Ганчарэнка два месяцы без паражэнняў у Расіі – цяпер зрабіў былых і выйшаў у плэй-оф Кубка (там нестандартная сетка)

15 тысяч гледачоў у -10.

Ганчарэнка два месяцы без паражэнняў у Расіі – цяпер зрабіў былых і выйшаў у плэй-оф Кубка (там нестандартная сетка)

«Урал» Віктара Ганчарэнкі працягвае серыю без паражэнняў ва ўсіх турнірах. Беларускi трэнер прыняў каманду пасля пятага тура РПЛ з адным ачком на рахунку і пачаў працу не супер (дзве перамогі і пяць паражэнняў у першых сямі матчах), але пасля пройгрышу 17 верасня «Ахмату» «Урал» стаў грознай сілай – атрымаў шэсць перамог запар і толькі пару разоў збіўся на нічыi.

У аўторак екацярынбуржцы працягнулі серыю да дзесяці матчаў і паралельна выйшлі ў плэй-оф Кубка Расіі. У пятым туры групавога этапу (так, у КР такі ёсць) Ганчарэнка супрацьстаяў сваёй былой камандзе, ЦСКА, які ўзначальваў са снежня 2016-га па сакавік 2021-га. За гэты час масквічы двойчы бралі срэбра РПЛ, а ў 2018-м перамаглі ў Суперкубку. Пасля растання з Ганчарэнкам вынікі ЦСКА глабальна не змяніліся – каманда працягвае фінішаваць побач з п'едэсталам і ўжо некалькі гадоў не гуляе ў еўракубках. Да 16-га тура цяперашняга чэмпіянату ЦСКА ішоў у тройцы лідараў, але дзве паразы ў апошніх матчах чэмпіянату адкінулі масквічоў на пяты радок.

Шэраг няўдач сталічнага клуба працягнуўся ў Екацярынбургу. Асноўны час матча завяршыўся без забітых мячоў, і па рэгламенце турніру каманды перайшлі да серыі пенальці, дзе больш паспяхова апынуліся футбалісты «Урала». Першую спробу ЦСКА запароў абаронца Мойзес, які трапіў у штангу. У выніку ў канцы серыі з пяці ўдараў для перамогі екацярнібуржцаў заставалася, каб забіў Яўген Татарынаў. Аднак рэзервіст каманды Ганчарэнкі прамахнуўся.

ВIДЭА

Аднак гэта аказалася некрытычным. Варатар «Урала» Ілья Памазун зрабіў сэйв удару Мікіты Ермакова, а Сільвіе Бегіч ужо не прамахнуўся і прынёс перамогу камандзе Ганчарэнкі. На стадыёне заўзелi за гэта цэлых 15 тысяч чалавек – хоць матч пачынаўся ў 17:00 будня, а на вуліцы было -10.

ВIДЭА

Ганчарэнка не глядзеў на самі ўдары.

А перамозе стрымана парадаваўся ў коле калег з яшчэ адным беларускім коўчам – сваім памочнікам Аляксандрам Ермаковічам.

Перамога па 11-метровых прынесла камандзе Ганчарэнкі два ачкі, якія гарантавалі выхад у плей-оф. Пакінуты матч квартэта супраць маскоўскага «Тарпеда», які запланаваны на 26 лістапада, стане для «Урала» простай фармальнасцю. На гэтым для Ганчарэнкі і яго падапечных восеньская частка сезона падыдзе да канца. На зімовы перапынак у РПЛ каманда пайшла на дзясятым месцы.

Што тычыцца таго, у якую менавіта стадыю выйшаў «Урал», то ў Кубка Расіі з цяперашняга сезону, як у кіберспорце, дзве сеткі плэй-оф – верхняя і ніжняя. Каманда Ганчарэнкі па «шляху РПЛ» выйшла ў чвэрцьфінал «верхняй сеткі». Гэта значыць, што нават у выпадку паражэння там «Урал» не вылеціць з Кубка наогул, а трапіць у чвэрцьфінал ніжняй сеткі. А вось у выпадку няўдачы і там каманда ўсё ж такі пакіне турнір.

Іншыя пасты блога