Базанаў любіць ставіць задачы зборнай Беларусі – яна здолела толькі абагнаць аднойчы апошняе месца, але для артылерыста «спраўляецца» і пры правале
Словы, словы.
Да старту кваліфікацыі чэмпіянату Еўропы-2024 застаецца няшмат часу. Па плане прыме ўдзел у ёй і зборная Беларусі. 25 сакавіка каманда ў сербскім Нові-Садзе павінна згуляць «хатні» матч са Швейцарыяй, а праз тры дні ў Бухарэсце – супраць Румыніі. Яшчэ ў групе ёсць Ізраіль, Косава і Андора, а на Еўра паедуць дзве найлепшыя зборныя.
Кіраўнік АБФФ Уладзімір Базанаў, які, паводле нашай інфармацыі, на пасадзе застаецца апошнія дні, агучыў мэту каманды Георгія Кандрацьева. Функцыянер казаў, што не хоча «нагнятаць абстаноўку перад пачаткам новай кваліфікацыі», але пры гэтым «ставіць максімальныя задачы» перад зборнай. Фармулёўка чаканняў Базанава – «барацьба за выхад з групы».
Гэта не першы адборачны цыкл пры кіраўніцтве Базанава. Давайце паглядзім, што казаў бос АБФФ перад мінулымі кампаніямі і чым яны па выніку заканчваліся.
Патрабаваў выніку яшчэ да свайго абрання
Базанаў пачаў ставіць задачы перад зборнай яшчэ да свайго афіцыйнага абрання. Безальтэрнатыўныя выбары новага кіраўніка АБФФ праводзілі 27 сакавіка 2019-га, а каманда стартавала ў кваліфікацыі ЧЕ-2020 на шэсць дзён раней. І яшчэ да стартавай гульні Базанаў (у статусе адзінага кандыдата) заявіў, што «перад зборнай трэба ставіць адну мэту», згадаўшы выхад на чэмпіянат Еўропы – праўда, асаблівым спосабам, пра што ніжэй.
У «давыбарных» матчах Беларусь на выездзе прайграла Нідэрландам (0:4) і Паўночнай Ірландыі (1:2). Пасля свайго абрання Базанаў зладзiў закрытае паседжанне на выканкаме АБФФ, дзе з дакладам выступаў галоўны трэнер зборнай Ігар Крывушэнка. Аднак гэта не дапамагло – у чэрвені 2019-га былі паразы ад Германіі (0:2) і Паўночнай Ірландыі (0:1). Тут жа замест Крывушэнкі зборную даверылі Міхаілу Мархелю, які падпісаў кантракт на тры гады.
Пасля змены трэнера Базанаў паставіў пэўную і вельмі несамавітую задачу на адбор – патрабавалася ўсяго чацвёртае месца з пяці. Каб яго заняць, неабходна было апярэдзіць Эстонію. З гэтай задачай Мархель справіўся, хоць і з цяжкасцю – гасцявая перамога 2:1 і дамашняя нічыя 0:0 з эстонцамі. У астатніх матчах Базанаў чакаў ад зборнай дастойнай гульні – атрымалася 1:2 ад Нідэрландаў і 0:4 ад Германіі. З чатырма ачкамі Беларусь абыйшла толькі Эстонію, але Базанаву гэта было якраз – ён казаў таксама, што яму падабаецца, як працуе новы трэнерскі штаб.
Хацеў на Еўра шляхам «для слабых»
Ужо пасля двух стартавых паражэнняў у адборы на ЧЕ-2020 Базанаў пачаў гаварыць пра падрыхтоўку да плэй-оф Лігі нацый. У 2018-м падапечныя Крывушэнкi занялі першае месца ў сваёй групе дывізіёна D і ў 2020-м павінны былі прадоўжыць барацьбу за пуцёўку на Еўра «для слабога» ў паўфінале плэй-оф з Грузіяй. «Праз матчы з Галандыяй, Германіяй, Паўночнай Ірландыяй, ды і з Эстоніяй [трэба] падысці да гульняў Лігі нацый і выйсці на Еўра», – казаў Базанаў ужо праз некалькі дзён пасля свайго абрання. Бос АБФФ пацвердзіў пазіцыю і пасля прызначэння Мархеля.
З-за пандэміі каранавіруса матч супраць Грузіі быў перанесены з вясны 2020-га на кастрычнік, калі ў Беларусі было ўжо зусім не да футбола – настолькі, што ў зборную на «матч жыцця» нібыта з-за хваробы не выклікалі яе топ-гульца Станіслава Драгуна, які напярэдадні гульні асмеліўся выказацца супраць гвалту (пакутуе за гэта i сёння).
