Вось як доўга пратрымаліся ў футболе беларускія аднагодкі Ібрагімавіча (той гуляе ў 42!): скончылі ўсе, у тым ліку Глеб і Калачоў, рэкардсмен – памочнік Альшэўскага
Хто ваш любімы гулец таго зорнага пакалення?
Вялікі Златан у канцы лютага вярнуўся ў футбол пасля дзевяці месяцаў аднаўлення пасля разрыву крыжападобных звязак, і за наступны месяц устанавіў адразу некалькі рэкордаў. Ён стаў:
- самым узроставым гульцом «Мілана» у Серыі А з 1994 года,
- аўтарам самага ўзроставага гола ў чэмпіянаце Італіі,
- самым узроставым гульцом у гісторыі адбораў да Еўра.
24 сакавіка Ібрагімавіч выйшаў на поле на 73-й хвіліне матча кваліфікацыі да Еўра-2024 супраць Бельгіі (0:3). Яму на той момант было 41 год і 172 дні. Тое, як выглядае форвард у сваім узросце, уражвае.
У чэмпіянаце Беларусі 40-гадовую мяжу пераадолелі толькі двое дзейных футбалістаў, праўда, не факт, што яны наогул згуляюць у сезоне-2023: Сяргей Верамко заяўлены на сезон як чацвёрты галкіпер «Тарпеда-БелАЗ», а ягоны калега па амплуа Барыс Панкратаў з'яўляецца зменшчыкам Уладзіслава Васлючака ў «Слуцку» – абодва на год маладзейшыя за Ібрагімавіча.
Аднагодкаў жа шведа ў вышэйшай лізе няма: большасць з іх ужо трэніруе. Паглядзелі, як выглядаюць цяпер самыя яскравыя беларускія футбалісты 1981 года нараджэння – амаль 20 гадоў таму яны складалі касцяк моладзевай зборнай Юрыя Пунтуса, якая гуляла на Еўра-2004. Адметна, што Златан на той турнір не ездзіў, хаця мог бы. Але швед рыхтаваўся да дарослага Еўра з нацыянальнай зборнай: тамака ён адзначыўся двума галамі і дабраўся з камандай да 1/4 фіналу.
Аляксандр Глеб
Калі згуляў апошні матч: 30 лістапада 2019 года
Глеб і Ібрагімавіч не паспелі перасекчыся ў «Барселоне» (Глеб з'ехаў у арэнду ў «Штутгарт» роўна тады, калі Златан змяніў «Інтэр» на «Барсу»), але некалькі разоў яны выходзілі на поле разам у якасці супернікаў. У 2006-м, напрыклад, "Арсенал" Глеба ў чвэрцьфінале ЛЧ абгуляў "Ювентус" Ібрагімавіча (2:0, 0:0), а праз чатыры гады "Барса" шведа выбіла з 1/8 фіналу галоўнага еўрапейскага клубнага турніру "Штутгарт" беларуса (1:1, 4:0).
Свой апошні матч у кар'еры Глеб правёў у "Іслачы" ў 2019-м, калі яму было 38, а ўжо ў сакавіку 2020-га аб'явіў пра завяршэнне кар'еры.
Глеб працягвае выходзіць на поле ў якасці аматара: выступае за каманду "Захад-3" у лізе АЛФ, у разгар вайны ездзіў у Маскву на штогадовы турнір "Кубак Легенд", а нядаўна выходзіў на поле супраць расійскага аматарскага клуба з медыяфутбола "Амкала" ў складзе «салянкі» менскага «Дынама».
У матчы супраць «Амкала» на полі з'явіўся яшчэ адзін аднагодак Ібрагімавіча Аляксандр Быліна, які цяпер працуе трэнерам-аналітыкам у «Дынама». Ён буцы на цвік павесіў таксама ў 2019-м, а апошнім клубам сталі "Крумкачы".
Аляксей Бага
Калі згуляў апошні матч: 16 кастрычніка 2010 года
Капітан той самай беларускай «маладзёжкі» кар'еру гульца завяршыў неўзабаве пасля таго, як Ібрагімавіч перабраўся з «Барселоны» ў «Мілан». Сканчваў Аляксей у 29 гадоў у Брэсце, дзе правёў тры гады, а ўжо ад сезона-2011 перайшоў на трэнерскую працу, стаўшы памочнікам Віктара Ганчарэнкі ў Барысаве. Там і перасекліся шляхі Багі і Ібрагімавіча: «Мілан» трапіў у адну групу з БАТЭ ў групавым раўндзе ЛЧ-2011/12. Златан забіў барысаўчанам і ў Мілане (2:0), і ў Мінску (1:1).
Цяпер Бага-старэйшы - галоўны трэнер салігорскага "Шахцёра", куды вярнуўся пасля няўдалага адрэзка ў азербайджанскім "Сумгаіце", а адным з яго памочнікаў з'яўляецца яшчэ адзін экс-удзельнік Еўра-2004 Валерый Тарасенка. Абаронца скончыў з футболам як гулец пасля сезона-2015, апошнім яго клубам стала «Славія».
Юрый Жаўноў
Калі згуляў апошні матч: 4 снежня 2015 года
Кар'еру ўраджэнец Добруша скончыў ранавата (яму было ўсяго 34), асабліва калі ўлічваць, што футбольны век галкіпера звычайна крыху даўжэйшы, чым у палявога гульца. Віной таму траўмы, якія мучылі Жаўнова апошнія гады і заміналі поўнай меры раскрыцца ў тым жа "Зеніце", дзе ў яго былі шанцы замацавацца ў аснове. Апошнім клубам Юрыя стаў "Урал".
