Трэнер салігорскага «Партызана» Януш: «У першай лізе сярэдні заробак каля 700-1000 беларускіх рублёў, а ў шахце – мінімум 2000 рублёў. Таму мы не пайшлі ў першую лігу»

Галоўны трэнер салігорскага «Партызана», які выступае ў другой лізе, Мікалай Януш распавёў, чаму каманда не падавала заяўку на ўдзел у першай лізе, хаця мела на гэта права.

- Кім у асноўным укамплектаваны «Партызан»?

– У асноўным гэта мясцовыя салігорскія хлопцы. Шмат людзей, якія не адзін год займаліся ў акадэміі «Шахцёра», але потым сышлі ў вытворчасць. Большасць з іх дайшлі да дубля, але потым так і не сталі прафесійнымі футбалістамі. На прафесійным узроўні пагулялі два ці тры гульцы.

- Гэта значыць, што большасць вашых футбалістаў не стала прафесіяналамі, бо проста на шахце ў Салігорску можна зарабіць нашмат больш, чым, напрыклад, у камандзе першай лігі?

– Менавіта! Я гэта зразумеў, калі яшчэ гуляў за «Шахцёр». Справа ў тым, што ў гульцоў дубля асноўная канкурэнцыя не з гульцамі асновы, а з шахтай. Многія футбалісты не вытрымлівалі нагрузкі псіхалагічна і сыходзілі працаваць на «Беларуськалій». Цяпер, калі быць аб’ектыўным, у першай лізе сярэдні заробак колькі? 700-1000 беларускіх рублёў. А ў шахце чалавек заробіць мінімум 2000 рублёў. І гэта адна з прычынаў, чаму мы не пайшлі ў гэтым годзе ў першую лігу. Ніхто з нашых футбалістаў не сыдзе са сваёй працы дзеля таго, каб гуляць у першай лізе. У нас застаўся класны, баяздольны калектыў, і пакуль мы будзем гуляць у другой лізе і паціху развіваць клуб, – расказаў Януш.