У Грузіі беларуская каманда паказала незразумелую гульню, без асаблівых шанцаў уступіла 0:1 і скончыла барацьба за пуцёўку на Еўра. Базанаў пракаментаваў вынік толькі праз два месяцы – сказаў, што яму «крыўдна, прыкра». Затое адразу пайшоў выдумляць «ідэалагічныя» прычыны правалу так званы міністр спорту Сяргей Кавальчук – заявіў пра «розныя погляды на жыццё, на сітуацыю ў краіне» ўнутры каманды і раскрытыкаваў Ігара Стасевіча, які ў Тбілісі на поле наогул не выходзіў.
Жадаў плэй-оф адбору ЧС, але атрымалася апошняе месца ў групе
Праз два месяцы пасля няўдачы з Грузіяй Базанаў абвясціў чаканні на адбор да ЧС-2022. Тады каманда Мархеля апынулася ў адной групе з Бельгіяй, Уэльсам, Чэхіяй і Эстоніяй. Прамую пуцёўку на мундыяль атрымлівала найлепшая каманда, а другая адпраўлялася ў раунд плэй-оф.
«Мы будзем ставіць задачу выйсці на другое месца, каб недзе трапіць на стык», – заявіў Базанаў пасля лёсавання групы.
Аднак зборная не апраўдала спадзяванняў кіраўніка АБФФ. Каманда правяла адзін з найгоршых цыклаў у сваёй гісторыі, набраўшы ўсяго тры ачкі ў васьмі сустрэчах. Адзіную перамогу атрымалі дома над абяскроўленай з-за каранавіруса Эстоніяй (4:2). Затым адбылося знішчэнне на выездзе ад Бельгіі (0:8), пасля якога рассталіся з Мархелем. Галоўным трэнерам стаў Георгій Кандрацьеў – пры ім усе шэсць матчаў кваліфікацыі былі прайграныя з агульным лікам 3:14. Беларусь заняла апошняе месца ў групе, прапусціўшы наперад нават Эстонію, якая набрала на адзін бал больш.
Ужо падчас паражэнняў зборнай пры Кандрацьеве Базанаў знайшоў прычыну няўдач. Аказалася, яна заключаецца ў засілле замежнікаў у чэмпіянаце Беларусі.
Пасля правалу казаў, што Кандрацьеў «справіўся з задачай»
Пасля правальнага адбору Базанаў заявіў, што Кандрацьеў застаецца, і тут жа пачаў казаць пра новыя задачы перад зборнай. Цяпер бос АБФФ яшчэ да лёсавання жадаў перамогу ў групе дывізіёна С Лігі нацый-2022/23 – зрэшты, яна была прапісаная яшчэ ў «канцэпцыі развіцця» белфутбола ў сакавіку 2021-га.
Беларуская каманда апынулася ў адным квартэце з Казахстанам, Азербайджанам і Славакіяй, і перад стартавым матчам са Славакіяй (0:1) Базанаў паўтарыў свае патрабаванні – выхад у дывізіён B, для якога і трэба было выйграць групу.
«Задача выхаду з групы стаіць перад трэнерскім штабам, перад камандай. Бачыце, у якіх мы складаных умовах гуляем? Пакуль нас не вельмі любяць, але мы ідзем наперад і жадаем ісці наперад, і я думаю, што ўсё атрымаецца. Моцны бок і трэнерскі штаб, ён у нас добры, моцны», – заявіў Базанаў.
Але і тут у шасці матчах Беларусь ні разу не перамагла – і з трыма ачкамі заняла апошняе месца ў групе. Па ходзе Лігі нацый Базанаў казаў пра нездаволенасць вынікамі, аднак гэта не перашкаджала яму бачыць «працу трэнерскага штаба». Апошнія два матчы функцыянер ужо проста прасіў каманду «правесці годна».
Замест павышэння зборную ў сакавіку 2024-га чакаюць стыкавыя матчы з Літвой за права застацца ў дывізіёне С. А Базанаў пасля правалу заявіў: «Чалавек [Кандрацьеў] у вельмі складаных умовах працаваў. Каранавірус, складаная лагістыка, пералёты, многія іншыя моманты, пра якія не хацеў бы казаць. І чалавек з задачай справіўся». Пра якую «задачу» магла ісці гаворка, засталося загадкай, але трэнерскі штаб Кандрацьева застаўся на пасадах.
