Займаемся фігнёй, не ведаю, што адбываецца. Ад слоў галоўнага трэнера БАТЭ ў апошні час патыхае адчаем
Ці адшукае Кірыл Альшэўскі выхад?
Старт сезона-2023 БАТЭ наўрад ці запіша сабе ў актыў. Пасля дзесяці матчаў вышэйшай лігі барысаўцы набралі зусім сціплыя для сябе 16 пунктаў. Горш каманда пачынала толькі ў 2000-м, калі на аналагічнай адзнацы мела 13 пунктаў. Аднак тады БАТЭ здолеў сабрацца і фінішаваць другім. Цяпер барысаўцы ідуць чацвёртымі, адстаючы ад мінскага «Дынама», што лідуе, на дзевяць пунктаў. У трох апошніх турах каманда Кірыла Альшэўскага аддавала ачкі супернікам у самых канцоўках: прайграла "Тарпеда-БелАЗ" (1:2), упусціла перамогі з "Іслаччу" (1:1) і "Славіяй" (1:1).
Пазітыву магла дадаць перамога ў фінале Кубка Беларусі. Але і там БАТЭ чакала няўдача - Жодзіна забіла па мячы ў кожным з таймаў.
У рыторыцы Альшэўскага ў апошнія тыдні зусім мала аптымізму. Хутчэй, словы трэнера патыхаюць калі не адчаем, то безвыходнасцю.
Чарада няўдач пачалася ў сярэдзіне траўня - як раз з матчу вышэйшай лігі з «Тарпеда-БелАЗ» (1:2). Да таго БАТЭ атрымаў тры перамогі ў чэмпіянаце і прайшоў у Кубку "Нёман" па серыі пенальці. Відавочна, трэнер барысаўцаў пасля паразы ад Жодзіна меў прэтэнзіі да футбалістаў, але абвінаваціў у гэтым сябе.
«Усю віну за гэтую паразу я бяру толькі на сябе, таму што не змог дастукацца да футбалістаў. І першыя 20 хвілін паказалі, што проста не будзе», - сказаў коуч.
На наступным тыдні БАТЭ нагуляў усяго толькі на нічыю ў матчы з "Іслаччу".
«Гулялі дрэнна. Па справе не выйгралі. І канцоўку з пункту гледжання адзінаборстваў правалілі. Замены не ўзмацнілі гульню. Мусіць, справядліва. «Іслач» была бліжэй да перамогі з улікам галявых момантаў», - падсумаваў матч Альшэўскі.
Асобна трэнер спыніўся на мячы, што ўляцеў у вароты БАТЭ на 90+4-й хвіліне.
«Ляціць перадача пасля аўта. Адзін гулец павінен перашкодзіць зрабіць падачу. Другі - у сваёй зоне кантраляваць гульню. Туды прыляцеў мяч. Супернік выйграў адзінаборства ці што - не скажу дакладна - і нанёс удар, па сутнасці, бесперашкодна. Пра што тут можна казаць? Калі адна перадача, другая - мы атрымліваем гол, то, блін, мы рэальна фігнёй займаемся. Па-іншаму не назваць», - пракаментаваў эпізод Альшэўскі.
Пасля страчанай перамогі над "Славіяй" барысаўскі коуч сказаў, што ў гэтым сезоне БАТЭ ўласціва "так па-дурному" аддаваць ачкі, і гэты факт "засталося толькі прыняць". Што да прыроды апошніх няўдач, Альшэўскі на той момант не мог назваць прычыну.
«Наш гулец памыліўся [пры голе “Славіі”], на жаль, як я сказаў. Гэта здараецца, але казаць пра тое, што адбываецца, я не ведаю, што адбываецца, калі шчыра. Калі паглядзець, дзе мы страцілі пункты, то там рэальна памылкі, мякка кажучы, дурныя, то бок яны не выцякаюць з некаторых дзеянняў», - разважаў Альшэўскі.
Няўдачу ў фінале Кубка трэнер растлумачыў адсутнасцю "патрэбнай колькасці эмоцый" - яго падапечныя дзейнічалі "суха". Выглядае, што Альшэўскі не вельмі задаволены тым, як калектыў рэагуе на выклікі.
«Ды ўжо надакучыла падбадзёрваць, калі шчыра. Нічога не казаў [камандзе пасля матчу]. Што тут казаць? – абураўся пасля фінальнага свістка спецыяліст.
Планы трэнера на будучыню зразумелыя. Так, трэба змагацца з памылкамі.
«Трэба толькі працаваць і выпраўляць памылкі, якія ўзнікаюць. Хоць, калі казаць сумленна, можна метадычны дапаможнік пісаць па дурасці памылак. Ну як ёсць, застаецца толькі прыняць іх і знаходзіць выхад па выпраўленні сітуацыі», - сказаў Альшэўскі пасля фіналу.
