Новы віток кар'ер тых, каго выдатна ведаюць у Беларусі: Дарба з'ехаў з ААЭ, адзін экс-дынамавец – да свежых чэмпіёнаў Еўропы, другога нарэшце дачакаліся ва Украіне
Ёсць пераходы ў В'етнам і ўнутры Уругвая.
Найлепшы бамбардзір «вышкі»-2021 змяніў Эміраты на Казахстан, уругваец з «Дынама» у свае 37 яшчэ пыліць на Радзіме, «джокер» чэмпіёнскага Брэста адправіўся за гульнявой практыкай ва ўкраінскі Д2, а нарвежскі «здаравяк» стаў аднаклубнікам двух чэмпіёнаў Еўропы ў Канадзе – сабралі для вас зімовыя пераходы некалі заўважных легіянераў ЧБ.
Дэмба Дарба, 24 гады, Гамбія
Пераход: «Аль-Наср» (ААЭ) → «Астана» (Казахстан), арэнда
Найлепшы бамбардзір ЧБ-2021 у складзе салігорскага «Шахцёра» ў ліпені пераехаў у «Аль-Наср» (не той, што ў Раналду), дзе за паўгода згуляў у 14 матчах, у якіх вызначыўся ўсяго трыма галамі.
Здаецца, гэта не ўразіла эмірацкі клуб – і ў сярэдзіне студзеня форвард на правах арэнды перайшоў у «Астану», якая выйграла чэмпіянат Казахстана-2022. Прапісана і права выкупу, што можа дапамагчы «Шахцёру», якому належыць 20% ад наступнага продажу гульца.
Цяпер гамбіец будзе гуляць з яшчэ адным экс-салігарчанінам Максам Эбонгам – у «Шахцёры» яны сустрэцца не паспелі, бо беларускі футбаліст перайшоў у «Астану» яшчэ ў 2019-м.
Фёдар Чарных, 31 год, Літва
Пераход: «Ягелонія» (Польшча) → АЕЛ (Кіпр)
Бронзавы прызёр чэмпіянату Беларусі-2009 у складзе «Дняпра» і ўладальнік Кубка краіны-2012 з «Нафтанам» правёў у польскай «Ягелоніі» ў агульнай складанасці пяць гадоў, за якія правёў 154 матчы. Але гэтай зімой пераехаў – падпісаў кантракт з АЕЛ, серадняком чэмпіянату Кіпра.
Чарных ужо дэбютаваў за новую каманду, выйшаўшы на канцоўку матча супраць «Неа Саламіны», дзе выступае прарэжымны падпісант Уладзіслаў Клімовіч. Літовец за адведзеныя яму 25 хвілін не змог дапамагчы камандзе пазбегнуць паражэння 0:2.
АЕЛ прадстаўляе горад Лімасол – той жа, што і «Арыс», дзе трэніруе Аляксей Шпілеўскі, а гуляюць Арцём Шуманскі і падпісант за рэжым Яўген Яблонскі.
Слабадан Сімавіч, 33 гады, Сербія
Пераход: «Кішварда» (Венгрыя) → «Калубара» (Сербія)
Сербскі апорнік у Беларусі пагуляў за мінскае «Дынама» і БАТЭ (95 і 25 матчаў адпаведна). Пасля ад'езду з Барысава ў студзені 2020-га Сімавіч тры гады правёў у венгерскай «Кішвардзе», а гэтай зімой вярнуўся на Радзіму, падпісаўшы кантракт з «Калубарай» з элітнага дывізіёна Сербіі, якая пасля 19 тураў ідзе ў сярэдзіне табліцы (9-я з 16 каманд).
За гэтую каманду выступаюць яшчэ двое экс-гульцоў вышэйшай лігі: абаронца Мікола Васілевіч (у 2018-м правёў сем матчаў за БАТЭ) і хаўбек Няманя Нікаліч (у сярэдзіне сезона-2015 пасля двух з паловай гадоў у мінскім «Дынама» змяніў яго на паўсезона на БАТЭ, а ў 2019-м ненадоўга заязджаў у «Мінск»).
