Шаўчэнка з пласцінамі на твары, апёкі Дзіды і адно з самых вядомых фота ў гісторыі футбола – гэта было апошняе міланскае дэрбі ў Лізе чэмпіёнаў

Як толькі стала вядома, што «Мілан» і «Інтэр» змогуць сустрэцца ў паўфінале Лігі чэмпіёнаў, заўзятары адразу пачалі лавіць магутныя ўспаміны пачатку 2000-х. У той час міланскае дэрбі ў плэй-оф Лігі чэмпіёнаў адбывалася двойчы: у сезоне-2002/03 каманды згулялі ў паўфінале, а ў сезоне-2004/05 сустрэліся ў чвэрцьфінале. Гэта была апошняя дуэль, якая ўвайшла ў гісторыю як велічнае супрацьстаянне «Дэрбі дэла Мадоніна» на пякельным «Сан-Сіра». З таго часу прайшло 18 гадоў.

Той сезон стаў адным з апошніх для прыгожай італьянскай эпохі. Праз год Серыя А будзе пакрыта Кальчаполі, нібы попелам Везувія. «Ювентус» выйграў чэмпіянат, але пасля абвінавачванняў у подкупе суддзяў скудэта ў турынцаў адабралі. «Мілан» фінішаваў другім, а «расанеры» таксама былі ўцягнутыя ў скандал, таму гэты сезон па-ранейшаму афіцыйна не мае пераможцаў.

Галоўнай ударнай сілай «міланістаў» на працягу ўсяго розыгрышу Лігі чэмпіёнаў быў уладальнік «Залатога мяча» Андрэй Шаўчэнка, які забіў шэсць мячоў. Яшчэ адзін гол забіў форвард «Інтэра» Адрыяна. Абедзве каманды ўпэўнена прайшлі групавы этап, а «Мілан» апярэдзіў «Барселону» і данецкі «Шахцёр».

Перад лёсаваннем чвэрцьфінальных пар Адрыяна Галіяні гаварыў, што найбольш не хоча гуляць супраць «Інтэра», таму што для тых, хто жыве ў Мілане, гэта будзе сапраўдным пеклам. Тыдзень дэрбі ў 2003-м запомніўся яму як адзін з найгоршых па напружанасці. Прэзідэнт «Інтэра» Мараці, наадварот, чакаў рэваншу: «Паўфінал 2003 года застаўся ў нашай памяці. Цяпер у нас ёсць магчымасць перамагчы і забыцца на гэта».

Перад пачаткам плэй-оф Шаўчэнка зламаў скулу. Усё магло быць вельмі сур'ёзна

Шаўчэнка якраз перад пачаткам найважнейшага адрэзка сезона атрымаў сваю самую страшную траўму. 19 лютага ў матчы супраць «Кальяры» Шэва сутыкнуўся галовамі з абаронцам суперніка. Украінскі форвард атрымаў пералом скулы, а лекары казалі, што калі б удар адбыўся хоць на сантыметр вышэй, то вынікі маглі б быць фатальнымі для здароўя. Відэа сустыкнення можна зірнуць тут.

Андрэй перанёс аперацыю, якую яму зрабілі адразу ж у Мілане. У гэта цяжка паверыць, але на тое, каб вярнуцца на поле, яму спатрэбілася ўсяго два тыдні. Без Шэвы «Мілан» двойчы перамог «МЮ», але матчы супраць «Інтэра» бамбардзір не мог прапусціць.

«Мне давялося гуляць той матч з пяццю металічнымі пласцінамі у скуле. У тунэлі перад выхадам на поле Марка Матэрацы расказваў непрыемныя рэчы, што можа здарыцца з маім тварам, а я ў адказ толькі ўсміхаўся яму. Гэта не праз тое, што я фанабэрысты, а таму, што ведаў – ён не такі ў рэальным жыцці. Мы ўсе – частка шоў, а Марка павінен быў сыграць сваю ролю», – згадваў праз шмат гадоў форвард.

Абаронца «Інтэра» таксама прыгадваў той эпізод: «Так, я выкарыстоўваў жорсткія прыёмы і мог нанесці яму траўмы, але ні пра што не шкадую. Калі Шаўчэнка выходзіў на поле са сталёвымі пласцінамі ў сківіцы, я сказаў яму, што з ім здарыцца нешта паганае. А ён рассмяяўся мне ў твар, ён такі ж змагар, як і я». Марка любіў паўтараць, што ахвяраваў бы ныркай дзеля перамогі ў дэрбі, але ў першым матчы Раберта Манчыні вырашыў выпусціць на поле Івана Кардобу і Сінішу Міхайлавіча.

