Домрачава, Скардзіна і Кінунен – ​​даўнія сяброўкі: не перашкаджае ні адлегласць, ні розныя пазіцыі ў 2020-м

27 сакавіка Надзея Скардзіна адзначыла сваё 40-годдзе. Святкаваць юбілей яна адправілася ў Нарвегію – адну з некалькіх краін, на якія жыве Дарʼя Домрачава. Там жа аказалася яшчэ адна былая біятланістка зборнай Беларусі Анастасія Кінунен, якая асела ў Фінляндыі. Цёплае сумеснае фота вы можаце бачыць вышэй.

Скардзіна ў інстаграме падзякавала сябровкам за свята. А ў нядаўнім інтэрвʼю распавяла наконт Домрачавай: «Гэта сяброўства, праверанае часам. І яно не згасае, нягледзячы на ​​адлегласці і акалічнасці». Успомнім гісторыю гэтых узаемаадносін і тое, якія «акалічнасці» ў іх асабліва памятныя.

Дзяўчаты сябруюць з юнацтва. Два дзесяцігоддзі таму яны амаль сінхронна перайшлі ў зборную Беларусі – Домрачаву вярнулі пасля жыцця ў Расіі, Скардзіна з той жа краіны натуралізавалі. З 2006-га дзяўчаты пачалі разам выступаць на Кубку свету. Яны жылі ў адным нумары падчас спаборніцтваў. Пазней у сацыяльных сетках дзяліліся настальгічнымі фатаграфіямі даўніх часоў.

Дзве біятланісткі па кар’еры нярэдка разам адпачывалі і ўспаміналі адна адну добрым словам у сацсетках. Напрыклад, Скардзіна называла Домрачаву «крошка» і «каманднае сонейка», дзякавала «за падтрымку з самага пачатку біятлоннага шляху». Домрачава пісала пра Скардзіна «малышка» і дадавала, што з ёй «заўсёды найпрыемнейшыя сустрэчы».

У кастрычніку 2016-га ў Домрачавай нарадзілася першая дачка – Ксенія. Роля лідара беларускай зборнай перайшла да Скардзіна. Тая казала, што аказалася пад вялікім ціскам у адсутнасці сяброўкі, маўляў, заўзятары прывыклі да яе яркіх перамог. А яшчэ расказала, што пастаянна знаходзіцца на сувязі з Домрачавай і з нецярпеннем чакае яе вяртання не толькі як сяброўка, але і як спартсменка, каб паганяцца на трэніроўках.

Скончылі з біятлонам сяброўкі таксама адначасова – пасля сезона-2017/18, у якім разам узялі алімпійскае золата ў эстафеце. Скардзіна абвясціла пра сыход на пару тыдняў раней за Домрачаву. Абедзве тады праігнаравалі просьбу Аляксандра Лукашэнкі, які хацеў, каб спартсменкі яшчэ выступалі і «прывялі змену».

Лукашенко просил Домрачеву и Скардино остаться – обе ответили нет

У кастрычніку 2018-га Домрачава запускала свой брэнд адзення. Прайсціся па подыўме і паўдзельнічаць у фотасесіі, сярод іншых зорак, запрасіла і сяброўку. Пасля Скардзіна дзякавала Домрачавай за магчымасць «адчуць сябе мадэллю».

У жніўні 2019-га Скардзіна выйшла замуж за швейцарскага біятланіста Марціна Ягера. Сведкай была Домрачава, якая ў падарунак сяброўцы замовіла на вяселле неназваны беларускі фолк-гурт.

Настасся Кінунен – тады яшчэ з прозвішчам Дубарэзава – далучылася да біятлоннай зборнай Беларусі ў 2010-м, перайшоўшы з лыжных гонак. Дзяўчыны хутка знайшлі агульную мову. А ў жніўні 2012-га трыа зняло вось такі забаўны ролік. У 2018-м Скардзіна назаве кампанію «каманда маладосці нашай».

