя, каго ён вінаваціў у няўдачах, часцей за ўсё абыходзіліся публічным разносам, пасля чаго заставаліся на сваіх месцах без наступстваў.

Пасля выбараў у жніўні 2020 года ў Віцебску, як і па ўсёй Беларусі, тысячы людзей выйшлі на мірныя пратэсты, але іх задушылі гвалтам носьбіты формы Лукашэнкі. Шарснёў у той сітуацыі застаўся з рэжымам, але пры гэтым не гнаў сілавікоў наперад.

– Шарснёў, можна сказаць, трымаўся крыху ўбаку пры пратэстах. Магу дакладна сказаць, што ён ніякага дачынення да жорсткіх затрыманняў людзей не меў. Нават калі на будынак ягонага выканкаму павесілі БЧБ-сцяг, ён не аддаваў загад тэрмінова знайсці і пакараць тых, хто гэта зрабіў. Увогуле, стараўся захаваць нейтралітэт, – дзеліцца адзін з тых, хто знаёмы са станам спраў у апараце Шарснёва ў 2020-м.

Мы таксама папрасілі распавесці пра чалавечыя якасці Шарснёва. Як аказалася, калі справа не тычыцца загадаў «зверху», то новы кіраўнік АБФФ умее спачуваць.

– Не магу сказаць чагосьці негатыўнага пра Шарснёва з чалавечага боку і ніколі не чуў такога ад іншых. Бывала, што ён уваходзіў у становішча чалавека. Калі камусьці трэба было ў нечым дапамагчы па асабістых ці фінансавых прычынах, ён мог выслухаць і дапамагчы. Але калі загадвалі «зверху» выконваць пэўным чынам, гэта было важней, – успамінае адзін з нашых суразмоўцаў.

Абагульняючы свае ўражанні пра Шарснёва, нашы суразмоўцы кажуць, што нічога глабальнага ў футболе ад яго чакаць не даводзіцца.

– Ён не ўнікаў раней у тое, што яму не было цікава, не будзе і цяпер. Будуць загады «зверху» – будзе выконваць, гэта абсалютна дакладна. Без загадаў, думаю, будзе проста падганяць футбол пад нейкае сваё бачанне. Зрэшты, на ранейшых месцах працы ён умеў падбіраць сабе ў асяроддзе тых, хто разумеў у патрэбнай сферы, каб у ёй было на каго абапірацца. Паглядзім, ці будзе так у АБФФ, – падсумоўвае адна з нашых крыніц.

Фота: vitebsk-region.gov.by, viciebsk.cc

Іншыя пасты блога