Артур Удрыс: «Прыйшоў чалавек і па яго загаду ўзялі 10-20 медалёў – спорт так не працуе. Тут трэба думаць, а не механічна выконваць»
Беларускі валейбаліст Артур Удрыс, які вывучае псіхалогію, распавёў Telegram-каналу «О, спорт! Ты – мир!», як змяніць сістэму спорта ў Беларусі, каб яна не ламала спартсменаў.
– Наколькі моцна ўплывае ціск на спартоўцаў?
– Складана ацаніць уплыў на кожнага. Але я заўсёды злаваўся, калі мне казалі падобныя рэчы.
Калі атлет пастаянна знаходзіцца ў такой сістэме, пад падобным ціскам, ён адчувае страх памыліцца, павялічваецца кошт памылкі. І спартсмен жыве і працуе ў пастаянным страху. У нармальнай сістэме, калі ты памыліўся, табе дадуць магчымасць зрабіць высновы, падумаць, усё прааналізаваць, і ў будучыні ты гэтую памылку ўжо не дапусціш. А там, дзе спартсмен, па сутнасці, ніхто, дзе яму выклікаюць, што ён абавязаны быць удзячны дзяржаве, – там кошт памылкі ўзрастае, атлет пастаянна баіцца. А чым больш баішся, тым больш памыляешся. Натуральна, у такім стане аб дасягненні нейкага выніку казаць не даводзіцца.
Што яшчэ мы назіраем у Беларусі: калі хтосьці памыляецца, ён адразу ўсю віну імкнецца перакласці на іншага. Вось, маўляў, гэта яны недапрацавалі, не выконвалі нейкія ўстаноўкі, правілы і гэтак далей. Робіцца гэта, таму што чалавек банальна баіцца прызнаць сваю памылку. У нармальным грамадстве чалавек не будзе баяцца памыліцца і прызнаць, што сам дзесьці не тое зрабіў. І ён будзе ведаць, што яму дадуць шанец усё выправіць, прааналізаваць. А ў Беларусі сістэма дысфункцыянальная.
– Як жа памяняць сістэму?
– Павінны прыйсці ў спорт людзі, якія не будуць карыстацца сваімі звыклымі спосабамі кіраўніцтва. Кажуць, каб выхаваць псіхічна здаровага дзіцяці, трэба самому быць псіхічна здаровым. Гэтак жа і са спартоўцамі. Чыноўнік, які прывык у войску на ўсіх крычаць і ўсім загадваць, не можа разумець, як выхаваць высакакласнага спартсмена. Не будзе працаваць усё так, што прыйшоў чалавек і па яго загадзе атлеты ўзялі 10-20 медалёў. Не працуе так спорт. У гэтай сферы трэба думаць, а не тупа выконваць усе механічна і па загадзе. Так нічога не атрымаецца дасягнуць, што мы неаднаразова назіраем у Беларусі, – сказаў Удрыс.
