Блог Хорошие тексты

8 стартаў восені, якія нельга прапусціць

ХАКЕЙ. СКА – «Дынама» (Менск)

Калі: 18 верасня
Дзе: Лядовы палац, Санкт-Пецярбург

 

 

 

Бедныя сваякі з Беларусі завітаюць у госці да «газпрамаўскага» монстра, які марыць аб перамозе ў КХЛ. Зарплатны бюджэт менскага «Дынама» ў гэтым сезоне складае $ 8,8 млн. (23-ці паказчык у лізе). У піцерцаў ён у чатыры разы большы. І гэта без уліку касмічнага кантракта Іллі Кавальчука, які збег у СКА з «Нью-Джэрсі». Ніхто не здзівіцца, калі ўсплыве інфармацыя, што Кавальчук зарабляе больш, чым «зубрыны статак» разам узяты.

 

 

 

На каго звярнуць увагу: Ілля Кавальчук. Капітан СКА не толькі грабе грошы лапатай. Ён на самой справе круты хакеіст. Няхай у НХЛ многія і лічаць сённяшняга «армейца» жлабом, ласым да грошай, але і не шкадаваць аб страце такой зоркі немагчыма. Хаця ў Піцеры, акрамя Кавальчука, гуляюць Чэрвенка, Торэсан, Панікароўскі, Мортэнсан, Панарын… Словам, ёсць на каго паглядзець.

 

 

ВАЛЕЙБОЛ. Чэмпіянат Еўропы

Калі: 20 — 29 верасня
Дзе: Одэнсэ (Данія)

 

 

Беларускі валейбол — з’ява загадкавая. Мала хто пра яго штосьці чуў. Але ў гэтым годзе папёрла. На чэмпіянат Еўропы адабраліся адразу і жанчыны, і мужчыны. Першыя ўжо адгулялі (пры дзвюх паразах у трох матчах нават патрапілі ў плэй-офф), а вось у мужыкоў яшчэ ўсё наперадзе. Нават калі вам пофіг на валейбол, паглорыць за хлопцаў Сідзельнікава варта асабіста. Еўра пройдзе ў дзвюх краінах (Данія і Польшча) і шасці гарадах. Беларусы пачнуць у дацкім Одэнсэ, але пры добрым раскладзе ёсць шанс перабрацца на Ютландскі паўвостраў у Орхус.

 

 

 

На каго звярнуць увагу: Алег Ахрэм. 30-гадовага валейбаліста часам называюць адным з лепшых дагулёўшчыкаў Еўропы. Ахрэм спрабаваў змяніць спартовае грамадзянства і загуляць за зборную Польшчы. Але палякі нешта муцілі-муцілі і гулец вярнуўся ў беларускую нацыяналку, за якую не выступаў два гады. Кантынентальнае першынства — добрая магчымасць выбачыцца за ўцёкі з радзімы.

 

 

ХАКЕЙ. «Віцебск» – «Магілёў»

Калі: 28 верасня
Дзе: Лядовы палац спорту, Віцебск

 

Гэта відовішча для гурманаў. «Магілёў» – каманда-зомбі, пра скон якой улетку паведамілі ўсе СМІ. Але кіраўніцтва вобласці дзесьці знайшло адзін мільён даляраў, каб клуб застаўся ў чэмпіянаце (напэўна, стала няёмка перад шараговымі аматарамі хакея). У віцеблян — іншая гісторыя. Іх галоўны трэнер Зміцер Дудзік спрабуе зрабіць з каманды беларускі аналаг чэхаўскага «Віцязя», які шырока вядомы сваёй брутальнасцю. І, трэба прызнаць, у яго атрымліваецца. Віцебляне з такім імпэтам мяцелілі гульцоў смаленскага «Славуціча», што тыя адмаўляліся працягвать спарынг. «Віцебск» і «Магілёў» пару тыдняў таму правялі таварняк, падчас якога адбылося пяць боек, адна з іх была масавай. Уявіце, якой будзе гульня не на проста так, а на ачкі?

