«Мiнск» пачаў ЧБ з перамогі 19-гадовым складам – забіў непаўналетні, не прапусціў брамнік без практыкі ў 2022-м, а вось хто яшчэ прыбіў каманду Бiёнчыка
Тры дэбютанты «вышкі» і іншыя.
Ужо першы матч вышэйшай лігі чэмпіянату Беларусі па футболе-2023 скончыўся з нечаканым вынікам. «Мінск», зімой з-за фінансавых праблем страціўшы мноства гульцоў і замяніўшы іх уласнымі выхаванцамі, быў аўтсайдэрам у дамашнім матчы з мацнейшай па складзе «Славіяй» Івана Біёнчыка, але перамог з лікам 2:0.
Сярэдні ўзрост стартавага складу «Мінска» склаў 19,9 года – гэта на шэсць з лішнім гадоў менш, чым у «Славіі». А калі браць у разлік толькі палявых, гэты паказчык увогуле складзе толькі 19,1 года! Расказваем пра футбалістаў, якія абыгралі больш вопытных мазыран.
Аляксандр Нячаеў, варатар, 28 гадоў
Вопыт у вышэйшай лізе (да матча са «Славіяй»): 14 матчаў (5 «сухіх»), 18 прапушчаных мячоў.
Самы дасведчаны футбаліст у сёлетнім «Мінску». Да пачатку мінулага года кіпер выступаў у Беларусі, а потым з“ехаў у Азербайджан. Аднак за 2022-і брамнік так і не правёў ніводнага матчу за «Сабах», пасля чаго вярнуўся ў Беларусь.
Глеб Гурбан, абаронца, 21 год
Вопыт у вышэйшай лізе: 24 матчы.
Фулбэк дэбютаваў у «вышцы» яшчэ ў 2019-м, калі яму было 18. З таго часу Гурбан паспеў пабываць у арэндзе ў «Смалявічах», а затым перайсці ў «Рух». Пасля расфарміравання брэсцкага клуба футбаліст вярнуўся ў родны «Мінск», за які ў «вышцы»-2022 згуляў 17 разоў.
Глеб Якушэвіч, абаронца, 20 гадоў
Вопыт у вышэйшай лізе: 17 матчаў.
Для маладога цэнтрдэфа гэты сезон ужо трэці ў вышэйшай лізе. Два папярэднія абаронца маладзёжнай зборнай змагаўся за месца ў стартавым складзе, але выходзіў там толькі пры кадравым дэфіцыце. 2023-i Якушэвіч пачынае ўжо ў ролі асноўнага гульца абароны.
Іван Тарабеш, абаронца, 19 гадоў
Вопыт у вышэйшай лізе: 0 матчаў.
Гэты абаронца можа ўвайсці ў лік галоўных адкрыццяў «Мінска». Тарабеш не выклікаўся ва U-зборныя Беларусі і раней не гуляў у вышэйшай лізе. Самымі статуснымі ў кар“еры футбаліста былі матчы Юнацкай лігі УЕФА у 2021-м, дзе «Мінск» вылецеў ужо ў другім раўндзе кваліфікацыі ад «Хайдука» (0:3, 1:1). 2022-і гулец праводзіў у дублі «Мінска» – 22 сустрэчы, адзін забіты мяч.
Аляксей Туманаў, абаронца, 19 гадоў
Вопыт у вышэйшай лізе: 0 матчаў.
Разам з Тарабешам у згаданых матчах Юнацкай лігі гуляў і Туманаў. У тым жа годзе абаронцу выклікалі ў зборную Беларусі U-19 на матчы адбору на Еўра, аднак Андрэй Скарабагацька выпусціў футбаліста сумарна толькі на восем хвілін. Мінулы сезон Туманаў гуляў за дубль – 19 паядынкаў.
Юлій Кузняцоў, паўабаронца, 19 гадоў
Вопыт у вышэйшай лізе: 17 матчаў.
Футбаліст, дэбютаваўшы за «Мінск» у вышэйшай лізе ў 17 гадоў, мінулым летам па гульнявую практыку адправіўся ў родны Наваполацк. Там Кузняцоў дапамог «Нафтану» праз пяць сезонаў вярнуцца ў эліту, правёўшы за каманду 15 матчаў і забіўшы адзін мяч у Д2. Паралельна хаўбека пачалі выклікаць у маладзёжную зборную, дзе ён у верасні паразіў вароты аднагодкаў з Расіі – праўда, беларускую каманду пры гэтым разграмілі 6:1.
Ігнат Прановіч, паўабаронца, 19 гадоў
Вопыт у вышэйшай лізе: 0 матчаў.
У пачатку 2022-га ў арэнду ў «Нафтан» адправіўся і гэты футбаліст. У Наваполацку ў Вячаслава Герашчанкі паўабаронца адыгрываў важную ролю, за сезон прапусціўшы толькі адзін матч. За «Нафтан» у Д2 Прановіч набіў 4+5 у 25 паядынках.
Данііл Душэўскі, паўабаронца, 19 гадоў
Вопыт у вышэйшай лізе: 29 матчаў, 2 галы.
Футбаліст маладзёжнай зборнай яшчэ летась стаў гульцом стартавага складу «гараджан», часцей за ўсё выходзячы ў апорнай зоне. У 2023-м яму дасталася капітанская павязка – з выхаванцаў «Мінска» у цяперашнім складзе ён у топе па досведзе гульняў у «вышцы».
Радзiвон Пячура, паўабаронца, 18 гадоў
Вопыт у вышэйшай лізе: 18 матчаў, 2 галы.
Хаўбэка можна назваць галоўным адкрыццём «Мінска» за мінулы сезон. Пячура дэбютаваў у «вышцы» у ліпені 2022-га, а ўжо праз некалькі месяцаў стаў стабільным гульцом старту. Заадно хлопца ўпершыню выклікалі ў маладзёжню зборную, дзе той дэбютаваў увосень. Цяпер супраць «Славіі» Пячура вызначыўся асістам пры аўтаголе Іллі Руцкага.
Кірыл Чарнавок, паўабаронца, 20 гадоў
Вопыт у вышэйшай лізе: 39 матчаў, 3 галы.
Выхаванец школы брэсцкага «Дынама» правёў першы матч у вышэйшай лізе яшчэ два гады таму, калі апынуўся ў структуры «Руха». У пачатку 2022-га, калі праект Аляксандра Зайцава адмовіўся гуляць у ЧБ, Чарнавок адправіўся ў «Мiнск». Там хаўбек спатрэбіўся Вадзіму Скрыпчанку, які выпускаў Кірыла практычна ў кожным матчы, – і застаўся ў клубе на сезон-2023. Чарнавок выкліканы ў маладзёжную зборную на найбліжэйшыя матчы з Андорай і Грэцыяй.
Цімафей Мартынаў, нападаючы, 17 гадоў
Вопыт у вышэйшай лізе: 14 матчаў.
Форварда пачалі падпускаць да матчаў вышэйшай лігі ў мінулым сезоне. Скрыпчанка нават выпусціў юнага Мартынава ў старце майскага матча з «Іслаччу» (0:2). Праўда, коуч давяраў нападаючаму максімум адзін тайм. У цяперашняй гульні супраць «Славіі» Мартынаў нарэшце правёў на полі больш за 45 хвілін – і забіў свой першы мяч у Д1.
