Жодзінска-барысаўская туса на яхце ў Дубаі, «мядовы месяц» са сланамі на Балі – дзе і як адпачывае беларускі футбол
Гутар на футболе ў Рыме, а Баркоўскі наведаў Парыж.
Футбольны сезон у Беларусі скончыўся амаль для ўсіх каманд. Выключэнне – мінскае «Дынама», якое 19 снежня згуляе, хутчэй за ўсё, апошні матч на групавым этапе Лігі канферэнцый.
Да таго ж скончыліся ці сышлі на паўзу і замежныя чэмпіянаты, дзе гуляюць легіянеры-беларусы. Таму адпачываць ім нішто не перашкаджае. Паглядзелі, у якіх краінах і як яны гэта робяць.
Як і ў мінулым годзе, у вакацыйным топе беларускіх гульцоў – Бліжні Усход і Азія.
У Дубаі разам з жонкай адпачывае Яўген Шыкаўка – форвард польскай «Кароны» і зборнай Беларусі.
Другі год запар у сталіцы ААЭ тусяць футбалісты «Тарпеда-БелАЗ». Зноў-такі на яхце, але іншым складам – Даніла Нячаеў, Максім Мякіш, Вадзім Пабудзей, Ілля Васілевіч і Цімафей Шаркоўскі. Да іх кампаніі далучыліся гульцы БАТЭ Віктар Сотнікаў і Аляксандр Мартынаў, а яшчэ былы расійскі «белазавец» Кірыл Глушчанкоў, які цяпер боўтаецца з «Ніжнім Ноўгарадам» Віктара Ганчарэнкі паблізу ад зоны вылету РПЛ.
У азіяцкім Тайландзе сабралася іншая беларуская кампанія – Ягор Філіпенка, Валерый Бачароў, Арцём і Мікіта Гурэнкі. Яны адпачываюць на Пхукеце, дзе на днях зладзіў дэбош бос каманды з Д3 Беларусі – для яго вакацыя можа скончыцца турмой.
Бачароў вельмі пранікнуўся тамтэйшым вайбам.
На тым жа востраве знаходзіцца найлепшы абаронца вышэйшай лігі-2024 Сяргей Карповіч – песціць жонку мясцовымі гастранамічнымі вынаходствамі і рамантыкай.
На матэрыковай частцы Тайланда адпачываюць Уладзіслаў Малькевіч і яго жонка Карына. Пара завітала да сланят.
На інданэзійскім востраве Балі праводзяць «мядовы месяц» Аляксей Бутарэвіч і яго новаспечаная жонка – Алёна. Маладзёны адгулялі вяселле 7 снежня, а на днях каталіся на слане.
Яўген Бярозкін і Мікалай Золатаў выправіліся сем’ямі на Мальдзівы.
Ёсць сярод беларускіх футбалістаў і тыя, хто праводзіць вакацыі ў Еўропе.
Найлепшы форвард і самы карысны гулец чэмпіянату Беларусі-2024 Герман Баркоўскі наведаў Парыж: паглядзеў з сябрукамі на Эйфелеву вежу і Сабор Парыжскай Маці Божай, які нядаўна адкрыўся пасля рэстаўрацыі ад пажару ў 2019 годзе.
Брамнік «Мінска» Аляксандр Гутар з сям’ёй адпачывае ў Рыме. Апроч іншага Гутары завіталі на футбол – глядзелі за матчам «Ромы» супраць «Брагі» ў Лізе Еўропы (3:0).
Галкіпер не першы раз у адпачынку вядзе сям’ю на футбол: у снежні 2023-га быў «Баер» з Бундэслігі.
Ды і для жонкі брамніка «Мінска», Марыны Някрасавай, Італія – не чужая краіна.
А вось галкіпер «Нёмана» Максім Бялоў, які ў першым паўнавартасным для сябе сезоне правёў 18 «сухіх» гульняў у вышэйшай лізе, пакуль што адпачывае ў роднай Лідзе. Там ён наведаў музей «Лідскага піва», адкуль выдаў такі кантэнт.
Другие посты пользователя