 

 

 

На што звярнуць увагу: Бойкі. Хакей — ці не адзіны гульнявы від спорту, дзе можна больш-менш легальна махаць кулакамі. І, скажам шчыра, гэта куды цікавейшае відовішча, чым намаганні сярэднестатыстычнага прадстаўніка айчыннай экстралігі зрабіць нешта выбітнае з шайбай на пляцоўцы.

 

 

ФУТБОЛ. Іспанія — Беларусь

Калі: 11 кастрычніка
Дзе: стадыён пакуль не вызначаны, але дзесьці ў Іспаніі

 

 

«Выйшлі і абасраліся». Так ёміста Аляксандр Глеб падвёў вынікі першай сустрэчы слана з менш габарытным апанентам. Сустрэчы для нас ганебнай. У Менску беларусы «злілі» з лікам 0:4, але не гэта самае страшнае. Каманда гуляла баязліва, за цэнтр поля перайшла ўсяго толькі пару разоў, у дзеяннях беларускіх футбалістаў не было ні думкі, ні імпэту. Але ўсё змяняецца. Гомельскі матч супраць Францыі прадэманстраваў, што і Глеб з партнёрамі здольныя дзейнічаць востра, нахрапіста, так, што ў фаварытаў лезуць вочы на лоб. Нават саступаць можна з музыкай. Паглядзім, да якога стану давядуць нашы іспанцаў.

 

 

 

На каго звярнуць увагу: Георгій Кандрацьеў. Галоўны трэнер зборнай — дзядзька суровы. За паразу ад французаў ён ужо ўсыпаў падначаленым. Калі і ў матчы з Іспаніей будзе штосьці не так, разноса гульцам не мінуць. Таксама параім суддзям быць напагатове. Беларускі коўч не трымае прэтэнзіі пры сабе.

 

 

АДЗІНАБОРСТВЫ. Сусветныя гульні баявых майстэрстваў

Калі: 18 — 26 кастрычніка
Дзе: Санкт-Пецярбург

 

 

Барацьба засталася ў алімпійскай праграме. Барцы радуюцца, а вось гледачы… Дзе накаўты, дзе ўдары каленямі ды локцямі? У «грэка-рымлян» ды «вольнікаў» пакуль дачакаешся яркага прыёму, дзесяць разоў заснеш і прачнешся. Затое на Сусветных гульнях баявых майстэрстваў сумаваць не давядзецца. Міні-алімпіяда для fight-дысцыплін збярэ самыя відовішчныя (месцамі жорсткія) накірункі адзінаборстваў, у тым ліку і тыя, што не ўваходзяць у дружную алімпійскую сям’ю. Айкідо, джыў-джыцу, тайскі бокс і шмат што яшчэ. Тым, у каго слабыя нервы, лепей не глядзець.

 

 

 

На каго звярнуць увагу: Віталь Гуркоў. Ён валодае муай-тай лепш, чым тайцы. Выбітны баец, шматразовы чэмпіён свету, аднак турнір для яго не будзе прыемным шпацырам. «Ліцвіна» Гуркова чакае расіянін Зайналабід Магамедаў — адзіны супернік, якому менчук саступіў ужо двойчы, а таксама ўзыходзячая зорка тайбокса Армін Пумпанмуанг. Яшчэ за гонар краіны пастаіць «таец» Андрэй Кулебін, які ў прадстаўленні не мае патрэбы.

 

 

ТЭНІС. Выніковы турнір года WTA

Калі: 22 — 27 кастрычніка
Дзе: Стамбул (Турцыя)

 

 

Восем лепшых тэнісістак свету прыедуць у турэцкую сталіцу, каб вырашыць не толькі статусныя пытанні, але і распісаць сур’ёзную суму. Пераможца «WTA Championships — Istanbul 2013» можа атрымаць $ 2 млн. 145 тыс. Гэта вам не жартачкі. Вікторыя Азаранка — адна з галоўных прэтэндэнтак на тытул і на тое, каб сарваць банк. Беларуска ўжо кваліфікавалася на турнір, нягледзячы на паразу ў фінале US Open. Для тых, хто любіць лічыць грошы ў чужых кішэнях — глядзець абавязкова.

