Баркоўскі – самы выніковы беларус у Польшчы ў 2025-м, але яго «Пушча» вылятае. Шкурын – без медалёў, лічбы Шыкаўкі – сум
Для нашых у экстракласе ўжо няма інтрыг.
У польскай Экстракласе камандам засталася згуляць усяго два туры. Галоўная інтрыга – барацьба за чэмпіёнства. «Лех» на мінулых выходных у «польскім дэрбі» мінімальна абгуляў «Легію» Іллі Шкурына і выйшаў на першае месца, а «Ракаў», які лідараваў да таго, саступіў «Ягелоніі» 1:2. Проста цяпер каманда з Познані лідзіруе з адрывам у адзін пункт.
А вось каманды беларускіх легіянераў фактычна ўсе свае задачы ўжо вырашылі.
Найбольш сумна сезон заканчваецца для «Пушчы» Германа Баркоўскага. 12 траўня каманда саступіла «Сталі» 2:3, апусцілася на дно табліцы і па спартыўным прынцыпе дакладна пакіне эліту. Пры гэтым ёсць невялікая верагоднасць, што на апошні радок можа апусціцца 14-я «Лехія» – у клуба запазычанасці па заробках перад футбалістамі і персаналам, праз што польская федэрацыя не дае ліцэнзіі на наступны сезон. «Лехія» аспрэчвае рашэнне, але, здаецца, сітуацыя ў клубе не паляпшаецца – футбалісты на знак пратэсту затрымалі пачатак нядаўняга матчу супраць «Кароны» Яўгена Шыкаўкі, але ў выніку перамаглі 3:2.
Калі федэрацыя пакіне ў сіле сваё рашэнне, то «Лехія» аўтаматычна апусціцца на апошні радок у табліцы, а ў «Пушчы» будзе шанец пазмагацца за выжыванне.
Але ў любым выпадку вынікі «Пушчы» на фінішы выглядаюць сумна. Апошні раз каманда перамагала ажно ў сярэдзіне сакавіка, а ў пазамінулым туры атрымала «мяшок» ад «Леха» (1:8). Гэты разгром стаў найбуйнейшым у чэмпіянаце Польшчы з 2003 года. Баркоўскаму, зрэшты, пашанцавала – у ганебнай сустрэчы ён не гуляў праз дыскваліфікацыю за чырвоную картку ў папярэднім туры.
Ды і ўвогуле беларус у складзе аўтсайдара выглядае нядрэнна. У «Пушчу» ён перайшоў з брэсцкага «Дынама» напрыканцы студзеня за 150 тысяч еўра і за 15 матчаў ва ўсіх турнірах набраў 4+3 па гол+пас. Прама цяпер ён трэці бамбардзір каманды і найлепшы з моманту свайго пераходу. Чатыры мячы ў другой палове сезона таксама на рахунку малдаўскага абаронцы Андрэя Крачуна, але ў Баркоўскага больш асістаў. Найлепшым снайперам каманды з'яўляецца грэцкі форвард Міхаліс Касідзіс. На яго рахунку дзевяць мячоў, праўда, пасля зʼяўлення беларуса ён вызначыўся толькі двойчы.
Баркоўскі – самы выніковы беларус у экстракласе ў 2025 годзе. Ад яго адстаюць і Шкурын, і Яўген Шыкаўка.
Вызначыўся экс-гулец Брэста і ў апошнім матчы супраць «Сталі», якая пасля продажу Шкурына за 1,5 мільёна еўра ў «Легію» таксама знаходзіцца за крок ад вылету. Прычым патрапіў Баркоўскі вельмі файна:
У «Пушчы» беларусам задаволеныя. Галоўны трэнер Томаш Тулач нядаўна гаварыў пра вялікі патэнцыял Баркоўскага і называў яго вялікім талентам. Кантракт 22-гадовага форварда з «Пушчай» разлічаны да чэрвеня 2028-га.
А вось у Яўгена Шыкаўкі сітуацыя іншая. Яго «Карона» ўжо даўно гарантавала сабе месца ў эліце на наступны сезон, а сёлета можа нават забрацца ў топ-6. Праўда, выніковасць самаго беларускага форварда ў параўнанні з мінулымі сезонамі ўпала. У Экстракласе-2024/25 на яго рахунку 2+2 па гол+пас – год таму Шыкаўка скончыў з 10+1, а ў пазамінулым сезоне было 6+1.
