Футбалісту «маладзёжкі» Беларусі няма чым пахваліцца ў Партугаліі: 7 матчаў за паўсезона, хайлайт – выдаленне ў дэбюце, каманда на дне Д3
На дапамогу паклікалі чэмпіёна з Брэста.
У новым скліканні маладзёжнай зборнай Беларусі толькі тры футбалісты выступаюць не на Радзіме – Арцём Шуманскі з'ехаў у кіпрскі «Арыс» зусім нядаўна, Ілля Маскаленчык перайшоў у сістэму расійскага «Зеніта» (гуляе за другую каманду клуба ў Д3) у сакавіку 2022-га. Даўжэй за калег за мяжой гуляе 19-гадовы паўабаронца Кірыл Зіновіч – з'ехаў яшчэ ўлетку 2021-га, калі змяніў «Мiнск» на маскоўскі «Лакаматыў». Расіяне заплацілі за яго тады каля 200 тысяч еўра.
За першую каманду «чыгуначнікаў» апорнік згуляў усяго пяць матчаў, часцей выступаючы за фарм-клуб з трэцяга расійскага дывізіёна, а 1 верасня 2022-га нечакана паехаў у Партугалію, падпісаўшы трохгадовы кантракт з «Віторыяй» Гімараэш.
Праўда, пакуль на Кірыла разлічваюць выключна як на гульца другой каманды, якая выступае ў партугальскім Д3. Ды і з моманту трансферу Зіновіч паўдзельнічаў толькі ў сямі матчах – і толькі адзін пачынаў у стартавым складзе. Праблема ў тым, што ўсе сем разоў каманда прайграла. За 241 хвіліну, што беларускі хаўбек знаходзіўся на полі, «Віторыя Б» не змагла забіць ніводнага мяча, пры гэтым прапусціла шэсць (але абвінаваціць гульца ў нейкім з iх складана). Цяпер у «Віторыі Б» працягваецца васьміматчавая серыя паражэнняў, а ўвогуле набрана толькі 4 ачкі ў 13 сустрэчах. З такой статыстыкай каманда ідзе на апошнім месцы сваёй падгрупы Д3, прычым адставанне ад перадапошняга ўжо складае шэсць балаў.
Што тычыцца Зіновіча, галоўнае, чым ён пакуль адзначыўся, – ужо ў дэбютным паядынку супраць «Сан-Жуан-дэ-Вер» 22 кастрычніка атрымаў выдаленне, на што яму спатрэбілася ўсяго паўгадзіны. Выйшаўшы на замену адразу пасля перапынку, Кірыл ужо праз 10 хвілін зарабіў першую жоўтую картку за грубы падкат прамой нагой. Сапернікі патрабавалі ад арбітра выдаліць беларускага гульца ўжо тады.
Чырвоная здарылася на 76-й хвіліне, калі Зіновіч прайграў барацьбу ў цэнтры поля і схапіў суперніка рукамі – суддзя тут жа адрэагаваў свістком і другой жоўтай.
Сумарна за «Віторыю Б» Зіновіч нанёс тры ўдары па варотах супернікаў (усе ў матчы супраць «Санжааненсе», калі правёў на полі 90 хвілін), аднойчы трапіўшы ў створ. У сярэднім на 90 хвілін ён адзін раз ідзе ў абводку (пакуль без няўдач), уступае ў 17 адзінаборстваў (59% паспяховых) і аддае 53 перадачы (85% дакладных), а таксама здзяйсняе 7 перахопаў. Аднак Кірыл у пераліку на адну поўную гульню амаль 9 разоў губляе мяч, прычым у 40% выпадкаў – на сваёй палове поля.
Магчыма, камандзе Зіновіча дапаможа гуляць лепш навічок – зусім нядаўна быў падпісаны чэмпіён Беларусі-2019 у складзе брэсцкага «Дынама» Дэніш Дуартэ. Ён у Брэсце выступаў два гады і згуляў за «бела-сініх» 35 матчаў (3 галы), а пераехаў у Беларусь летам 2018-га якраз з «Віторыі Б», дзе правёў больш за тры гады. Апошняй жа камандай партугальца была «Томь» з расійскага Д2, якую ён пакінуў у траўні 2022-га. Пасля гэтага хадзілі чуткі, што ён можа ўз'яднацца з экс-трэнерам брастчан Марцалам Лічкам у «Арэнбургу», але да трансферу справа так і не дайшла.