Тры біятланісткі па-рознаму рэагавалі на падзеі вакол беларускіх выбараў 2020-га. Падчас электаральнай кампаніі Домрачава сыпала кампліменты рэжыму, адзначаючы падтрымку спорту з боку дзяржавы, заклікала шанаваць мірнае неба, у чым вылучала заслугу нібыта Лукашэнкі. Калі дасягнулі піка зверствы «сілавікоў» у першыя дні пасля фальсіфікацыі вынікаў, Домрачава абмяжавалася абцякальнымі фразамі пра недапушчальнасць гвалту і неабходнасць дыялогу. Не памянялася рыторыка экс-біятланісткі нават пасля збіцця «сілавікамі» яе роднага брата Мікіты, які проста трапіў пад раздачу, калі ехаў да маці.

Беларусы ведут себя как герои и ждут от вас того же. Даша, вот почему ваше письмо многих огорчило

Скардзіна ж заняла больш жорсткую пазіцыю. Яшчэ да саміх выбараў яе негатыўна ўразіў разгон чэргаў да крамы symbal.by. Таксама яна расказвала, што яе знаёмыя спрабавалі стаць незалежнымі назіральнікамі, але нікога з іх рэжым не дапусціў. Пасля зверстваў сілавікоў Скардзіна падтрымала пратэстоўцаў. А на збіццё Мікіты Домрачава, адрэагавала хутчэй і ярчэй за сяброўку – назвала носьбітаў формы «слабавікамі». У кастрычніку 2020-га Скардзіна паставіла тысячны подпіс пад лістом беларускіх спартсменаў за сумленныя выбары.

Скардино русская, но ее сердце болит за Беларусь: хейтила ОМОН из-за брата Домрачевой, боится за имидж страны

Кінунен жа зверствы сілавікоў не каментавала. У ліпені 2020-га, калі ў Беларусі ўжо кінулі за краты самых бачных апанентаў рэжыму, біятланістка заявiла, што ў яе невялікія веды ў палітыцы, і выказала надзею, што беларусы абяруць лідара і пойдуць за ім. На гэтым развагі па тэме і скончыліся.

Але розныя адносіны да 2020-га, відавочна, не паўплывалі на сяброўства. Дзяўчыны працягваюць бачыцца, нягледзячы на тое, што жывуць усе ў розных краінах. Сям’‎я Домрачавай з экс-біятланістам Уле Эйнарам Б’‎ёрндаленам жыве то ў Беларусі, то ў Нарвегіі, то ўвогуле ў Манака. Скардзіна з мужам пасялілася ў Швейцарыі, хаця нядаўна распавяла, што сумуе па беларускіх абшарах. Кінунен яшчэ ў 2016-м выйшла замуж за фіна, пераехала ў Фінляндыю і нават паспела правесці некалькі сезонаў за зборную гэтай краіны.

Тым не менш сустрэчы адбываюцца, пра што сяброўкі публікуюць сведчанні ў сацсетках. Вось фота з красавіка 2021-га – Скардзіна тады пісала, што кампанія ўбачылася ўпершыню за два гады.

А гэта Домрачава і Скардзіна ў красавіку 2022-га.

Праз паўгода сяброўкі сустрэліся ў Манака – для гэтага Скардына прыйшлося выбудаваць складаную лагістыку.

У 2024-м дзяўчаты зноў сабраліся ўтрох. Тады яны паўдзельнічалі ў чэленджы па зборы сродкаў для дачкі беларускай бягухі Марыны Арзамасавай. Дзяўчынка да гэтага часу аднаўляецца ад наступстваў цяжкага і рэдкага захворвання.

Дачка беларускай чэмпiёнкi свету амаль год змагаецца з цяжкай хваробай – цяпер на далёкiм востраве, адкуль ёсць добрыя навiны

I вось сёлета сяброўкі сабраліся на юбілей Скардзіна. Дарэчы, Кінунен сваё 40-годдзе адсвяткавала таксама нядаўна – 14 сакавіка. Домрачава крыху маладзейшая – 3 жніўня ёй споўніцца 39.