Італьянскі футбол на ўздыме: 6 з 7 клубаў выйшлі ў чвэрцьфіналы, у ЛЧ такога поспеху не было з часоў Шаўчэнкі

Нечаканае адкрыццё гэтага сезона еўракубкаў – італьянскія клубы. У апошнія гады яны ўжо прызвычаілі гледачоў, якія не хапаюць зорак з нябёсаў. Аднак сёлета ўсё інакш – адразу шэсць (!) клубаў будуць прадстаўляць Італію ў чвэрцьфіналах: «Напалі», «Інтэр» і «Мілан» у Лізе чемпіёнаў, «Ювентус» і «Рома» – у Лізе Еўропы, «Фіярэнціна» – у Лізе канферэнцый. Толькі «Лацыа» не ўдалося падтрымаць флэшмоб.

Найцікавейшыя факты пра гістарычны сезон:

🔹Тры італьянскія клубы выйшлі ў чвэрцьфінал ЛЧ упершыню за 17 гадоў. У апошні раз такое здарылася ў сезоне 2005/06 – тады гэта былі «Ювентус», «Інтэр» і «Мілан», за які свой апошні сезон перад трансферам у «Чэлсі» праводзіў Андрэй Шаўчэнка.

🔹«Напалі», «Інтэр» і «Мілан» у 1/8 ЛЧ сумарна не прапусцілі ніводнага гола. Камандзе Сімонэ Індзагі прыйшлося добра пастарацца: «Порту» нанёс 21 удар па варотах Андрэ Анана і нагуляў на xG 1.87, тады як «нерадзуры» – толькі 11 удараў з агульным xG 0.5.

Усяго італьянскія каманды ў 1/8 фіналу прапусцілі 5 галоў. Чатыры з іх на сумленні «Лацыа», які вылецеў з Лігі канферэнцый ад нідэрландскага АЗ, яшчэ адзін «Сіваспор» прымудрыўся забіць «Фіярэнціне».

🔹Толькі адну з шасці італьянскіх каманд-чвэрцьфіналістак трэніруе не італьянец – гэта «Рома» партугальца Жазэ Маўрынью.

Італьянскі футбол кампенсуе гэта тым, што «Рэал» трэніруе Карла Анчалоці. Роўна палова трэнераў, 4, у ЛЧ зараз прадстаўляюць гэтую краіну – упершыню ў гісторыі.

🔹«Напалі» выйшаў у чвэрцьфінал ЛЧ упершыню ў гісторыі, «Мілан» – упершыню з сезона 2011/12, «Інтэр» – упершыню з сезона 2010/11.

«Фіярэнціна» не гуляла ў чвэрцьфіналах еўракубкаў з сезона 2014/15, «Ювентус» – з сезона 2018/19.

🔹 Толькі «Рома» выходзіць у чвэрцьфінал еўракубкаў трэці сезон запар: да гэтага гэта былі ЛЕ ў сезоне 2020/21 і ЛК у сезоне 2021/22, які каманда ў выніку выйграла.

🔹У апошні раз шэсць каманд прадстаўлялі Італію ў еўракубках на гэтай стадыі ў сезоне 1998/99. Гэта былі «Ювентус» і «Інтэр» у ЛЧ, «Парма», «Балоння» і «Рома» ў Кубку УЕФА, а таксама «Лацыа» ў Кубку ўладальнікаў кубкаў. Аднак быў і больш высокі паказчык – сем каманд у сезоне 1990/91: «Мілан» у тады яшчэ Кубку еўрапейскіх чэмпіёнаў, «Інтэр», «Рома», «Балоння» і «Аталанта» у Кубку УЕФА, «Ювентус» і «Сампдорыя» (як уладальнікі трафея) у Кубку ўладальнікаў кубкаў.

У абодвух выпадках Італія выйгравала еўракубкі: у сезоне 1998/99 «Парма» выйграла КУЕФА і «Лацыа» – КУК, у сезоне 1990/91 «Інтэр» выйграў фінал КУЕФА ў «Ромы».

🔹У апошні раз шэсць клубаў прадстаўлялі адну краіну ў 1/4 еўракубкаў у сезоне 2015/16. Тады «Рэал», «Барселона» і «Атлетыка» гулялі ў ЛЧ, «Вільярэал», «Севілля» і «Атлетык» – у ЛЕ.

У выніку «Рэал» выйграў фінал ЛЧ супраць «Атлетыка», а «Севілля» выйграла Лігу Еўропы.

Фота: Global Look Press