Як там белхакей у Амерыцы: Шаранговіч у парадку, але ёсць і сярэдняя статыстыка, і вылеты са складу
Не ўсе апраўдваюць надзеi.
У ноч з 21 на 22 лістапада «Нью-Джэрсі» Ягора Шаранговіча абыграў на сваёй пляцоўцы паўфіналіста апошняга розыгрышу Кубка Стэнлі «Эдмантан» (5:2) і паўтарыў клубны рэкорд па колькасці перамог запар – 13 (устаноўлены ён быў у лютым-сакавіку. 2001 года). Праўда, устанавіць новае дасягненне не ўдалося – ужо ў наступным паядынку ў ноч з 23 на 24 лістапада «Дэвілс» саступілі «Таронта» з лікам 1:2. Тым не менш «Нью-Джэрсі» ідзе другім на Усходзе (лідзіруе «Бостан») і ўпершыню за пяць апошніх гадоў сур'ёзна прэтэндуе на плэй-оф. Хоць глабальныя высновы рабіць яшчэ рана – прайшла толькі чвэрць рэгулярнага сезона.
У 24-гадовага беларускага форварда ў камандзе прыстойная статыстыка: 6+5 у 20 матчах сезона і два званні першай зоркі сустрэчы. Апошняя на дадзены момант шайба, «Эдмантану», вывела яго на пятае месца па колькасці ўзяццяў варот сярод усіх беларускіх гульцоў у гісторыі НХЛ – вызначыўшыся 46-ы раз у «рэгулярцы» (на гэта ў яго пайшло 149 матчаў), ён абышоў Руслана Салея і наблізіўся да Сяргея Касціцына (67), Уладзіміра Цыплакова (69), Андрэя Касціцына (103) і Міхаіла Грабоўскага (125).
Адна з шасці шайбаў Ягора стала для каманды вырашальнай (сёмая такая для яго ў лізе): у авертайме матча супраць «Таронта» форвард удала згуляў на пятачку, дабіўшы пасля няўдалай спробы закінуць Джэка Х'юза.
У сацсетках заўзятары дапісваюць прозвішча Ягора да «Шаран-гол-віч», а пасля адной з гульняў прысвяцілі вось такі арт.
Але не Шаранговічам адзіным – давайце паглядзім, як справы ў іншых беларускіх хакеістаў за акіянам.
Аляксей Протас, «Вашынгтон» (НХЛ)
Для «Вашынгтона» бягучы сезон складваецца пакуль няўдала: з 8 перамогамі ў 21 матчы каманда ідзе на чацвёртым месцы з канца на тым жа Усходзе. Зараз «Кэпіталс» перапынілі серыю з чатырох паражэнняў запар, у авертайме абгуляўшы «Філадэльфію».
Беларускі форвард Аляксей Протас згуляў ва ўсіх паядынках (за ўвесь мінулы сезон было ўсяго 33) і ўжо паўтарыў свой леташні паказчык па колькасці шайб – тры. Адна з іх заляцела ў вароты «Нью-Джэрсі» Шаранговіча – гэта было першае супрацьстаянне двух беларускіх хакеістаў у НХЛ больш чым за 10 гадоў. Скончылася яно перамогай Протаса (6:3), як і дзве іншыя сустрэчы, у якіх Аляксей закідваў.
21-гадовы Протас у гэтым сезоне ўжо пачаў выходзіць пры розыгрышы лішняга і нават згуляў матч супраць «Сэнт-Луіса» ў першым звяне.
Ілля Усаў, «Сірак'юз» (АХЛ)
21-гадовы хакеіст, які падпісаў у сакавіку гэтага года трохгадовы кантракт з «Тампай-Бэй», у галоўнай лізе свету пакуль не дэбютаваў. Форвард гуляе ў фарм-клубе «маланак» – пачаў там вельмі дрэнна: 11 матчаў запар на старце без вынiковых дзеянняў прывялі да таго, што нападаючы нават на дзве сустрэчы выпаў з ростэра «Сірак'юз».
Паўза пайшла на карысць: у першым матчы пасля вяртання Усаў аформіў асіст (а каманда змагла вылезці з 1:4 пасля двух перыядаў і выйграць у серыі булітаў), у другім закінуў шайбу пры перамозе супраць «Белвіл Сенатарз» (5:4), у трэцім аддаў яшчэ адну галявую.
Каманда Усава займае чацвёртае месца ў Паўночным дывізіёне пасля 16 матчаў.
Уладзіслаў Калячонак, «Тусон» (АХЛ)
Абаронца ўжо крыху паспеў адчуць НХЛ – у мінулым сезоне ён правёў 32 матчы ў складзе «Арызоны», адной з горшых каманд лігі. У цяперашнім сезоне 21-гадовы мінчанін гуляе выключна ў АХЛ: за «Тусон» Калячонак правёў 15 матчаў і вызначыўся толькі адным вынiковым дзеяннем (асіст у адным з пераможных матчаў). Больш было летась і ў НХЛ (1+2 у 32 матчах), і ў тым жа «Тусоне» ў АХЛ (2+12 у 33 матчах).
Галоўны хайлайт Уладзіслава за апошнія некалькі месяцаў – удзел у масавай бойцы ў матчы супраць фарма «Сан-Хасэ». За гэта абаронца атрымаў выдаленне да канца гульні (5+10 хвілін).
«Тусон» таксама займае ў сваім дывізіёне (Ціхаакіянскім) чацвёртае месца.
Даніла Клімовіч, «Абатсфорд» (АХЛ)
Функцыянер мінскага «Дынама» Андрэй Парфімовіч называў 19-гадовага форварда наступным беларускім хакеістам з пастаянным месцам у НХЛ, але пакуль да гэтага далёка – «Ванкувер» падняў Клімовіча з фарм-клуба толькі ў пачатку сезона, і тое толькі для таго, каб упісацца пад столь заробкаў у патрэбны момант, з праходжаннем якога гульца імгненна апусцілі назад.
Пінчук гуляе за «Абатсфорд», за які выступаў у сезоне-2021/22 (62 матчы, 8+10), і за свае першыя 11 матчаў сезона аформіў сціплыя 1+2 (шайба 24 кастрычніка ўляцела ў вароты «Каачэлы», фарма «Сіэтла»).
Пра НХЛ проста зараз гаворкі не ідзе. Больш за тое, ужо ў трох матчах сезона Клімовіч па рашэнні трэнераў заставаўся па-за складам – толькі-толькі вярнуўся пасля чарговага перапынку. Пры гэтым агент гульца кажа, што Клімовіч не будзе прасіць абмену, працягваючы даказваць у гульнях за «Абатсфорд».
Не ўражваюць і вынікі каманды: 6 перамог у 14 матчах і восьмае месца ў Ціхаакіянскім дывізіёне.
Ілля Салаўёў, «Калгары» (АХЛ)
22-гадовы абаронца не ўразіў трэнераў галоўнай каманды «Калгары» падчас летняга кэмпа і выставачных матчаў (хоць, напрыклад, супраць «Эдмантана» ён аформіў два асісты) і вярнуўся ў фарм. У мінулым сезоне ў лізе магілёвец аформіў 3+5 у 51 матчы сезона, у гэтым пакуль без шайб, але з двума асістамі ў 14 паядынках.
«Калгары» з 9 перамогамі ў 15 матчах ідзе на другім месцы таго ж Ціхаакіянскага дывізіёна.
