Молаша могуць прыбраць з «Тарпеда-БелАЗ» праз палітыку (і не яго першага) – зноў у справе так званы міністр спорту
Двух чалавек ужо рэпрэсавалі.
Афіцыйны старт чэмпіянату Беларусі па футболе ў вышэйшай лізе запланаваны на 17 сакавіка, але ўжо зараз гучаць размовы, што адзін з калектываў можа пачаць турнір з новым галоўным трэнерам. Гаворка пра «Тарпеда-БелАЗ».
22 студзеня журналіст Уладзіслаў Татур у сваім тэлеграм-канале напісаў, што «аўтазаводцы» у сезон пайдуць без Дзмітрыя Молаша. Падрабязнасці з'явіліся крыху пазней, ужо пасля таго, як сам галоўны трэнер адрэагаваў на інсайд: «Я працаваў і працую. Патэлефануйце Татуру і даведайцеся, адкуль у яго такая інфармацы». Журналіст у адказ на гэта зазначыў, што, паводле яго даных, «Тарпеда-БелАЗ» вядзе перамовы з іншымі спецыялістамі, але «не ўсё так проста». Лёс Молаша сапраўды вырашаецца, пры гэтым не выключана, што галоўны трэнер застанецца на пасадзе.
Разбіраемся, што ўвогуле адбываецца ў Жодзіна.
Молаша ўжо «сыходзілі» ў 2022 годзе
У Жодзіна трэнер прыехаў у снежні 2021-га на змену Сяргею Зяневічу. За плячыма спецыяліста, якому праз тыдзень пасля падпісання кантракта з «Тарпеда-БелАЗ» споўнілася 40 гадоў, ужо была праца як галоўным, так і ў ролі асістэнта (меў практыку ў БАТЭ, «Смалявічах» і «Ліепаі»).
З «аўтазаводцамі» кантракт Молаш заключыў да канца сезона-2024. Аднак ужо ўвясну 2022-га пачалі з'яўляцца навіны, што клуб можа развітацца са спецыялістам. Прычынай такіх размоў стаў не вельмі ўпэўнены старт клуба. З Кубка «Тарпеда-БелАЗ» вылецела ў чвэрцьфінале. Паядынкі супраць БАТЭ (1:1 і 0:1) сталі якраз першымі для Молаша. Што да ЧБ, то ў першых шасці турах «Тарпеда-БелАЗ» набрала ўсяго чатыры ачкі: перамога над навічком «вышкі» «Арсеналам» дома (1:0) і нічыя на выездзе са «Славіяй» (2:2). У канцы красавіка жодзінцы прайгралi пры сваіх заўзятарах «Белшыне» (1:3) і ўладкаваліся на 14-м месцы ў табліцы. Адразу пасля гэтага і з'явіліся навіны пра магчымую адстаўку Молаша.
Тады нават называліся магчымыя зменшчыкі трэнера. Адным з кандыдатаў быў найлепшы трэнер Беларусі-2021 Іван Біёнчык, незадоўга да таго звольнены з «Шахцёра». Праз некалькі дзён Татур паведаміў, што сярод гіпатэтычных пераемнікаў Молаша фігуруюць Сяргей Яромка і Алег Кубараў. Аднак адначасова з гэтым журналіст пісаў, што галоўнаму трэнеру «Тарпеда-БелАЗ» усё ж дадуць час на выпраўленне сітуацыі.
Яромка праз два тыдні на просьбу пракаментаваць навіны пра свой магчымы пераезд ў Жодзіна адказаў, што рабіць гэтага не мае намеру, бо гэта было б непавагай да калегі. Зрэшты, паводле нашай інфармацыі, тыя размовы ўсё ж мелі пад сабой падставы – прозвішчы патэнцыйных зменшчыкаў усплывалі не проста так.
У камандзе імкнуліся не звяртаць увагу на гутаркі пра магчымыя перастаноўкі. Гульцы разумелі, што таксама вінаватыя ў тым, што выдалі пасрэдны старт. На трэніроўках праходзілі размовы з трэнерскім штабам, Молашу выказваўся поўны давер, спартсмены давалі зразумець, што хочуць і далей працаваць са спецыялістам і разам з ім выбірацца з ямы. Трэнеры таксама заклікалі не здавацца, казалі, што ўсё абавязкова павінна змяніцца ў лепшы бок. Галоўнае – гэта час, цярпенне, паслядоўнасць у сваіх дзеяннях.
У выніку Молаш захаваў пасаду за сабой, хаця размовы пра магчымую адстаўку не тое каб надта абудзілі калектыў. За май, напрыклад, жодзінцы набралі чатыры балы з 12. Адзіная перамога, прычым мінімальная, была здабыта над аўтсайдэрам «Дняпром».
Але далей справы пайшлі лепей. У выніку ў чэмпіянаце «Тарпеда-БелАЗ» фінішавала на восьмым месцы: 11 перамог, 10 нічыіх і 9 параз, розніца мячоў – 35:32. «Арсенал», які трапіў у стыкі, удалося апярэдзіць на 20 балаў. Ну і ў Кубку жодзінцы прабіліся ў чвэрцьфінал, дзе ў сакавіку 2023-га згуляюць з «Шахцёрам».
