Менеджар «Шахцёра», якога затрымалі, усяго паўтара гады працаваў у Беларусі: збіраўся сыходзіць, жорстка называў сваіх гульцоў, дапамог зарабіць пару мільёнаў
Трымаўся ў цені.
Яшчэ ў нядзелю раніцай у "Трыбуны" з'явілася інфармацыя пра затрыманне сілавікамі спартыўнага дырэктара "Шахцёра" Уладзіміра Нідэргауса. Пацвердзіць яе ў іншых крыніцах да моманту з'яўлення навіны ў казахстанскага інсайдэра Айдына Кажахмета не ўдалося. Адзначым, што дэталі супадаюць - Нідэргауса падазраюць у парушэнні крымінальнага кодэкса Лукашэнкі, а менавіта ў махлярстве. У большасці выпадкаў дадзеныя дзеянні ў Беларусі кваліфікуюцца па артыкуле 209, паводле якога максімальна можна атрымаць да дзесяці гадоў пазбаўлення волі са штрафам.
«Шахцёр» пакуль не рабіў ніякіх афіцыйных заяваў, але яшчэ раніцай на сайце клуба Нідэргаўс значыўся на пасадзе намесніка дырэктара па спартовай працы.
Бліжэй да вечара згадку аб спортдыры выдалілі з падзелу «Кіраўніцтва».
Звальненне заднім чыслом - даволі распаўсюджаная практыка ў беларускіх дзяржустановах у выпадку ўзбуджэння крымінальнай справы на супрацоўніка. Нібыта гэта дапамагае зберагчы рэпутацыю.
Пасля з'яўлення навіны выказаўся расійскі агент Антон Смірноў, які на днях крытыкаваў тое, як у футбольным Салігорску вядуцца справы. Некалі гулец мінскага «Лакаматыва» і «Славіі» напісаў, што «час затрымліваць [дырэктара «Шахцёра»] таварыша Марчанку», бо «да яго пытанняў павінна быць значна больш.
Таксама ва ўсёй гісторыі, што закруцілася, цікавы лёс генеральнага дырэктара «Беларуськалія» Івана Галаватага – галоўнага гаранта фінансавай стабільнасці «Шахцёра».
Нядаўна пасля нарады ў Лукашэнка гэтак званы міністр спорту Сяргей Кавальчук збіраў у сябе прадстаўнікоў усіх клубаў вышэйшай лігі. Тады больш за ўсіх дасталася салігарчанам, якія трапілі пад крытыку праз спробы абысці грашовыя ліміты, што дзейнічаюць у белфутболе. У самім «Шахцёры» спадзяваліся, што Галаваты і надалей дазволіць вырашаць пытанні.
Пакуль вядома толькі пра затрыманне Нідэргауса, які працаваў у белфутболе адносна нядаўна. Вось чым ён запомніўся за паўтара гады сваёй дзейнасці (у асноўным трымаўся ў цені, і за беларускі перыяд не даў ні воднага разгорнутага інтэрв'ю).
Змяніў у Салігорску адыёзнага спартдзіра
У жніўні 2021-га пост спартыўнага дырэктара «Шахцёра» аказаўся вакантным – Аляксандр Рэхвіяшвілі тады пакінуў клуб на радасць мясцовай публікі. Салігорскія заўзятары жорстка крытыкавалі грузіна за дзіўную працу на трансферным рынку і нават патрабавалі звальнення замежніка проста з трыбун «Будаўніка».
Галоўнай прычынай звальнення Рэхвіяшвілі стаў правал у еўракубках-2021, калі "Шахцёр" прайграў балгарскаму "Лудагорцу" (0:1, 0:1) і люксембургскай "Фола Эш" (1:2, 0:1). Функцыянер без працы прабыў нядоўга і ўсяго праз некалькі тыдняў заняў аналагічную пасаду ў тбіліскім «Дынама», дзе працуе да гэтага часу.
На той момант 54-гадовы Нідэргаус прыляцеў у Беларусь з салідным досведам працы ў шэрагу вядучых казахстанскіх клубаў. Спецыяліст паспеў папрацаваць у мясцовай федэрацыі футбола, дзе ў розны час займаў пасады дырэктара дэпартамента зборных і намесніка старшыні камітэта зборных. Акрамя гэтага за плячыма Нідэргауса быў самавіты бэкграўнд у якасці футбаліста.
