Гоначная псіхапатыя
Блог

З гразі ў князі. Пасля двух этапаў у Нью-Йорку Сэм Бёрд узначаліў чэмпіянат Формулы Е

Фота: fiaformulae.com

Гэты сезон электрычнай Формулы складаецца для Бёрда няпроста. Аднак брытанец яшчэ можа стаць яе новым чэмпіёнам, і на этапах у ЗША ён шмат для гэтага зрабіў.

Я шмат і па справе крытыкую Формулу Е. Судзейства тут сапраўды выклікае шмат пытанняў, і не ў мяне аднаго, а эканомная язда – не тое, што найперш хочацца бачыць у аўтаспартыўным чэмпіянаце свету. Але электрычным гонкам можна шмат чаго дараваць за іх непрадказальнасць. І гаворка ў дадзеным выпадку ідзе не пра асобныя гонкі, а пра чэмпіянат у цэлым.

Здавалася б, Сэм Бёрд у гэтым годзе не мае шанцаў паспаборнічаць за чэмпіёнства. Брытанскі гоншчык каманды Jaguar Racing да Электрычнага Прызу Нью-Йорка атрымаў толькі адну перамогу ў другой гонцы ў Саудаўскай Аравіі, а ў першай сышоў з дыстанцыі праз аварыю. Бёрд таксама не набраў ачкоў у другой гонцы ў Рыме і абедзвюх у Валенсіі і ў Пуэбле.

Запісаць ў актыў апроч другой аравійскай гонкі Сэм мог хіба што першую з рымскіх, у якой ён заняў другое месца. Ну і некалькі ачкоў яму ўдалася атрымаць за сёмае месца ў Манака. Але ўсё роўна перад візітам у Нью-Йорк Бёрд у чэмпіянаце займаў з 49 ачкамі толькі дванаццатую пазіцыю. Чэмпіянат прайграны?

Як бы не так! На шчасце Сэму, далёка не на кожным этапе шанцуе не толькі яму, але і яго супернікам. А ўлічваючы шчыльную барацьбу, нават адзін лакальны поспех мог і яго вярнуць у лік фаварытаў чэмпіянату. Вось нью-йоркскі і вярнуў.

Пры гэтым пачынаўся мінулы ўік-энд для брытанца не надта каб проста. Сур’ёзная аварыя ў суботняй трэніроўцы, у якой сам гоншчык, на шчасце, не пацярпеў, але якая паставіла пад пытанне яго ўдзел у кваліфікацыі.

Зноў жа на шчасце, ягуараўскія механікі справіліся са складанай задачай, скончыўшы працу над пашкоджаным балідам і перадаўшы яго Сэму за секунды да пачатку кваліфікацыі. Якая, зрэшты, усё роўна была праваленая – Бёрд паказаў толькі дваццаты вынік. Зразумела, і першая гонка выдалася для яго складанай. Аднак Сэм здолеў фінішаваць дзявятым, ды яшчэ і лепшы круг усталяваў, атрымаўшы не два ачкі, а тры.

Асноўныя ж падзеі суботняга заезду разварочваліся ў галаве пелатону. З поўла стартаваў новазеландскі пілот Envision Virgin Racing Нік Кэсідзі. Стартаваў, дарэчы, ўдала, захаваўшы лідарства. Яго брытанскі супернік з Mahindra Racing Алекс Лін, які пачынаў гонку з трэцяй пазіцыі, паспрабаваў быў сам захапіць першую ў першым жа павароце, але памыліўся на тармажэнні і прапусціў наперад некалькіх супернікаў.

Пасля гэтага доўгі час права падняцца на вяршыню подыуму разам з Кэсідзі аспрэчваў Жан-Эрык Вернь, які таксама стартаваў з першага шэрагу. Нік доўгі час стрымліваў француза з DS Techeetah ззаду, але за сем хвілін да сканчэння часу памыліўся ў шпільцы дзясятага павароту, і прапусціў не толькі Верня, але і нямецкага гоншчыка BMW i Andretti Motorsport Максіміліана Гюнтэра.

