Падарунак на юбілей. Аргенціна ў 1000-м матчы Месі ў кар'еры адолела Аўстралію
Леа забіў і цяпер у чвэрцьфінале ЧС.
У адрозненне ад багатага на атакі і ўдары матча паміж Нідэрландамі і ЗША, іншае сённяшняе супрацьстаянне 1/8 фіналу ЧС-2022 Аргенціна – Аўстралія запрапанавала гледачам не так шмат вастрыні.
Паказальны факт – большую частку матча лік па паказніку xG у суме не перавышаў і адзінкі (на 80-й хвіліне ён складаў 0.41 – 0.21 на карысць аргенцінцаў). Пры гэтым нават у такіх умовах каманды выціснулі з момантаў максімум, калі не больш.
Першы тайм быў за падапечнымі Скалоні. Усё дзякуючы голу лідара аргенцінцаў Месі на 35-й хвіліне.
(відэа дададзім пазней)
Для Леа мяч стаў важным не толькі з-за перамогі яго каманды ў канцоўцы, але і праз юбілейны для яго статус гульні – гэта быў 1000-ы матч у кар'еры аргенцінца. А яшчэ гэта быў першы гол Месі ў плэй-оф чэмпіянатаў свету.
Ужо пасля перапынку Аргенціна падвоіла перавагу – Альварэс скарыстаўся ляпам аўстралійскага галкіпера Мэцью Раяна.
Аднак Аўстралія не здалася без бою. У няпростай гульні з прэтэндэнтам на чэмпіёнства камандзе Грэма Арнольда ўдалося паразіць вароты саперніка, хаця для гэтага не давялося прабіваць у створ яго варот самастойна. Проста адбыўся не гол, а аўтагол героя папярэдняга матча Энца Фернандэса.
Агляд матча дададзім пазней
Мінімальнае адставанне ў ліку пад канец сустрэчы ажывіла яе ход, але аргенцінцы давялі справу да канца. Цяпер іх чакае чвэрцьфінал і супрацьстаянне з Нідэрландамі.
А Аўстралія можа вярнуцца дадому з пачуццём добра выкананай працы. Большага ад гэтай каманды ніхто і не чакаў на турніры.
Фота: Li Ga/Global Look Press