Хацеў гуляць еўракубкі ў Казахстане
З 2021-га беларускія клубы ладзяць хатнія матчы ў еўракубках за межамі Беларусі. Яшчэ пры Рэхвіяшвілі летам таго ж года «гарнякі» прымалі «Лудагорац» у сербскім Бялградзе, а «Фола Эш» - у венгерскім Мішкольцы.
У красавіку 2022-га Нідэргаус вёў працу па пошуку стадыёнаў за мяжой пад еўракубкі. Спартдыра «Шахцёра» бачылі ў Астане, дзе ён вёў перамовы з «Астана-Арэнай». Таксама Нідэргаус прызнаўся, што клуб разглядае і іншыя варыянты па-за Беларуссю і Казахстанам.
Па выніку хатнія матчы ў Лізе чэмпіёнаў і Лізе канферэнцый супраць "Марыбора" і ЧФР салігарчане правялі ў турэцкім горадзе Сакар'я.
Зарабіў на трансферах
Пасля прыходу Нідэргауса паток легіянераў у Салігорск не спыніўся. Ужо ў першае трансфернае акно летам 2021-га пры новым спартдыры клуб выклаў больш за 1,15 мільёна еўра за славенца Дарыа Калабарыча, славенца Джорджа Іванавіча і баснійца Мілаша Шатару. Таксама за 350 тысяч долараў з Барысава перавабілі Максіма Скавыша.
Наступныя падпісныя кампаніі "Шахцёр" праводзіў ужо больш сціпла, у большасці выпадку аддаючы перавагу свабодным агентам. Не выключана, што змены ў трансфернай палітыцы былі звязаныя з санкцыямі супраць "Беларуськалія", з-за чаго прадпрыемства страціла салідную долю ранейшага прыбытку.
За апошнія паўгода салігарчанам нават удалося зарабіць 2 мільёны еўра на продажах. 1,5 мільёна атрымана за трансфер у эмірацкі "Аль-Наср" нападніка Дэмба Дарба. Гамбіец прыехаў у «Шахцёр» яшчэ пры Рэхвіяшвілі за 700 тысяч еўра. Яшчэ 500 тысяч заплаціў расійскі «Ахмат» за Мілаша Шатару і Заіма Дзіванавіча. Абаіх «гарнякі» падпісвалі ўжо пры Нідэргаусе. За Шатару беларускі клуб выклаў 100 тысяч еўра. Пра кошт для Салігорску Дзіванавіча нічога невядома.
Зваў гульцоў «Шахцёра» футбалістыкамі
Прычынай такой рэплікі стаў вынік вераснёўскага матча супраць "Энергетыка-БДУ", у якім салігарчане саступілі з лікам 0:1. Тая перамога вывела "студэнтаў" на чыстае першае месца.
Шанцы на чэмпіёнства ў «гарнякоў» трохі зменшыліся, што моцна раззлавала спортдзіра. Па словах журналіста Мікалая Іванова, «выходзячы з распранальні «Шахцёра», Нідэргаус назваў гульцоў салігорскай каманды «футбалістыкамі».
Казалі, што можа сысці
Упершыню ў белфутболе пра магчымы сыход Нідэргауса загаварылі ў красавіку 2022-га. Тады спецыяліста сваталі ў адзін з клубаў чэмпіянату Казахстана, аднак змена месца працы не адбылася.
Пра растанне з замежнікам загаварылі і за дзесяць дзён да з'яўлення інфармацыі аб затрыманні. У сярэдзіне студзеня Нідэргаусу прадказвалі аналагічную пасаду ў «Таболе», дзе той ужо працаваў: з 2017-га па 2019-ы займаў пост спачатку спартыўнага, а затым тэхнічнага дырэктара. Плюс нядаўна каманду прыняў Міліч Чурчыч, пад кіраўніцтвам якога «Шахцёр» гуляў астатнюю траціну чэмпіянату-2022.
