«Калі да футбола такая цікавасць, дык што мне каментаваць». Галоўнага трэнера ФК «Мінск» раз'юшыла адсутнасць журналістаў на прэс-канферэнцыі
Уся «прыгажосць» беларускага футбола 💁♂️
На прэс-канферэнцыі пасля матчу 11-га тура чэмпіянату Беларусі, у якім «Мінск» саступіў брэсцкаму «Дынама» (0:1), галоўны трэнер сталічнай каманды Сяргей Яромка быў незадаволены колькасцю журналістаў, якія прысутнічалі на гэтай самай прэс-канферэнцый.
«Калі тут сабралася так шмат журналістаў, то я буду кароткі і лаканічны. Крыўдна па такой гульні, вядома, прайграваць, але апраўдвацца мы не будзем. Прайгралі – значыць, прайгралі. Робім высновы, ідзем далей. Дзякуй», - так пачаў прэс-канферэнцыю Яромка.
«Калі да футбола такая цікавасць, тут знаходзіцца тры прадстаўнікі футбольнага клуба «Мінск» і адзін прадстаўнік футбольнага клуба «Дынама» Брэст, дык што мне каментаваць», - працягнуў сваю прамову галоўны трэнер Мінска.
Пасля такога палымянага пачатку трэнер усё ж такі працягнуў прэс-канферэнцыю.
Адзначым, што ФК «Мiнск» не перамагае ўжо 9 матчаў запар. Апошні раз падапечныя Яромкі набіралі тры ачкі ў матчы першага туру супраць «Славіі» (2:0). Пасля адзінаццаці тураў сталічная каманда займае 10-е месца ў турнірнай табліцы ЧБ.
У сваю чаргу брэсцкае «Дынама» перамагло ўпершыню за 5 матчаў. На дадзены момант каманда Аляксандра Юрэвіча займае 11-е месца.