 

 

На каго звярнуць увагу: Серэна Уільямс. «Ворагаў» трэба ведаць у твар, а сёння большай пагрозы для Азаранкі, чым амерыканская Пантэра, няма. Малодшая з сястрычак Уільямс рэгулярна абыгрывае беларуску. Адкрыты чэмпіянат ЗША не стаў выключэннем. Хаця і Вікторыя здольная задаць суперніцы жару. У гэтым сезоне яна двойчы пакідала Серэну з носам. Карацей, стамбульскі матч Азаранка — Уільямс-мл. можа стаць упрыгожваннем жаночага тэніснага сезона.

 

 

БАСКЕТБОЛ. «Цмокі-Мінск» – ЦСКА

Калі: 3 лістапада
Дзе: «Мінск-Арэна»

 

Хто цікавіцца баскетам, таму не трэба тлумачыць, што такое ЦСКА. Каманда з’яўляецца дзейсным чэмпіёнам Лігі ВТБ, а таксама рэгулярна трапляе ў «Фінал чатырох» Еўралігі — самага прэстыжнага турніра на кантыненце. Склад масквічоў ломіцца ад зорак. Калі вы не бачылі ў справе Кайла Хайнца, Віктара Храпу і Мілаша Тэадосіча, то на «Мінск-Арэну» вам прагуляцца варта. Менчукі ўжо сустракаліся з ЦСКА і добра ад яго адграбалі. Але хто дакладна ведае, што здарыцца на гэты раз? У каманды з самай беларускай назвай змяніўся галоўны трэнер (замест нашага Андрэя Крываноса прыйшоў літовец Дональдас Кайрыс), а таксама абнавіўся легіянерскі складнік. Так што цяпер «Цмокі» наўрад ці самі ведаюць, што з сябе ўяўляюць.

 

 

 

На каго звярнуць увагу: Віталь Лютыч. 21-гадовы выхадзец з Бярозы з’яўляецца: а) адным з асноўных гульцоў нацыянальнай зборнай; б) бадай самым таленавітым прадстаўніком свайго пакалення; в) братам саліста гурта «B.N.» Аляксандра Лютыча. Карацей, цікавы персанаж. А яшчэ ў «Цмокаў» аўтобус з адмысловай аэраграфіяй. Калі пабачыце — не пашкадуеце.

 

 

ГАНДБОЛ. «Дынама» (Менск) – «Барселона»

Калі: 14 лістапада
Дзе: «Мінск-Арэна»

 

Айчынны гандбольны флагман улетку грунтоўна апгрэйдзіўся. Настолькі грунтоўна, што некаторым стала страшна. Пакуль новы трэнер (славенец Барыс Дэніч змяніў украінца Сяргея Бябешку) і новыя гульцы разбіраліся, што да чаго, наблізілася кваліфікацыя Лігі чэмпіёнаў. Каманда падышла да яе не ў бліскучым стане — спарынгі вымушалі самотна ўздыхаць. Аднак здарыўся хэпі-энд. Беларусы не без прыгод, але патрапілі ў групавы раўнд ЛЧ, за што былі ўзнагароджаныя шыкоўнымі супернікамі, у ліку якіх французскі гранд «ПСЖ» (арабскія шэйхі не шкадуюць грошай не толькі на футбол) і адзін з мацнейшых клубаў кантыненту «Барселона».

 

 

 

На каго звярнуць увагу: Сяргей Рутэнка. Капітан зборнай Беларусі і ў «Барсе» не на апошніх ролях. Прыезд Рутэнкі ў Менск, як і прыезд каталонскага клуба (усё роўна якога — футбольнага, гандбольнага ці якога іншага), — заўжды падзея. Такое нельга прапусціць.

 

Аўтар: Алесь Папоў, 34mag.net

Арыгінал тэкста

       

Автор

Комментарии

  • По дате
  • Лучшие
  • Актуальные
  • Друзья