Праз год пасля адмовы ад статусу прафесійнага гульца Жаўноў увайшоў у трэнерскі штаб Ігара Крывушэнкі ў зборнай, а з верасня 2018-га і дагэтуль займае пасаду другога трэнера варатароў у асноўнай камандзе «Зеніта».
Дзмітрый Молаш
Калі згуляў апошні матч: 30 лістапада 2015 года
Удосталь пакалясіўшы па расійскіх лігах, у 2012-м абаронца вярнуўся на Радзіму, падпісаў кантракт з мінскім «Дынама» і там жа праз тры гады завяршыў кар'еру, калі яму было 33.
Трэнерам жа стаў у Барысаве. Праўда, пачынаў з юнацкіх каманд і да пасады галоўнага так і не дайшоў: спачатку быў памочнікам Алега Дулуба, а пасля Аляксея Багі. Пасля паўтарагадовай пабыўкі ў латвійскай «Ліепаі» (там узяў першы трафей у якасці галоўнага трэнера – Кубак краіны) Молаш узначаліў «Тарпеда-БелАЗ», дзе працуе ўжо другі сезон.
Цімафей Калачоў
Калі згуляў апошні матч: 26 траўня 2019 года
Вінгер з Магілёва большую частку кар'еры правёў у "Растове": прыехаўшы туды летам 2005-га, выступаў на поўдні Расіі да лета 2019-га, калі і вырашыў павесіць буцы на цвік у 38-гадовым узросце. Там жа адбылася вочная дуэль Калачова і Ібрагімавіча: у сакавіку 2017-га "Растоў" у 1/8 Лігі Еўропы трапіў на "МЮ", за які тады выступаў зорны швед. Першая гульня ў Расіі скончылася ўнічыю 1:1, Калачоў і Ібрагімавіч зарабілі па асісту, а Цімафей яшчэ і жоўтую картку на Златане - праз яе прапусціў матч у адказ на «Олд Трафардзе» (там англічане перамаглі 1:0 і прайшлі далей, узяўшы ў выніку трафей).
З лета 2021-га Калачоў уваходзіць у трэнерскі штаб «Чайкі» з расійскага Д3: там ён пачаў як памочнік Сяргея Ташуева, цяпер асістуе экс-гульцу зборнай Расіі Ігару Сямшову. Былы краёк нацыянальнай зборнай ці не адзіны з беларусаў-ветэранаў можа параўнацца са Златанам у фізічнай форме.
Павел Бяганскі
Калі згуляў апошні матч: 26 верасня 2015 года
Кар'ера фактурнага нападаючага была напоўненай падарожжамі: Павел гуляў у 12 клубах, засвяціўся ў трох замежных чэмпіянатах (Казахстан, Украіна і Румынія). Сканчваў жа ў рагачоўскім «Дняпры» ў другой лізе - на той момант форварду было 34.
З верасня 2018-га працуе ў дзіцячай школе «Іслачы», дзе трэніруе дзяцей дзвюх узроставых груп.
У трэнерскім штабе першай каманды «ваўкоў» ёсць яшчэ адзін прадстаўнік той моладзевай зборнай - экс-абаронца Раман Кірэнкін. Ён завяршыў гульнявую кар'еру ў "Шахцёры" пасля сезона-2012 у 31 год.
Яшчэ адзін аднагодак Ібры са штаба «Іслачы» - Дзмітрый Макар. Ён завяршыў кар'еру 35-гадовым пасля сезона-2016.
***
Крайні абаронца Аляксей Панкавец кар'еру скончыў у 36 у «Тарпеда-БелАЗ». Летась быў асістэнтам Арцёма Чалядзінскага ў мінскім «Дынама», зараз дапамагае Сяргею Кузняцову ў літоўскай «Дайнаве».
Павел Кірыльчык - адзін з галоўных футбольных доўгажыхароў той зборнай: апошні матч правёў у 39 за дзяржынскі "Арсенал" у Д2. Тамсама пачалася трэнерская кар'ера. Ён дапамог клубу ўпершыню выйсці ў элітны дывізіён, дзе "кананіры" надоўга не затрымаліся, а Кірыльчык пасля вылету ў стыкавых матчах сышоў у адстаўку. Цяпер з'яўляецца свабодным агентам.
Кірыльчыку ў мінулым сезоне дапамагаў яго партнёр па "маладзёжцы" Ігар Ражкоў. Менавіта ён з'яўляецца самым узроставым футбалістам таго пакалення: на момант апошняй гульні за "Арсенал" Дзяржынск у сезоне-2021 Ражкову было 40 гадоў і 3 месяцы. Цяпер уваходзіць у штаб Кірыла Альшэўскага ў БАТЭ.
Хаўбек Віктар Сокал год аднуляў на Радзіме Ібрагімавіча, але з ім на футбольных палях не перасякаўся. Сканчаў кар'еру ў 33-летнім веку ў «Іслачы», тамака ж пачынаў трэнерскую, працуючы з дзецьмі і пазней з дублем. У кастрычніку 2020-га вярнуўся ў роднае мінскае «Дынама», дзе трэніруе юнацкія каманды.
Дзяніс Сашчэка нарадзіўся з Ібрагімавічам у адзін дзень і скончыў з футболам пасля сезона-2016 у складзе мінскага «Тарпеда» - яму на той момант было 35. Трэнерам у адрозненне ад шматлікіх партнёраў па маладзёжцы ён не стаў, але пры гэтым часта выходзіць на поле ў складзе "Захаду-3" у мінскай АЛФ.
