Сын трэнера зборнай Беларусі калісьці спрабаваў зайграць у бацькі ў «міноры» Польшчы – не атрымалася, затое знайшоў жонку ў мясцовым спорце (зараз на яе форме прозвішча мужа)
Сам стаў цырульнікам.
Імя Алега Радушкі вядомае ў беларускім футболе – у цяперашняга памочніка Георгія Кандрацьева па зборнай была значная гульнявая кар'ера (пад 300 матчаў у ЧБ, два срэбра – з «Дняпром» і «Нёманам»), а потым і трэнерская. Але не ўсе ўспомняць, што паўтарыць яго шлях спрабаваў сын – Кірыл Радушка.
Свае першыя крокі ў футболе ён рабіў там, дзе бацька перайшоў з футбалістаў у коўчы – у «Нёмане». Паўабаронца стабільна выклікаўся ва U-зборныя Беларусі, а з 17 гадоў пачаў выступаць за дубль гродзенцаў (у адзін час з Паўлам Савіцкім, які на год маладзейшы за Радушку). Улетку 2010-га Радушка-старэйшы быў звольнены з пасады галоўнага трэнера «Нёмана», а праз паўгода Гродна пакінуў і сын – адправіўся ў «Нафтан» да старога знаёмага бацькі, аднаклубніка па «сярэбраным» «Нёмане»-2002 Ігара Кавалевіча. Праўда, і ў Наваполацку Кірыл выступаў выключна за рэзервовую каманду, так і не правёўшы ні хвіліны ў вышэйшай лізе.
У студзені 2012-га Радушка-старэйшы ўзначаліў эльблонгскую «Алімпію» з польскага Д2, не змог ёй дапамагчы застацца ў лізе і ўлетку пры фармаванні складу на наступны сезон прыцягнуў сына. Так Кірыл нарэшце пачаў гуляць на дарослым узроўні, але яго чатыры галы ў 20 матчах не дапамаглі камандзе выбрацца з Д3. Пасля дэбютнага сезона ў Польшчы Радушка-малодшы нават атрымаў запрашэнне ў маладзёжную зборную Беларусі на еўраадбор ад Аляксея Вергяенкі, але ў матчы супраць Казахстана застаўся на лаўцы запасных, а перад наступнымі яго адчапілі са складу – на гэтым кар'ера ў камандзе і скончылася.
Той сезон так і застаўся адзіным паўнавартасным у футбольнай кар'еры Кірыла – ён, у адрозненні ад бацькі, застаўся ў «Алімпіі» яшчэ на год, але практычна цалкам прапусціў яго з-за разрыву крыжападобных звязак, пасля чаго пакінуў клуб. У лютым 2015-га гулец з'ездзіў на прагляд у брэсцкае «Дынама» і нават забіў за іх мяч у адным з кантрольных спарынгаў, але да падпісання кантракту не дайшло. Больш Кірыл нідзе не засвяціўся і ціха завязаў з футболам.
Неўзабаве Радушка вярнуўся ў Польшчу – проста пераехаў туды жыць. У суседняй з нашай краіне ён стаў працаваць у новай для сябе прафесіі мужчынскага цырульніка, ён жа барбер.
Цалкам магчыма, што працягнуў жыццё ў Польшчы Радушка-малодшы з-за кахання. З 2012-га па 2014-ты за клуб з Эльблонга выступала польская гандбалістка Сільвія Кланоўска – а пазней аказалася, што яны з экс-футбалістам склалі пару. Дзяўчына, якая на месяц старэйшы за выбранніка, усю кар'еру праводзіць у серадняках польскай лігі: у яе актыве няма ні тытулаў, ні медалёў чэмпіянату (максімум – чацвёртае месца), у нацыянальную зборную 30-гадовая спартсменка таксама не выклікалася.
Ужо восьмы сезон Сільвія гуляе за клуб «Пятрковія» з 70-тысячнага горада Пётркаў-Трыбунальскі за 140 км ад Варшавы. У цяперашнім сезоне каманда ідзе на чацвёртым месцы, але адставанне ад тройкі складае 10 ачкоў.
Па выніках 2021 года Сільвія заняла трэцяе месца ў галасаванні за званне спартсменкі года ў Лодзінскім ваяводстве, дзе базуецца «Пятрковія», – тады дзяўчына адзначылася рэкордным для сябе 71 закінутым мячом. У гэтым сезоне ў яе вельмі сціплыя паказчыкі статыстыкі: у 18 сустрэчах закінула 33 мячы (на 55 спроб), рэалізаваўшы свой адзіны сяміметровы. Затое ідзе ў лідарах клуба па колькасці двуххвілінных выдаленняў (12).
А галоўнай падзеяй 2022-га для Кланоўскай, здаецца, стала вяселле з Радушкам-малодшым, якое прайшло ў чэрвені. Вось некалькі кадраў са свята.
Цяпер на форме Сільвіі пад яе сёмым нумарам нанесена прозвішча Радушка.
