Беларус усё заве на рэванш пуцініста Емяльяненку – а той пайшоў у «навуку» і піша пра экстрэмізм і тэрарызм у нашай краіне
Без сумневаў, чалавек вялікага розуму.
24 студзеня 2009 года ў Анахайме ў прамоўшне з удзелам цяперашняга прэзiдэнта США Дональда Трампа біліся Андрэй Арлоўскі і адзін з найлепшых ММА-байцоў у гісторыі Фёдар Емяльяненка. Нечакана беларус дамінаваў над расіянінам, які не прайграваў цягам васьмі гадоў. У пэўны момант Арлоўскі нават загнаў суперніка ў кут, але тое, што здарылася на 4-й хвіліне першага раўнда, стала класікай змешаных адзінаборстваў.
Арлоўскі вырашыў атакаваць каленам у скачку, а Емяльяненка ў адказ выкінуў правы крос, адправіўшы самаўпэўненага візаві ў глухі накаўт на некалькі хвілін. Пазней некаторыя байцоўскія журналы назвалi накаўт адным з найлепшых у гісторыі. А за Арлоўскім замацавалася мянушка «Крыштальная сківіца».
Арлоўскі часцяком успамінаў тую няўдачу (напрыклад, дакараў сябе праз неасцярожнасць і пераконваў, што быў тады мацнейшы), а яшчэ рэгулярна выклікае Емяльяненку на рэванш, запэўніваючы, што гатовы біцца на любых умовах. Апошні раз «запрасіў» свайго крыўдніка на паўторны бой 24 сакавіка, зрэагаваўшы на тое, што ў нейкім інтэрв'ю чатырохмесячнай даўніны расіянін між іншым згадаў яго імя.
«Я лічу, што 16 гадоў таму табе пашанцавала. Цяпер я вольны агент, па грошах дамовімся, давай зробім прыгожа. Не ўключай заднюю», – заявіў беларус.
48-гадовы расіянін на прапанову не адказаў, што прымусіла Арлоўскага запісаць другое відэа. Калі коратка, ён пытаецца, ці гатовы Емяльяненка біцца.
Чуткі пра магчымы рэванш гуляюць не першы год – і ўсё ніяк. Пры гэтым сам Арлоўскі заявіў, што яму ўжо тэлефанавалі два прамоўтары з прапановай зладзіць бой, а яшчэ заявіў, што расіянін нібыта «не катастрафічна, але мае патрэбу ў грошах».
На сёння Арлоўскаму 46, яшчэ ў мінулым годзе ён біўся ў UFC. Але гэтай арганізацыі стаў непатрэбны і цяпер шукае сябе – і, відавочна, дагэтуль прагне зарабляць кулакамі ды адгукаецца нават на даволі дзіўныя ініцыятывы.
А што Емяльяненка? Накаўтаваўшы Арлоўскага, ён правёў 7 паядынкаў (4 перамогі, 3 паразы), пасля чаго першы раз завяршыў кар'еру. У 2015-м вярнуўся на рынг, правёў 9 баёў (6 перамог, 3 паразы). Апошнім стаў бой у 2023-м з Раянам Бэйдарам за тытул чэмпіёна Bellator у цяжкой вазе – расіянін прайграў накаўтам у першым раўндзе і зноўку абвясціў пра сыход. У далейшым ён зяўляў, што хоча паспрабаваць сябе ў боксе, таму тэарытычна камбэк нельга выключаць.
Пакуль жа Емяльяненка спрабуе сябе ў іншых ролях. Яшчэ ў 2012-м быў абраны дэпутатам у Белгарадскую думу ад прапуцінскай партыі «Адзіная Расія». Доўга там не затрымаўся, бо ў тым жа годзе пераехаў у Маскву, дзе стаў дарадцам міністра спорту РФ і старшынёй новастворанага «Саюзу змешаных адзінаборстваў ММА Расіі», якім кіруе і сёння. У 2018-м Емяльяненка быў «даверанай асобай» Пуціна на выбарах – свайго кандыдата ён падтрымлівае дагэтуль, як і вайну супраць Украіны.
А нядаўна стала вядома, што былы баец стаўся кандыдатам педагагічных навук, абараніўшы дысертацыю на вельмі актуальную тэму – «Выхаванне духоўна-маральных якасцяў асобы спартсменаў у змешаных адзінаборствах на вучэбна-трэнавальных этапах». Прасцей кажучы, распавядаў, як важна ляпіць з падлеткаў прапуцінскіх «патрыётаў».
У працы на 200 старонак, поўнай вар’яцкіх крамлёўскіх наратываў, Емяльяненка пісаў пра «традыцыйныя каштоўнасці» і іх важнасць для сучаснай моладзі, якую ён папракае за бездухоўнасць. Знайшлося нават месца «Белоруссии» (пуцініст трымаецца імперскай назвы нашай краіны).
«У Расіі, Беларусіі, Казахстане і на Украіне (захаваны аўтарскі стыль – Tribuna.com) у апошняе дзесяцігоддзе ў моладзевым асяроддзі, у прыватнасці сярод асоб, якія займаюцца спартыўна-аздараўленчай дзейнасцю, адзначаны дэструктыўны ідэалагічны ўплыў, у тым ліку дзейнасць экстрэмісцкіх і тэрарыстычных арганізацый з недружалюбных замежных дзяржаў, уздзеянне якіх змяняе працэс фармавання каштоўнасных арыентацый, які быў закладзены раней», – гаворыцца ў так званай навуковай працы.
Якія канкрэтна тэрарыстычныя і экстрэмісцкія арганізацыі дзейнічалі ў Беларусі, Емяльяненка не ўдакладняе.
З падлеткамі-спартсменамі, на думку Емяльяненкі, не ўсё добра. Яны «часцяком трапляюць пад уплыў ліберальных каштоўнасцяў, дзе распаўсюджаная грамадзянская пасіўнасць, эгаізм, безадказнасць і дэвальвацыя паняцця доўгу і службы айчыне».
Вось з такім «навукоўцам» хоча пабіцца Арлоўскі. Ужо чакаеце бой?
Другие посты пользователя