Шаўчэнка адказаў Матэтарцы ў сваім стылі – адзначыўся каля брамы Тольда, забіўшы галавою пасля пасу Кафу. Украінец праводзіў паядынак без спецыяльнай абарончай маскі, якую выкарыстоўваюць у такіх выпадках, а перад матчам з ім працавалі псіхолагі. Яшчэ ў першым таймі, таксама галавой, вызначыўся Яп Стам, а «расанеры» свой хатні выйгралі 2:0.

У «Інтэра» таксама было шмат момантаў: Міхайлавіч біў са штрафной, забівалі Круз і Верон, але камандзе вельмі не хапала траўмаванага лідэра атак Адрыяна. Марцінс і Віеры так і не змаглі прабіць Дзіду.

Фанаты «Інтэра» сарвалі матч і ледзь не пакалечылі Дзіду

У матчы ў адказ Манчыні ўжо мог разлічваць на Адрыяна, але на світанку трэнерскай кар'еры Раберта быў занадта імпульсіўны і лёгка сварыўся з гульцамі. Перад другім паядынкам на «Сан-Сіра» трэнер быў у супрацьстаянні з Давідсам, Эмрэ, Рэкаба, Зе Марыяй, Матэрацы і Адрыяна. Гэта відавочна не шло на карысць камандзе, якой трэба было адыгрываць два галы.

Карла Анчалоці праз перабор картак не змог згуляць Гатуза, але нават з Амбразіні каманда была супер магутнай.

З'яўленне Адрыяна не вельмі дапамагло «Інтэру»: ён быў не гатовы, таму ўжо на 50-й хвіліне яго замянілі. А ў першым тайме Шаўчэнка забіў выдатны мяч у браму Тольда, чым дэ-факта забіў інтрыгу ў супрацьстаянні. Гаспадарам трэба было забіваць ужо аж чатыры мячы.

На 71-й хвіліне пасля вуглавога ад Міхайлавіча Эстэбан Камб'яса атрымаў адзін гол, але арбітр Маркус Мерк яго адмяніў. Яго каманда ўбачыла фол Круза супраць Дзіда. Усё, што было далей, выглядала як партал у пекла.

Фанаты «Інтэра» пачалі закідваць поле петардамі. Некаторыя ляцелі прама ў футбалістаў, больш за ўсіх дасталася бразільскаму галкіперу Дзідзе. Гулец атрымаў апёкі, а нямецкі арбітр прыняў рашэнне прыпыніць матч.

Праз 25 хвілін матч аднавіўся, замест Дзіды з'явіўся Аб'яці, але ўсяго 30 секунд хапіла, каб зразумець, што гуляць далей будзе памылкай. Фанаты «Інтэра» не думалі спыняцца, таму матч быў спынілі, а гаспадарам прысудзілі тэхнічнае паражэнне 0:3.

Прыкладна ў гэты час італьянскі фатограф Стэфана Рэлландзіні намагаўся зрабіць здымак, на якім б знаходзіліся гульцы абодвух каманд, з фокусам на дым. Матэрацы і Руй Кошта стаялі побач, у нейкі момант абаронца «нерадзуры» паклаў локаць на плячо партугальца. Гэта доўжылася ўсяго некалькі секунд, але гэтага хапіла фатографу, каб зрабіць адзін з самых вядомых здымкаў у гісторыі Лігі чэмпіёнаў.

У выніку «Інтэр» дыскваліфікаваны на чатыры хатнія матчы і выпісалі штраф у 300 тысяч швейцарскіх франкаў. Для многіх гэта падалося даволі мяккім пакараннем, бо за некалькі гадоў да гэтага фанаты «нерадзуры» ужо хуліганілі на матчы супраць «Алавеса» у Кубку УЕФА. У кваліфікацыі наступнай Лігі чэмпіёнаў «Інтэр» прымаў данецкі «Шахцёр» пры пустых трыбунах, але «гарнякам» гэта не вельмі дапамагло. У Данецку прайгралі 0:2, а ў Мілане згулялі 1:1.

«Мілан» пасля перамогі над «Інтэрам» сустракаўся ў паўфінале з «ПСВ» Гуса Хідынка. Італьянцы не без праблем прайшлі далей, каб у Стамбуле згуляць той самы фінал з «Ліверпулем».

Сёлета наперадзе зноў Стамбул, але пакуль невядома, хто з міланскіх грандаў будзе там.

Фота: talkSPORT Milan Posts, B/R Football