Гонкі, каб іх памятаць. Каманда Emil Frey Racing выдатна правяла этап серыі GT World Challenge Europe у Зандварце
Перамога рознымі экіпажамі ў абедзвюх гонках – ці можна марыць аб большым? Хіба толькі аб перамозе па выніках сезону, але ў Emil Frey Racing і над гэтым папрацуюць.
Перамога рознымі экіпажамі ў абедзвюх гонках – ці можна марыць аб большым? Хіба толькі аб перамозе па выніках сезону, але ў Emil Frey Racing і над гэтым папрацуюць.
Англійскім выразам «race to forget» апісваюцца зусім няўдачныя гонкі, дзе ўсё ідзе крыва і коса ад пачатку да канца і пра якія хочацца хутчэй забыцца (выраз так і перакладаецца – гонка, каб яе забыць). Не ведаю, ці ёсць нейкі выраз-антонім, напрыклад, race to remember (гонка, каб памятаць). Калі не, то каманда Emil Frey Racing, якая выступае ў серыі GT World Challenge Europe, пасля этапу ў Зандварце напэўна сама ўвядзе яго ў зварот.
У Нідэрландах серыя GT World Challenge Europe праводзіла ўік-энд у фармаце спрынту з дзвюма кароткімі гадзіннымі гонкамі. Ён быў другім такім пасля французскага Маньі-Кура і чацвёртым увогуле, калі лічыць разам з этапамі кубку Endurance у Монцы і Ле Кастэле. І прынёс калектыву Emil Frey Racing амаль столькі ж ачкоў колькі ўсе тыя папярэднія.
Першымі аб намерах сваёй каманды ў суботу заявіў чатырнаццаты экіпаж – Рыкарда Фелер і Алекс Фантана. Спачатку яны заваявалі поўл (высілкамі Фелера), а затым ад старту да фінішу кантралявалі гонку на сваім Lamborghini Huracan GT3 Evo. Так што барацьба ішла за ніжнія ступені подыуму.
Другую пазіцыю доўгі час займаў сто сёмы экіпаж каманды CMR – Уліс дэ По і П’ер-Аляксандр Жан на Bentley Continental GT3, якія другімі і стартавалі. Аднак за сем хвілін да сканчэння часу Жана, які на той момант быў за стырном, абагнаў Рафаэле Марчэла з каманды Akka ASP, у якой ён пад восемдзесят восьмым нумарам выступае на Mercedes-AMG GT3 разам з расіянінам Цімурам Багуслаўскім.
Марчэлу, дарэчы, было каму падганяць – у яго ззаду быў экіпаж яшчэ адной моцнай каманды Team WRT на хуткім Audi R8 LMS GT3. Брытанец Фрэнк Бёрд і японец Рыючыра Таміта, якія выступаюць пад нумарам 31, таксама былі хуткімі цягам усёй гонкі, і пасля піт-стопу Таміта пачаў даганяць Марчэлу. Так што італьянцу прыйшлося спяшацца, што, зрэшты, прынесла яму з Багуслаўскім другое месца. Трэцяе занялі дэ По і Жан.
Італьянска-расійскі дуэт Akka ASP у нядзелю меў шанцы перамагчы, заваяваўшы поўл. Марчэла ўдала стартаваў, а затым на піт-стопе гэтак жа ўдала перадаў машыну Багуслаўскаму, які ў сваю чаргу спакойна кантраляваў сітуацыю, ідучы на першай пазіцыі. Толькі нечакана на іх з Рафаэле Мерсэдэсе ўзніклі праблемы з электрыкай, праз якія экіпаж сышоў з дыстанцыі.
Гэта вывела ў лідары прадстаўнікоў Emil Frey Racing, на гэты раз сто шэсцьдзесят трэці экіпаж – Норберта Зідлера і Альберта Косту. Якім перад гэтым давялося пастарацца, каб патрапіць на другую пазіцыю. Стартавалі яны з чацвёртай. Абганяць у Зандварце няма дзе, таму трэба было гуляць тактычна.
