Бэйл завяршыў кар'еру: апошні хет-трык – у вароты зборнай Беларусі, фінт тлумачыў гулец «Макслайна», на змену расце Лісаковіч
Яшчэ мог запомніць Карніленку.
Пяціразовы пераможца Лігі чэмпіёнаў і трохразовы чэмпіён Іспаніі Гарэт Бэйл аб'явіў пра завяршэнне кар'еры. Апошнія паўгода 33-гадовы вінгер правёў у Амерыцы, дзе дапамог «Лос-Анджэлесу» выйграць Кубак MLS, а ў канцы 2022-га ў якасці капітана павёз зборную Ўэльса на чэмпіянат свету ў Катары, але там было не вельмі ўдала: каманда набрала ўсяго адно ачко ў групавым раундзе і фінішавала апошняй у квартэце (адзіны гол «драконаў» забіў Гарэт).
Перасячэнняў паміж Бэйлам і белфутболам за ўсю яго кар'еру было не так ужо і шмат: паўабаронца тройчы гуляў супраць каманд з нашай краіны, і ўсе тры разы за зборную - распавядаем пра самы яркі з іх.
Апошні ў кар'еры хет-трык - у вароты зборнай Беларусі
Першая сустрэча зборных Беларусі і Уэльса з удзелам Бэйла здарылася ў 2019-м: тады яшчэ каманда Міхаіла Мархеля правяла з брытанцамі таварыскі матч у Кардыфе. Гарэт з'явіўся на полі ў пачатку другога тайма, але галявымі дзеяннямі не вызначыўся - адзіны гол у тым паядынку быў забіты яшчэ ў першым тайме. Сустрэча са знакамітым футбалістам уразіла галкіпера Максіма Плотнікава, які толькі дэбютаваў за «нацыяналку»:
- Я іду па калідоры, а мне насустрач ідзе Бэйл, у галаве тады нешта неверагоднае рабілася: маўляў, я, просты хлопец з Пінска, зараз буду гуляць супраць гульца мадрыдскага «Рэала» - проста словамі нават не апісаць гэта, - успамінаў Плотнікаў .
Другая сустрэча адбылася праз два гады ў кваліфікацыі да ЧС-2022 і прайшла пры пустых трыбунах у Казані. Пасля пасадкі самалёта з журналістам Раманам Пратасевічам у Мінску ў маі 2021-га вялікага футбола ў Беларусі амаль не засталося. Расія яшчэ толькі рыхтавалася да вайны.
Уэльс ужо ў самым пачатку сустрэчы пацвердзіў статус фаварыта: пасля мяккага закіду ў штрафную беларусаў Бэйл паспрабаваў пракінуць мяч міма Сяргея Чэрніка - і тут жа быў збіты: суддзя паказаў на «кропку», а Гарэт з яе не прамахнуўся.
Аднак да канца першага тайма каманда Георгія Кандрацьева нечакана забрала ініцыятыву, што вылілася ў два забітыя мячы (пастараліся Віталій Лісаковіч і Павел Сядзько). Яшчэ два добрыя моманты не былі рэалізаваныя - на перапынак беларусы пайшлі, ведучы ў ліку 2:1.
Але ўтрымаць перавагу нашы суайчыннікі так і не змаглі: перш брытанцы зарабілі яшчэ адзін пенальці - Бэйл зноў быў дакладны.
А ўжо на 93-й хвіліне супернік вырваў перамогу: не самы моцны ўдар капітана «драконаў» праз памылку Чэрніка ператварыўся ў хет-трык Гарэта.
Гэты хет-трык стаў апошнім у кар'еры валійца. Да таго тры мячы ў адным матчы ён забіваў за зборную толькі ў таварыскім матчы зборнай Кітая, а таксама шэсць разоў (плюс адзін покер) рабіў гэта на клубным узроўні.
Пасля гульні зорны футбаліст гасцей скардзіўся на тое, што поле ў Казані не было гатовае да матчу (паводле яго слоў, яно "было вельмі мяккім і сухім") і выказаў меркаванне, што гэта згуляла на руку беларусаў. Георгій Кандрацьеў яму адказаў тым, што поле і не варта было паліваць, бо ў горадзе за тры дні да гульні ішлі дажджы.