Апошні, скарыстаўшыся барацьбой Верня і Кэсідзі, абышоў іх абодвух, узначаліў пелатон, а затым і перамогу атрымаў. Вернь заняў другое месца, а Кэсідзі не здолеў утрымацца і на трэцім, пазней прапусціўшы яшчэ і былога чэмпіёна Формулы Е Лукаса ді Грасі з Audi Sport ABT Schaeffler, які фінішаваў трэцім. Сам Кэсідзі скончыў першую гонку на чацвёртай пазіцыі.

Ну а ў нядзелю на трасе, пракладзенай вакол Бруклінскага круізнага тэрміналу, непадзельна ўладарыў Бёрд. Ён і кваліфікацыю выйграў, і ў гонцы лідзіраваў ад старту да фінішу. Фартуна была ўжо гатовая ўсміхнуцца і яго новазеландскаму напарніку па Ягуару Мітчэлу Эвансу, які стартаваў другім і мусіў быў прынесці камандзе дубль, але ён на апошніх кругах пашкодзіў заднюю падвеску свайго баліда, фінішаваўшы ў выніку толькі трынаццатым.

Замест яго другім фінішаваў Кэсідзі, які стартаваў трэцім і практычна ўсю гонку правёў за спінай свайго суайчынніка. Трэцяе месца заняў дзейсны чэмпіён Формулы Е Антоніу Фелікс да Кошта. Пілот DS Techeetah па ходу гонкі апярэдзіў таксама канкурэнта з TAG Heuer Porsche Formula E Team Паскаля Верляйна, які прыйшоў да фінішу чацвёртым.

Ну а Бёдр дзякуючы сваёй нядзельнай перамозе ў асабістым заліку чэмпіянату ўзляцеў адразу на першую пазіцыю. Брытанец мае 81 ачко, на пяць апярэджваючы да Кошту, які ў сваю чаргу падняўся на другі радок, і гоншчыка Envision Virgin Racing Робіна Фрайнса, які цяпер замыкае першую тройку. У Нью-Йорку нідэрландзец фінішаваў пятым у суботу і восьмым у нядзелю.

У камандным заліку ў першай тройцы горача. Лідзіруе тут цяпер, маючы 146 ачкоў, Envision Virgin Racing, аднак DS Techeetah, займаючы другую пазіцыю, адстае ўсяго на два балы, а Jaguar, які вярнуўся ў першую тройку і цяпер яе замыкае – на пяць.

Да канца бягучага сезону Формулы Е застаецца ўсяго чатыры гонкі. Па дзве прымуць Лондан і Берлін, і брытанская сталіца зробіць гэта першай 24 і 25 ліпеня. А перад этапамі ў Нью-Йорку была апублікаваная і папярэдняя версія календара электрычнай Формулы і на наступны год.

Сезон зноў цалкам змесціцца ў адным каляндарным годзе. Пачнецца ў Саудаўскай Аравіі ў канцы студзеня, а скончыцца ў сярэдзіне жніўня на новым для Формулы Е месцы – у сталіцы Паўночнай Карэі Сеуле. Чэмпіянат захаваў мексіканскі этап, які стане трэцім, адбудзецца ў лютым і папярэдне вернецца на Аўтадром імя братоў Радрыгес у Мехіка, на тэрыторыі якога зараз месціцца часовы шпіталь для хворых на каронавірус. Траса ў Пуэбле, дарэчы, удзельнікам чэмпіянату не спадабалася.

Таксама Формула Е збіраецца вярнуцца ў Кітай, дзе этап запланаваны на сакавік. А яшчэ двума сапраўды новымі месцамі акрамя Сеулу стануць Кейптаўн і Джакарта. У сталіцы Паўночнаафрыканскай Рэспублікі этап запланаваны на люты, як і мексіканскі, а ў сталіцы Энданэзіі – на пачатак чэрвеня. Адмен, спадзяемся, не будзе.

Комментарии

Возможно, ваш комментарий – оскорбительный. Будьте вежливы и соблюдайте правила
  • По дате
  • Лучшие
  • Актуальные