Смольская абурылася, што ёй з мужам недаплацілі ў Расіі – і пачула папрок у нахабстве. А вось колькі сям'я зарабіла за сезон

У апошнія дні біятлоннага сезона-2024/25 прадстаўнікі зборнай Беларусі моцна накацілі на расіян, і гаворка не пра змаганне на дыстанцыі, хаця і там бывае горача ледзь не да кулакоў.

Задзірлівы беларус у біятлоне не першы раз счапіўся з расіянамі – але гэта выключэнне. У асноўным жа сябруюць да глыбіні душы

У пятніцу пасля спрынту Кубка так званай Садружнасці выступіла Дзінара Смольская. Лукашыстка перамагла, але засталася вельмі незадаволенай станам трасы ў Мурманску:

– Цікавая гонка, але выкласціся па дыстанцыі не ўдалося. Адзін участак гатовы жахліва, хочацца звярнуць увагу арганізатараў на гэты момант. Так траса не павінна быць гатовая да міжнародных спаборніцтваў, – заявіла Смольская, дадаўшы, што ў яе стаміліся ногі ды яшчэ ўспаліліся надкосніцы.

Але тое не ўсё. На наступны дзень экс-Алімбекава на пару з Ксеніяй Вараб'ёвай узяла срэбра ў эстафеце, а яе муж Антон Смольскі – бронзу на пару з Паўлам Бялько. У сваім Telegram-канале лідарка зборнай Беларусі напісала, што «хлопцы і дзяўчынкі бегалі бясплатна», маўляў, прызавыя за гэтыя гонкі не прадугледжаныя. На адрас Саюзу біятланістаў Расіі прагучала прэтэнзія: «Як так?»

Словы беларускі ў СБР абверглі цягам двух гадзін. Дырэктар арганізацы Аляксандр Пак заявіў, што грошы за мужскую і жаночыя эстафеты прадугледжаны такія ж, як за змешаную эстафету. У непаразуменні чыноўнік звінаваціў трэнераў.

– Палажэнне з усімі правіламі правядзення спаборніцтваў, у тым ліку і пра тое, якія будуць прызавыя, было агучанае на сходзе каманд. Чаму трэнеры не давялі гэтую інфармацыю да спартсменаў, я сказаць не магу, – пракаментаваў Пак.

Смольскай засталося толькі аджартавацца – маўляў «расходзімся, усё будзе». Але ад хэйту з боку расійскіх аматараў біятлона гэта не ўратавала. Некаторым з іх не спадабалася, што прыхільніца рэпрэсій чымсьці незадаволеная – яе звінавацілі ў нахабстве і прапанавалі правесці наступны сезон у Беларусі.

Але фінансавая трывога Смольскай зразумелая – яны з Вараб'ёвай выйгралі штосьці каля 4 тысяч долараў. Увогуле, у адрозненні ад чэмпіянату Расіі, дзе апошнім часам шмат гаварылі пра дыскрымінацыю беларусаў (выступалі па-за залікам і без права на медалі з прызавымі), на Кубку так званай Садружнасці грамадзяне Беларусі нават маглі разлічваць на большыя прызавыя, чым гаспадары, прычым так было цягам усяго сезона.

Калі падлічыць у адпаведнасці з прызавымі месцамі, то можна зрабіць выснову, што ў Расіі сям'я Смольскіх змагла зарабіць. На тамашніх этапах Кубку Садружнасці экс-Алімбекава зарабіла 25 тысяч долараў, Антон Смольскі – яшчэ 32 тысячы долараў.

На так званай «Міжнароднай лізе клубнага біятлона» Антон Смольскі атрымаў 3,7 тысячы долараў (бронза ў мас-старце і эстафеце), яго жонка – 1,5 тысячы (8-я ў мас-старце і бронза эстафеты).

У Беларусi прыдумалi «лiпу», каб бiятланiсты зарабiлi у Расii – тыя атрымалi амаль у 5 разоў менш, чым летась, ды яшчэ пасварылiся

Агулам сям'я Смольскіх набегала і настраляла на Кубку Садружнасці і «МЛКБ» 62 тысячы долараў. І гэта без уліку прызавых на чэмпіянаце і Кубку Расіі, якія, як распавядаў Антон Смольскі ў верасні, асобна выплочвае рэжымнае міністэрства спорту, федэрацыя біятлона і спонсары. Калі выплаты робяцца згодна з цэннікам СБР, на гэтых турнірах пара атрымала 11 тысяч долараў прызавых – агулам ужо $73 тысячы.

Быў яшчэ і «Кубак наймацнейшых спартсменаў» у Раўбічах, дзе таксама прадугледжваліся салідныя прызавыя: 1,8-3,5 тысячы долараў за перамогу ў асабістых гонках і эстафеце 1+1; 5,6-7 тысяч долараў за эстафету 2+2. Смольскія, дзякуючы сваім поспехам, атрымалі 27 тысяч долараў.

У суме за гонкі сезона-2024/25 Антон і Дзінара Смольскія выйгралі 100 тысяч долараў прызавых. Быццам бы і не кепска, але на міжнародных спаборніцтвах, ад якіх беларусы і расіяне адхіленыя праз вайну ва Украіне, круцяцца зусім іншыя грошы. Пераможца гонкі на этапе Кубка свету атрымлівае 15 тысяч еўра, за другое месца давалі 12 тысяч, за трэцяе – 10. 10-е месца ацэньвалася ў 3,5 тысячы, 15 – у 2.

Канкурэнцыя, зразумела, непараўнальна вышэйшая, але і даходы адпаведныя. Пераможца агульнага заліку ў мужчын нарвежац Стурла Лагрэйд за сезон зарабіў 351 тысячу еўра, а яго суайчыннік Тар'ей Бё, які стаў 8-м па прызавых, – 123,5 тысячы.

Пераможца сезону ў жанчын немка Францыска Пройс стала багацейшай на 364 тысячы еўра, а восьмай па прызавых аказалася францужанка Жанна Рышар – 133 тысячы.