Эрнан Фігерэда, 37 гадоў, Уругвай
Пераход: «Ліверпуль» (Уругвай) → «Дэфэнсор» (Уругвай)
2,5 гады ў мiнскім «Дынама» – самы працяглы перыяд па-за родным Уругваям у кар'еры крэатыўнага паўабаронцы. За дынамаўцаў ён адыграў 99 матчаў, у якіх вызначыўся 25 галамі, узяў сярэбраныя і двойчы бронзавыя медалі ЧБ, у 2013-м станавіўся найлепшым легіянерам лігі, а таксама паўдзельнічаў у гістарычным для клуба розыгрышы ЛЕ-2014/15, калі мінчане ўпершыню трапiлi да групы.
Транзітам праз калумбійскі «Дэпортэс Таліма» і уругвайскі «Торке» Фігерэда ў 2018-м вярнуўся ў «Ліверпуль» з Мантавідэа (адтуль і пераходзіў у «Дынама»), дзе гуляў да студзеня гэтага года і ўзяў срэбра апошняга чэмпіянату. Цяпер узроставы футбаліст будзе выступаць за «Дэфенсор», які скончыў мінулы сезон у сярэдзіне турнірнай табліцы.
Адама Дыямандэ, 32 гады, Нарвегія
Пераход: «Од» (Нарвегія) → «Таронта» (Канада)
Кар'ера нарвежца з івуарыйскімі каранямі пасля не самага ўдалага адрэзка ў мінскім «Дынама» выходзіць вельмі насычанай: ААЭ, Англія (22 матчы ў АПЛ у складзе «Хал Сіці»), ЗША, Кітай, Катар, Нарвегія і, нарэшце, Канада – гэтай зімой магутны форвард змяніў «Од» на «Таронта» з МЛС. Дыямандэ будзе выступаць у адной камандзе з Федэрыкам Бернардэскі і Ларэнцам Інсінья – дзеючымі чэмпіёнамі Еўропы ў складзе зборнай Італіі. Праўда, клуб у мінулым сезоне стаў толькі перадапошнім ва Усходняй канферэнцыі.
Дыямандзе, дарэчы, пасля ад'езду з Беларусі зайграў і за зборную Нарвегіі, правёўшы там 11 паядынкаў.
Абдулае Дыяло, 27 гадоў, Сенегал
Пераход: → «Ханглінь» (В'етнам)
Афрыканскі форвард правёў у Брэсце паўтара прадуктыўных года: за 36 матчаў у складах «Руха» і «Дынама» ён вызначыўся 10 галамі і 5 галявымі перадачамі. Улетку 2021-га адбыўся пераезд у расійскі «Арэнбург» да экс-трэнера дынамаўцаў Марцала Лiчкi, але там праявіць сябе Дыяло не атрымалася: 2+1 у 16 паядынках і раставанне з клубам ужо праз паўгода.
2022-i зусім выпаў з кар'еры нападаючага – ён так і не падпісаў кантракт з новым клубам. А ў пачатку 2023-га аднавіў кар'еру нечакана ў В'етнаме. Яго новая каманда «Ханглiнь» у 2022-м з цяжкасцю выйграла барацьбу за выжыванне ў Д1, толькі на два ачкі апярэдзіўшы клуб з апошняга месца.
Аляксей Хабленка, 28 гадоў, Украіна
Пераход: «Крыўбас» (Украіна) → «Карпаты» (Украіна, Д2), арэнда
Важны футбаліст чэмпіёнскага Брэста-2019, сапраўдны «джокер» той каманды Марцала Лічкі: 6 з 9 сваіх мячоў украінец забіў, выходзячы на поле па ходзе матчаў. Пасля залатога сезона заставацца ў Беларусі не стаў, а адправіўся на Радзіму, падпісаўшы кантракт з «Дняпром-1», тады яшчэ камандай другога дывізіёна. Вырашыўшы задачу па выхадзе ў эліту, Хабленка няўдала з'ездзіў у арэнду ў нарвежскі «Стабек», а затым апынуўся ў «Крыўбасе», які праз паўгода выкупіў яго кантракт. Пасля пачатку вайны і да моманту аднаўлення чэмпіянату Украіны форвард гуляў у эстонскай «Левадыі».
Новы сезон пры экс-трэнеры «Шахцёра» Юрыі Вернідубе ля руля крыварожцаў Хабленка пачаў у ролі гульца асноўнага складу, але пасля сваё месца страціў – і зараз адправіўся за гульнявой практыкай у львоўскія «Карпаты», якія ідуць у групе лідараў Д2.
