Што расказваюць беларускія футбалісты пра сваё жыццё ў Партугаліі: лозунгі СССР, танцы з сябрам ды жартачкі
Пра спорт таксама ёсць.
Мы ў апошнія гады абвыклі, што калі спартсмен актыўна вядзе сацсетку, то гэта напэўна Instagram. Аднак ёсць і тыя, хто развівае свае каналы ў месенджары Telegram. Чаго толькі вартыя «кружочкі» ад экс-варатара зборнай Беларусі Генадзя Туміловіча.
Даволі цікавыя каналы знаходзяцца ў экс-гульцоў мінскага «Дынама», якія цяпер выступаюць у Д2 Партугаліі: Уладзіслаў Марозаў – за «Пасуш», а Трафім Мельнічэнка – за «Порту Б». На першага падпісаныя 172 чалавекі, за жыццём другога назіраюць 275. А вось што публікуюць футбалісты.
Марозаў завёў канал у жніўні мінулага года. Спачатку паказваў трэнаванні, мясцовую ежу, тое, як бавіць час. Атрымліваўся гэткі лайфстайл-блог пра паўсядзённае жыццё.
Апошнім часам, здаецца, Марозаў арыентуецца на расіяніна Мікалая Васіленку – ён разбагацеў на каламутным алкагольным бізнесе ў пачатку 2000-х, а цяпер займаецца нерухомасцю і блогерствам. У сацсетках, як можа, транслюе пазітыў – а яго пастаянны заклік «Усміхайцеся, сябры» стаў мемам. Цяпер Марозаў часцяком зычыць сваім падпісчыкам добрага дня і больш усміхацца.
Зрэшты, і мем-відэа з Васіленкам на канале Марозава прысутнічаюць.
Часам футбаліст дэманструе свае хобі. Вось так ён грае на гітары і спявае «Пачак цыгарэт» Віктара Цоя.
Добра атрымліваецца ў Марозава адпраўляць мячы ў баскетбольны кошык.
Паказвае футбаліст і трэніроўкі, і аднаўленне.
Сваіх падпісчыкаў Марозаў таксама спрабуе матываваць на спорт – прычым з дапамогай савецкага стылю лозунгаў.
Распавядаў Марозаў і пра любоў да Крышціяну Раналду.
– Цяпер еду ў машыне, слухаю радыё, і проста на кожнай станцыі віншуюць Раналду з днём нараджэння! Тут ён абраз, ён увогуле найлепшы – для мяне таксама. Без крыўд, але для мяне ён лепшы за Месі. Зараз напішу Крышціяну ў Instagram, таксама павіншую. Думаю, ён чакае. А то столькі зранку зрабіў, а яго не павіншаваў! – усміхаўся беларускі футбаліст.
Хапае ў Марозава і гумару з забаўкамі. На новы год праз сугучнасць прозвішча спартсмен прыкідваўся Дзедам Марозам.
Можа пажангляваць мандарынамі ў краме.
Паказаць афішу мюзікла з назвай «Pênis» (з партугальскай тое ж самае, што і ў беларускай) ці пажартаваць са сваёй дзяўчыны Аліны.
Праўда, час ад часу Марозаў закідвае канал – не было публікацый з верасня па лістапад, апошняя зробленая 8 лютага. Але ж актыўнасць у сацсетках вымагае свабоднага часу, якога прафесійнаму спартсмену можа бракаваць падчас сезона.
Што тычыцца Мельнічэнкі, то ён мае канал напалам з сябрам па мінскаму «Дынама» Мікітам Дземчанкам. Хлопцы завялі канал за некалькі месяцаў да Марозава – у красавіку мінулага года. Асноўны від кантэнту – «чэкін» ў люстэрках гатэляў, дзе спынялася «Дынама» падчас выяздных матчаў.
Гумар і сяброўскі тролінг таксама прысутнічаюць. То адзін другога карытам назаве, то пастухом за нулявую выніковасць. 5 верасня, калі Мельнічэнка стаў самым маладым дэбютантам у гісторыі зборнай Беларусі, ён выклаў фота, дзе абдымаў пустату – Дземчанка дэбютаваў за зборную толькі праз два месяцы.
Увогуле сяброўства хлопцаў даволі шчыльнае, нават на студзеньскім адпачынку ў Дубаі, адкуль Мельнічэнку давялося тэрмінова ехаць на медагляд перад трансферам у «Порту», яны былі разам. А вось так пранікнёна ўжо экс-партнёры танцавалі адзін з адным.
Як і ў Telegram-канале Марозава, можна падзівіцца на спевы – вось як Мелнічэнка выконваў англамоўную Save your tears ад The Weeknd.
Апошні сумесны відэакружок Мельнічэнкі і Дземчанка быў 5 студзеня, пасля чаго канал сыйшоў на месяцовую паўзу. Вяртанне адбылося 12 лютага.
– Знаходзіцца адзін з адным не можам, але вырашылі, што будзем рабіць кружочкі, фоткі, проста асобна адзін ад аднаго. У большай ступені я, таму што трэба адцягваць сябе неяк, – напісаў Мельнічэнка.
У той жа дзень нападнік падзяліўся поспехамі ў кулінарыі: зрабіў пюрэ з катлетамі і ўспомніў іншае гатаванне. Адзначым, менавiта памёрлай бабулі прысвечана тату форварда ў выглядзе пацалунка на шыі.
Таксама футбаліст прадэманстраваў здольнасці ў партугальскай.
Увогуле ж кантэнту пасля ад'езда Мельнічэнкі ў Партугалію стала меней (што ў цэлым і не дзіва), але павіншаваць сябра з перамогай у Суперкубку нападнік не забыўся: «Дзёму з перамогай, а мне трэба больш працаваць над сабой».
А 22 лютага ў канале апублікавалі фота поўнага набору (нават з крэслам!) геймерскага абсталявання – судзячы па ўсім, набыў яго Мельнічэнка.
Неяк хлопцы казалі, што ім падабаецца гульня Counter Strike, і тут трэба быць асцярожным – праз яе напрыканцы студзеня ў скандал трапіў форвард з галоўнай каманды «Порту».
Другие посты пользователя
