Ці зможа Гуркоў узяць рэванш за паразу на чэмпіянаце свету?
28 ліпеня “Народны чэмпіён” распачне выступ на Сусветных гульнях, дзе можа сустрэцца з партугальцам, якому нядаўна прайграў.
28 ліпеня “Народны чэмпіён” распачне выступ на Сусветных гульнях, дзе можа сустрэцца з партугальцам, якому нядаўна прайграў.
Нагадаем, што сёлета, у траўні, Віталь Гуркоў пацярпеў паразу ў першым баі чэмпіяната свету. Няўжо гэта канец яркай кар’еры? Відаць, што не. І рэванш з партугальскім прафесіяналам Дыёга Калада можа вось-вось здарыцца ў польскім Уроцлаве, дзе праходзяць Сусветныя гульні-2017. Гэты турнір па муай-тай куды больш прэстыжны і прадстаўнічы, чым чэмпіянат свету. Адбор на спаборніцтвы праводзіўся цягам некалькіх гадоў. Прыкладна так выглядала б сетка спаборніцтваў, калі б муай-тай быў у алімпійскай праграме.
Хто сапернікі Гуркова?
Віталь выступае ў 75 кг. Усяго ў вагавую катэгорыю адабраліся восем байцоў. Чэмпіён павінен будзе правесці тры пераможныя баі за тры дні.
Інтрыга ў тым, што апрача Гуркова ў сетцы спаборніцтваў прысутнічае яго партугальскі крыўдзіцель Дыёга Калада, сярэбраны прызёр чэмпіяната свету-2017. Добра было б убачыць рэванш. Дыёга – адзін з рэдкіх байцоў на планеце, хто перамог Гуркова ў клінчы. Спадзяемся, беларус зробіць належныя высновы, калі лёс зноўку звядзе яго з партугальцам.
Расію прадстаўляе Іван Грыгор’еў з Севастопаля. Некалькі месяцаў таму баец перамог на чэмпіянаце свету ў Мінску. Сёння многія лічаць, што Грыгор’еў выйшаў на пік формы і з’яўляецца фаварытам Сусветных гульняў. Таго ж партугальца Дыёга Каладу ён у фінале ЧС не проста перамог, а эфектна накаўтаваў. Вось як гэта было.
Ад Паўднёвай і Паўночнай Амерык ва Уроцлаў едзе Трой Джонс. Гэтага байца зоркай не назавеш. Ён выступае не толькі па правілах муай-тай, але і ў ММА. Вось яркі бой Троя гадовай даўніны.
Шкада, што трапіць на Гульні не змаглі цудоўныя тайцы. Легендарны Ёдсаэнклай нядаўна абвесціў пра завяршэнне кар’еры, а маладую зорку Super X Гуркоў дэкласаваў на чэмпіянаце свету-2016.
Азію гэтым разам будзе прадстаўляць кітаец Ёнгханг Жанг. Байца называюць “цёмным конікам”, ніхто з беларускіх экспертаў муай-тай яго добра не ведае. Але гэта не азначае, што да кітайца варта ставіцца лёгкадумна.
Натуральна, што на Сусветных гульнях-2017 ва ўсіх вагавых катэгорыях выступаюць палякі. У 75 кг гэта Давід Міркоўскі, якога называюць самым здольным маладым польскім байцом муай-тай. У 2016 годзе на чэмпіянаце Еўропы ён стаў другім. Але наўрад ці 19-гадовы хлопец, які не любіць працаваць у клінчы, складзе канкурэнцыю Гуркову.
У пачатку года Давід размясціў пра сябе матывацыйны ролік на Youtube.
Яшчэ адзін сапернік, які можа стварыць сенсацыю, – гэта малады ўкраінец Станіслаў Пержаноўскі, чэмпіён Еўропы-2016. Яго Гуркоў накаўтаваў у тым жа 2016 годзе падчас чэмпіяната свету ў Швецыі. Але Станіслаў прагрэсуе, ён вельмі добра працуе рукамі і нагамі. І ўвогуле вельмі прыемны хлопец. Спадзяёмся, запал у Пержаноўскага растраціцца на іншага прынцыповага саперніка – Івана Грыгор’ева. Той таксама быў украінцам, але стаў выступаць за Расію, як толькі ў Крым увашлі “зялёныя чалавечкі”.
Аб’ектыўна кажучы, вартым сапернікам выглядае француз Джоэйн Басджор. Гэта досыць вядомы прафесіянал, які выступаў на прэстыжных турнірах у Тайландзе і Францыі. Вельмі няўступлівы баец, тэхнічна збалансаваны. Можа і ўдарыць, і падужацца, і перацярпець. На аматарскіх чэмпіянатах свету не выступаў. Але медаль на Сусветных гульнях – сапраўдная магчымасць засвяціцца.
Ці змог “Народны чэмпіён” набраць форму?
Вядома, што Гуркоў рыхтаваўся да Сусветных гульняў-2017 у Мінску. На гэты раз ён не паляцеў спарынгавацца ў Бангкок. Больш за тое, за два тыдні да турніру Гуркова бачылі ў Кіеве, дзе ён здымаўся у новым кліпе Brutto. А менш чым за тыдзень да турніру Віталь прымаў удзел у фестывалі “Рок за Баброў-2017”, выступаў амаль да 12 ночы. Ці прымальны такі лад жыцця для Заслужанага майстра спорта?
Перад чэмпіянатам свету-2017 Гуркоў адмовіўся ад музычнай сцэны. У выніку аказаўся ператрэніраваным. У той жа час, напрыканцы года ў Кітаі Віталь “сырым” выйшаў у рынг супраць чэмпіёна свету па кікбоксінгу Мергена Білялава. І ўпэўнена перамог.
Гуркова ніхто не прымушаў ехаць ва Уроцлаў. Загадзя было вядома, што з-за бюракратычных нюансаў баец не атрымае прызавыя (для прыкладу, тайцам за залаты медаль выплацяць па 50 тысяч долараў). “Народны чэмпіён” кіруецца ідэйнымі мэтамі. А гэта, пагадзіцеся, файна!
Калі пачнуцца баі?
Спаборніцтвы па муай тай ў вагавай катэгорыі 75 кг распачнуцца ў пятніцу 28 ліпеня а 20.00 па беларускім часе. “Трыбуна” будзе сачыць за турнірам, аператыўна паведамляць пра вынікі і выстаўляць відэа баёў з удзелам Віталя Гуркова.
Тэкст: Яўген Валошын