Чаму зараз вакол Молаша згусціліся хмары?
У снежні 2022-га зноў пайшлі размовы пра тое, што спецыяліст можа з'ехаць з Жодзіна. У канцоўцы сезона каманда выдала чатырохматчавую серыю без перамог (дзве паразы і дзве нічыi), і гэта магло вызначыць лёс Молаша ў «Тарпеда-БелАЗ». Аднак, паводле інфармацыі СМІ, у пачатку зімы трэнер сустрэўся з генеральным дырэктарам завода БелАЗ Сяргеем Нікіфаровічам, і па выніках гутаркі было вырашана прадоўжыць супрацу.
Сапраўды, 16 снежня 2022 года каманда выйшла з адпачынку, і трэніровачным працэсам кіруе менавіта Молаш. Каманда фармуе склад, праглядаюцца навічкі, заключаюцца кантракты з гульцамі, у бягучым студзені калектыў ужо правёў спарынг з БАТЭ (1:1). Быццам бы усё па плане, усё добра. Аднак нечакана зноў загучалі размовы пра тое, што «Тарпеда-БелАЗ» зойдзе ў сезон ужо без Молаша. Пра гэта паведаміў Татур. Разам з тым журналіст не выключыў, што ніякіх пераменаў можа і не адбыцца.
Натуральна, з'яўленне такой інфармацыі не магло не адбіцца на працы калектыва, хаця ўсе і імкнуцца канцэнтравацца выключна на футболе. Паводле нашых крыніц, перадсезонка набрала ход, нагрузкі зараз самыя сур'ёзныя і па інтэнсіўнасці, і па аб'ёме. Становішча Молаша ў камандзе абмяркоўваецца, аднак, як і летась, трэнеру выказваецца поўны давер.
Паводле нашай інфармацыі, у сённяшнім «Тарпеда-БелАЗ» няма футбалістаў, якія хацелі б спыніць супрацу са спецыялістам. У камандзе яго паважаюць за тое, што прафесійна і патрабавальна ставіцца да сябе і што патрабуе такога ж стаўлення ад гульцоў і трэнерскага штаба. Як адзначаюць нашы суразмоўцы, Молаш літаральна жыве футболам. А яшчэ, нягледзячы на свой статус, адкрыты для зносін абсалютна з усімі - гульцамі і супрацоўнікамі клуба. Увогуле, калектыў сапраўды прыкіпеў да Молаша і баіцца, што супраца можа спыніцца яшчэ да пачатку сезона. Сам жа трэнер заклікае не верыць чуткам, а працаваць па плане, рыхтавацца да сезона. Тэму сваёй будучыні ні з футбалістамі, ні з памочнікамі Молаш не ўзнімае.
Але ж падставы для хвалявання ўсё ж такі ёсць. І, як нам удалося даведацца, прычыны тут далёка не спартыўныя, хаця і звязаныя з так званым міністэрствам спорту.
Як вядома, нядаўна былі апублікаваныя спісы гульцоў, якія праз сваю грамадзянскую пазіцыю (хаця не ўсе выяўлялі яе публічна) патрапілі ў няласку да так званага міністра Сяргея Кавальчука. Хтосьці нешта каментаваў і выступаў супраць дзеянняў рэжыму Лукашэнка, шмат хто зняўся ў відэа супраць гвалту. У выніку каля паўсотні футбалістаў (у тым ліку тых, хто завяршыў кар'еры), сталі непажаданымі персонамі ў беларускім спорце.
Аднак, паводле інфармацыі «Трыбуны», гэты спіс не канчатковы, пад асаблівым кантролем у Кавальчука знаходзяцца і некаторыя іншыя прадстаўнікі белфутбола. У тым ліку, як аказалася, трэнеры. Сярод іх – Дзмітрый Молаш. Падставай для такога стаўлення да спецыяліста сталі яго досыць акуратныя выказванні ў падтрымку беларускага народа ў верасні 2020-га. Тады трэнер, які працаваў у «Ліепаі», распавёў, што ён і беларускія гульцы каманды перажываюць праз падзеі на Радзіме, і выказаў усім людзям падтрымку.
Пасля гэтага Молаш нідзе нічога не каментаваў, на грамадска-палітычныя тэмы не выказваўся. Спакойна працаваў, працягваў сваю трэнерскую кар'еру, якая ў 2021 годзе зноў вярнула яго ў Беларусь. Аднак з улікам таго, які разгон набралі лукашэнкаўскія рэпрэсіі, і аднаго каментарыя аказалася дастаткова для праблем.
Зрэшты, паводле нашай інфармацыі, пытанне наконт будучыні Молаша ў «Тарпеда-БелАЗ» далёка не вырашанае. Сам спецыяліст хоча застацца ў камандзе, і кіраўніцтва ФК таксама робіць усё для таго, каб ніякіх глабальных перамен не адбылося.
Дададзiм, што гэта не першы раз за апошнія месяцы, калі палітыка ўплывае на жодзінскі футбол. Па адпаведных прычынах «Тарпеда-БелАЗ» пакінулі брамнік Уладзімір Бушма, а таксама шматгадовы ўрач каманды Андрэй Ясюкевіч.
Фота: torpedo-belaz.by
