Леўшуноў – адзіны абаронца з двух апошніх драфтаў НХЛ, хто змог зрабіць гэта. Наперадзе – іншыя рэкорды
Мае вялікі запас часу, але як усё складзецца?
Уноч на 11 сакавіка па беларускім часе адбыўся дэбют маладога беларуса Арцёма Леўшунова ў НХЛ. Абаронца згуляў за «Чыкага» ў матчы супаць «Каларада» (0:3) і зрабіў сезон-2024/25 яшчэ больш рэкордным па колькасці беларусаў у наймацнейшай лізе свету.
Таксама Леўшуноў устанавіў новае нацыянальнае дасягненне. Яго першы матч у НХЛ адбыўся ва ўзросце 19 гадоў і 4 месяцаў – яшчэ ніхто з беларусаў не дэбютаваў так рана. Папярэдні рэкорд належаў Уладзіславу Калячонку (20 гадоў, 7 месяцаў), яшчэ ў топ-4 уваходзяць Сяргей Касціцын (20 гадоў, 8 месяцаў), Аляксей Протас (20 гадоў, 9 месяцаў і 26 дзён) і Андрэй Касціцын (20 гадоў, 9 месяцаў і 28 дзён).
І гэта не першае дасягненне, якое Леўшуноў забраў на свой рахунак. Улетку мінулага года ён перабіў драфтавае дасягненне Руслана Салея: ураджэнца Жлобіна выбралі пад другім агульным нумарам, легенду белхакея ў 1996 годзе – пад 9-м.
Увогуле, Леўшуноў – усяго чацвёрты хакеіст з драфта-2024, хто ўжо згуляў у НХЛ. Раней за яго шанц атрымалі расіянін Мікіта Прышчэпаў з «Каларада» (10, 0+0), а таксама канадцы Джэт Лучанка з «Філадэльфіі» (4 матчы, 0+0) і першы нумар драфта канадзец Маклін Селябрыні з «Сан-Хасэ». Апошні з 48 (20+28) пунктамі ў 53 гульнях ідзе другім у бамбардзірскім спісе навічкоў НХЛ.
Маклін Селебрыні
Але адзначым, што ўсе вышэй згаданыя хакеісты з'яўляюцца форвардамі, сярод тых, каго выбралі на драфце-2023, таксама пакуль што дэбютавалі толькі 10 нападнікаў. Такім чынам, Леўшуноў – першы абаронца, хто быў задрафтаваны ў апошнія два гады і ўжо згуляў у НХЛ.
З моманту выбара Леўшунова на драфце да дэбюту ў лізе мінула 255 дзён, і гэта – не найлепшы паказнік: рэкорд трымае Руслан Салей (107 дзён, 1996 год), на другім месцы Уладзімір Цыплакоў (122 дні, 1995 год). Затое цяперашні дэбютант НХЛ апярэдзіў першага ў гісторыі лігі беларуса Аляксандра Андрыеўскага, які свой адзіны матч (таксама за «Чыкага) правёў правёў праз 554 дні пасля драфту ў 1991 годзе. Апошнім у пяцёрцы найлепшых беларусаў па хуткасці дэбюта з'яўляецца Аляксей Протас – 864 дні пасля драфту ў 2019-м.
Звяртае на сябе ўвагу і айстайм, які далі Леўшунову ў дэбютным матчы – 20 хвілін 55 секунд. Ці рэкордны гэта для беларусаў паказнік за ўсе часы, свярджаць не будзем, бо ў тых, хто дэбютаваў у 1990-я, на сайце nhl.com гульнявы час не пазначаны. Таму проста для параўнання: у Шаранговіча падчас першага матчу ў НХЛ было 17:23, Сяргея Касціцына – 12:35, у Протаса – 3:53, а Андрэя Касціцына – увогуле 0:39!
А вось якія нацыянальныя рэкорды могуць скарыцца Арцёму Леўшунову, калі ён затрымаецца ў аснове «Чыкага». Пакуль што аўтарам самага маладога беларускага гола ў НХЛ з'яўляецца Сяргей Касціцын – у снежні 2007-га ён закінуў «Вашынгтону» ва ўзросце 20 гадоў і 9 месяцаў. Таксама Касціцын-малодшы трымае тытул наймаладзейшага беларускага асістэнта (20 гадоў, 8 месяцаў і 25 дзён).
Першы гол Сяргея Касціцына ў НХЛ
Ну і калі ўжо загаварылі пра наймаладзейшага беларускага гол-скорэра і асістмэйкера ў НХЛ, скажам і пра самага сталага. Тут дасягненне трымае Руслан Салей, які апошні энхаэлаўскі гол аформіў ва ўзросце 36 гадоў, 5 месяцаў і 16 дзён, а апошні асіст – у 36 гадоў і 3 месяцы, літаральна за пару месяцаў да трагічнай гібелі ў авіякатастрофе з яраслаўскім «Лакаматывам».
Леўшуноў хутка пачаў, але як надоўга ён затрымаецца ў лізе? Ці здолее трымаць высокі ўзровень ды яшчэ прагрэсаваць? Наперадзе – тыя, хто рабіў гэта не адзін сезон і не адну сотню матчаў. Вось хто з беларусаў пакуль найбольш згуляў у НХЛ:
1. Руслан Салей – 979 матчаў у рэгулярках і плэй-оф (15 сезонаў)
2. Міхаіл Грабоўскі – 544 (10)
3. Андрэй Касціцын – 447 (8)
4. Сяргей Касціцын – 393 (6)
5. Ягор Шаранговіч – 345 (5).
Другие посты пользователя