Адзначым, што абодва мячы беларус забіў зусім нядаўна – у канцы красавіка зраўняў з «Ягелоніяй» (3:1), а ў пачатку траўня адкрыў лік з «Катавіцамі» (2:1). У кастрычніку Шыкаўка аформіў дубль у браму другой каманды «Леха» (3:1) у Кубку Польшчы. Тым не менш у гэтым сезоне беларус чацвёрты снайпер каманды. Больш галоў толькі ў іспанскага абаронцы Паўла Рэсты (5), партугальскага плэймекра Пэдро Нуно (5) і іспанскага форварда Адрыяна Далмаў (10).
Кантракт 32-гадовага легіянера з «Каронай» заканчваецца ў чэрвені гэтага года. У дамове прадугледжаная опцыя падаўжэння на адзін год, але ці скарыстаецца ёй клуб – пакуль не паведамлялася. Зімой у польскай прэсе пісалі, што Шыкаўка можа пакінуць «Карону», але ў выніку застаўся. Адзначым, што нягледзячы на слабую выніковасць, форвард застаўся на лаўцы толькі ў адным матчы за сезон. Усяго ўзяў удзел у 35 гульнях, 16 з якіх пачаў у старце, а яшчэ ў трох вывеў каманду з капітанскай павязкай.
Для «Легіі» Іллі Шкурына ў гэтым сезоне таксама нічога кардынальна не зменіцца. Пасля паражэння ад «Леха» варшаўскі клуб пазбавіўся шанцаў на медалі, але дзякуючы перамозе ў Кубку ў наступным сезоне згуляе ў першым кваліфікацыйным раўндзе Лігі Еўропы.
Шкурын наўпрост спрычыніўся да трафея. Яго гол у паўфінале ў браму «Руха» (5:0) асабліва ні на што не паўплываў, але мяч «Пагоні» (4:3) у фінале быў і важным, і прыгожым:
У Экстракласе ў беларуса 1+2 у 10 матчах за «Легію». Сціпла, але ёсць і станоўчы момант – там, дзе Шкурын адзначаецца выніковымі дзеяннямі, «Легія» абавязкова перамагае: асісты са «Шленскам» (3:1) і «Гурнікам» (2:1), галы «Катавіцам» (2:1) і ў кубкавых матчах таму пацвярджэнне.
Шкурын – чацвёрты бамбардзір каманды пасля свайго пераходу без уліку матчаў Лізе канферэнцый, дзе беларус не гуляў па не залежных ад яго прычынах. У чэмпіянаце і Кубку Польшчы на гэтым адрэзку больш забівалі іспанскі форвард Марк Гуаль (5+0), бразільскі нападнік Лукіньяс (5+0) і японскі вінгер Рыё Марышыта (5+4).
Першую палову сезона Шкурын правёў у «Сталі» – там нагуляў 20 матчаў і набраў 5+2. Дзякуючы выніковым дзеянням беларуса ў каманды з Мельца ёсць няхай не вялікія, але шанц застацца ў эліце: ён забіў «Відзеву» (1:1), двойчы «Пушчы» (2:0), пераможны «Радамяку» (2:1), асіставаў у матчы з «Ягелоніяй» (2:1).
Кантракт 25-гадовага форварда з «Легіяй» разлічаны да снежня 2027-га. Адзначым, што ў сакавіку ў клуб прыйшоў новы спартыўны дырэктар Міхал Жаўлякоў. Таксама не вядома, ці працягне працу ў «Легіі» цяперашні галоўны трэнер Гансала Феё. Яго кантракт заканчваецца 31 траўня, а пра сваю будучыню пасля паражэння ад «Леха» ён выказаўся даволі абстрактна.
«Я ўсё яшчэ буду трэнерам. Калі ў «Легіі» – выдатна. Калі не ў «Легіі» – то недзе ў іншым месцы. Я буду працаваць, каб быць найлепшым... Я ўжо вольны прымаць рашэнні пра сваю будучыню», – сказаў Феё.
Адзначым, што польскі партал sport.tvp.pl паведамляў, што адным з кандыдатаў на замену Феё ў «Легіі» з'яўляецца Аляксей Шпілеўскі. Беларускі спецыяліст ужо абʼявіў, што пакіне «Арыс» пасля завяршэння гэтага сезона.
Другие посты пользователя