І вось як раз ранні піт-стоп, на якім Косту замяніў Зідлер, і стаў падмуркам іх перамогі. Апынуўшыся за стырном Lamborghini, дасведчаны аўстрыец выдаў некалькі хуткіх кругоў, падрэзаўшы ў выніку пяцьдзясят чацвёрты экіпаж Dinamic Motorsport.
Адрыен дэ Лінэр і Крысціан Энгельхарт, якія ў ім выступалі, да таго моманту ўжо паспелі абысці трыццаць другую машыну Team WRT (Шарля Віртса і Дрыса Вантора), якая пазней апынулася і ззаду Косты і Зідлера. На подыум яны па-ранейшаму прэтэндавалі, але сышлі з дыстанцыі ў другой палове гонкі ў выніку праблем з рулявым кіраваннем іх Porsche 911 GT3-R.
Ну а Віртс і Вантор магчымай перамогі пазбавілі сябе самі. Саступіўшы дэ Лінеру з Энгельхартам і потым пазмагаўшыся з дэ По і Жанам (спачатку Жан абагнаў Вантора, а праз пару кругоў той вярнуў сабе пазіцыю), пасля акна піт-стопаў яны наблізіліся да сто шэсцьдзесят трэцяга экіпажа Emil Frey Racing, што лідзіраваў.
Да яго дзякуючы серыі хуткіх кругоў у выкананні Віртса, заставалася ўсяго аднак секунда. Але ці то сам Шарль, ці то Дрыс перавысіў хуткасць на піт-лэйне, за што атрымаў штрафны праезд па яму, адкаціўшыся на трэцюю пазіцыю, на якой экіпаж Team WRT і фінішаваў.
Зідлер і Коста ў выніку перамаглі, а іх калегі па камандзе, якія перамаглі днём раней, на гэты раз забяспечылі камандзе дубль. Пры гэтым пачыналася нядзельная гонка для Фелера і Фантаны складана – кваліфікаваліся перад ёй яны толькі шаснаццатымі. Аднак прарыў у выкананні спачатку Алекса, а затым Рыкарда і няўдачы супернікаў вывелі іх на другое месца.
У Зандварце ў колеры Emil Frey Racing у нядзелю мог бы быць расфарбаваны і ўвесь подыум, калі б Віртса і Вантора паспелі дагнаць Конста Лапалайнен і Джэк Эйткен, якія выступаюць пад нумарам 114. Аднак да экіпажу Team WRT ім не хапіла крыху болей за чатыры з паловай секунды. Тым не менш фініш на чацвёртым месцы пры старце з сёмага – выдатны вынік для дэбютантаў.
Пасля этапу ў Зандварце калектыў Emil Frey Racing застаўся трэцім у камандным заліку серыі GT World Challenge Europe. Але, набраўшы там разам 33 ачкі маючы цяпер агулам 70, ён усяго паўтары саступае канкурэнтам Akka ASP, якія пакуль што застаюцца на другой пазіцыі. Лідзірюць ж па-ранейшаму Team WRT, у якіх 86 ачкоў.
У заліку гоншчыкаў лідары таксама старыя – Вантор і Віртс, у якіх цяпер 65 ачкоў. Аднак Фелер з Фантанай ужо блізка. Цікава пры гэтым, што яны не разам займаюць другую пазіцыю. Паколькі ў Маньі-Куры яны выступалі ў розных экіпажах, то Рыкарда мае 56,5 ачка і займае другую пазіцыю, а Алекс, саступаючы калегу ўсяго палову бала, замыкае першую тройку асабістага заліку.
Рыхтуючыся да сутачнай гонкі ў бельгійскім Спа ў канцы ліпеня-пачатку жніўня (афіцыйная тэставая сесія на легендарным аўтадроме адбылася акурат на гэтым тыдні), удзельнікі серыі GT World Challenge Europe правядуць яшчэ адзін спрынтэрскі этап. Ён пройдзе ў італьянскім Мізана ў наступны ўік-энд 2-4 ліпеня.
