Шыкаўка зрабіў дубль у Польшчы пасля выхаду на замену – для гэтага спатрэбілася ўсяго 18 хвілін
Аднак каманду гэта не выратавала.
Беларускі форвард польскай «Кароны» Яўген Шыкаўка вызначыўся дублем у матчы супраць «Легіі» ў рамках польскай Экстракласы. Беларус выйшаў на замену на 61 хвіліне матча пры ліку 0:3 не на карысць «Кароны», і ўжо праз чатыры хвіліны вызначыўся першым узяццем варот. Шыкаўка філігранна ўцёк ад абаронцы «Легіі» і з лёгкасцю прашыў брамніка сапернікаў.
Яшчэ праз 14 хвілін Яўген скарыстаўся памылкай абаронцаў і спакойна ўцёк на рандэву з галкіперам. У брамніка не было шанцаў – так Шыкаўка аформіў дубль.
Аднак дубль беларуса не дапамог яго камандзе – «Карона» саступіла з лікам 2:3 і пасля 18-тураў ідзе на апошнім месцы ў чэмпіянаце Польшчы.
У гэтым сезоне Шыкаўка прыняў удзел у 15 матчах, забіў два мячы і зрабіў адзін асіст. У Кубку Польшчы Яўген з'явіўся на полі ў двух матчах і вызначыўся двума галамі.