У матчы ў адказ Уэльс не пакінуў Беларусі ніводнага шанцу - разгром 5:1, у якім Бэйл паўдзельнічаў куды больш пасіўна: галявая перадача пры адным тайме на полі.
Намеснік старшыні АБФФ параўноўваў з Бэйлам лідара зборнай Беларусі
Пасля той самай гульні ў Казані кампліментамі на адрас трэнера і каманды сыпаў партнёр Кандрацьева па «Дынама-82», а цяпер намеснік старшыні АБФФ Міхаіл Вергеенка. А на пытанне пра галявыя подзвігах Бэйла адрэагаваў нечакана.
- Бэйл аформіў хет-трык? У нас [Віталь] Лісаковіч расце, таксама можа вырасці ў такога Бэйла, калі будзе працаваць над сабой і будзе слухаць тое, што яму гавораць у камандзе, - сказаў Вергеенка.
Праўда, пакуль "вырасці ў Бэйла" ў Віталія ўсё ніяк не атрымаецца: 24-гадовы форвард у гэтым сезоне выступае ў другім расійскім дывізіёне ў складзе "Рубіна" - за 24-гадовага Бэйла амаль дзесяць гадоў таму мадрыдскі "Рэал" выклаў 100 мільёнаў еўра "Тотэнхэму".
Даставалася ад Карніленкі ў АПЛ
Яшчэ некалькі разоў Гарэт сустракаўся з беларусамі ў клубных паядынках: да прыкладу, у сезоне-2007/08 забіў са штрафнога «Арсеналу» з Аляксандрам Глебам у складзе. Але, верагодней, больш шанцаў, што ён запомніў сустрэчу з форвардам «Блэкпула» Сяргеем Карніленкам у канцы сезону-2010/11. На зыходзе першага тайма лонданскага матча ўраджэнец Віцебска пайшоў у падкат на фланзе, але да мяча так і не дацягнуўся. Затое 21-гадоваму вінгеру «Тотэнхэма» моцна дасталася. Карніленка за гэты эпізод атрымаў жоўтую картку.
Пасля таго сутыкнення Бэйл яшчэ прыйшоў у сябе, але на пачатку другой тайма яго груба сустрэў Чарлі Адам, і на гэта сустрэча для валійца скончылася - канцоўку сезону ён прапусціў праз разрыў звязкаў галёнкаступнёвага сустава. Адам за гэты фол не атрымаў нават жоўтай карткі.
Навучыўся труку ў гульца рагачоўскага «Макслайна»
Знаёмства ж з беларусам у Гарэта адбылося яшчэ ў 15 гадоў, калі ў акадэмію «Саўтгемптана», дзе ён займаўся, на стажыроўку прыехаў Ілля Трачынскі - цяпер гулец рагачоўскага «Макслайна». Трачынскі распавядаў, што будучая зорка сусветнага футбола пакінула пра сябе выдатнае ўражанне: яны паспелі нямала пагутарыць падчас майстар-класа ў адной са школ горада, куды іх адправілі як самых маладых у камандзе.
А яшчэ беларускі паўабаронца распавёў гісторыю пра тое, як навучыў брытанца рабіць трук "Вакол свету".
- Тады ў школе паміж урокамі розныя фішкі паказвалі адзін аднаму. Я зрабіў фінт, «Вакол свету» называецца. Ну, ведаеш: набіваеш, а потым - раз! - вакол мяча ў паветры праводзіш. Ён паглядзеў і папрасіў яшчэ раз паказаць.
- Ты навучыў труку Гарэта Бэйла :)?
- Ха-ха, не-е-е. Ён яго раней бачыў. Але я павольна, па этапах паўтарыў - і Бэйл яго адразу выдаў! Я гэтаму фінту тыдзень вучыўся, мяне моцна ўразіла, – успамінаў Трачынскі.