Але колькасць былых гульцоў «вышкi» ў «Крыўбасе» не зменшылася – у клуб нарэшце даехаў 26-гадовы экс-вінгер мінскага «Дынама», «Нёмана», «Тарпеда-БелАЗ» і «Смалявічаў» Жан По. Івуарыец, якi мінулай зімой змяніў «Дынама» на егіпецкі «Ісмаілі», павінен быў апынуцца ў Крывым Рогу яшчэ ў верасні, калі ўкраінскі клуб дамовіўся аб арэндзе, але з-за праблем з дакументамі гулец у выніку чатыры месяцы знаходзіўся без практыкі.
Яшчэ адзін пераход ва УПЛ з удзелам былога гульца ЧБ – 28-гадовы былы паўабаронца «Мінска» і «Гомеля» Аляксандр Васільеў пайшоў са «Львова» Алега Дулуба ў «Чарнаморец» да экс-трэнера «Шахцёра» Рамана Грыгарчука. У першай частцы сезона футбаліст правёў у чэмпіянаце Украіны 13 матчаў, у якіх вызначыўся адным голам і адным асістам.
Станіслаў Беленькі, 24 гады, Украіна
Пераход: «Дынама» Тбілісі (Грузія) → «Макабі» Нетанья (Ізраіль), арэнда
Яшчэ адзін украінскі нападаючы, які добра сябе праявіў у Брэсце: у сезоне-2021 ураджэнец Данецка забіў 14 мячоў у 31 сустрэчы ў футболцы «Дынама». Пасля гэтага Беленькі адправіўся ў Тбілісі, дзе з яшчэ адным «Дынама» (а таксама беларускімі гульцамі Дзмітрыем Антылеўскім і Антонам Чычканам) узяў чэмпіёнскі тытул, зноў паказаўшы цалкам прыстойную статыстыку – 11+6 у 31 матчы.
Апошнія чатыры гады Беленькі жыве па прынцыпе «новы год – новы клуб». Вось і цяпер на правах арэнды адправіўся ў «Макабі» Нетанья, які пасля 20 тураў дзеліць 6-ы радок у табліцы Д1 Ізраіля.
Зоран Марушыч, 29 гадоў, Сербія
Пераход: «Наўбахор» (Узбекістан) → «Дынама» Тбілісі (Грузія)
Замяніць Беленькага павінен серб, які выступаў у беларускім чэмпіянаце за «Дняпро» і «Нёман» (15 галоў у 54 матчах «вышкі»). Нападаючы ўжо гуляў за Тбілісі ў 2021-м, забраўшы тады ўсе індывідуальныя ўзнагароды: найлепшы бамбардзір (16 мячоў), найлепшы асістэнт (8 галявых), найлепшы легіянер і найлепшы футбаліст лігі.
Апошні год форвард правёў ва Узбекістане, дзе з «Наўбахорам» стаў сярэбраным прызёрам чэмпіянату, а з 11 галамі ў актыве ўвайшоў у топ-5 снайпераў лігі.
Дыега Сантас, 24 гады, Бразілія
Пераход: «Залаэгерсег» (Венгрыя) → «Колас» (Украіна) → «Сумгаіт» (Азербайджан), арэнда
У Беларусі бразілец правёў два гады: большую частку ў «Віцебску», але быў у вінгера і трохмесячны адрэзак у «Шахцёры», якому дапамог выйграць залатыя медалі ў 2020-м. Усяго ў беларускіх клубах правёў 62 матчы, у якіх вызначыўся 9 галамі. Улетку 2021-га гулец перабраўся ва ўкраінскі «Колас», але з-за вайны надоўга там не затрымаўся: праз паўгода, калі чэмпіянат прыйшлося спыніць, апынуўся ў арэндзе ў польскай «Ягелоніі», а ўлетку таксама па арэнднай дамове перабраўся ў вугорскі «Залаэгерсег».
Там у Дыега не заладзілася, і зімой ён быў адпраўлены «Коласам» у новую арэнду – у азербайджанскі «Сумгаіт», які яшчэ нядаўна трэніраваў беларускі спецыяліст Аляксей Бага. Цікава, што ў студзені 2022-га, калі Бага прыходзіў у клуб, кіраўніцтва заяўляла, што «Сумгаіт» будзе камплектавацца толькі мясцовымi футбалістамi. Прайшоў год – у ростэры знаходзіцца 10 легіянераў.
