Гоначная псіхапатыя
Блог

Падзялілі па-брацку. На другім этапе сусветнага ралі-кросу ў Швецыі перамог старэйшы з братоў Хансэнаў Цімі

Фота: fiaworldrallycross.com

Хатні для Цімі і Кэвіна Хансэнаў этап у шведскім Хольесе стаў паспяховым для абодвух. А вось іх суайчыннік і дзейсны чэмпіён Йохан Крыстоферсан пацярпеў на ім моцную няўдачу.

Пасля кваліфікацыйных заездаў у суботу будучы пераможца шведскага этапу чэмпіянату свету па ралі-кросе адзначаў, што раней траса Вёрмланд не надта пасавала Peugeot 208 іх каманды. І, ведаючы пра гэта, падчас перадсезоннай падрыхтоўкі Цімі і Кэвін асаблівую ўвагу надалі трасам такога тыпу. Што, здаецца, прынесла пэўны плён, і ў мінулы уік-энд чэмпіён 2019 году быў канкурэнтаздольным ад пачатку.

Нават маленькая непрыемнасць падчас другой кваліфікацыі – сутыкненне на старце ў першым павароце з Нікласам Гронхольмам і Петэрам Хэндстромам – не перашкодзіла Цімі перамагчы ў тым заездзе. І хай дзве фінальныя часткі кваліфікацыі ўжо ў нядзелю склаліся для яго не ідэальна (у абедзвюх Хансэн заняў другое месца), свой паўфінал – першы – ён усё роўна пачынаў з першага шэрагу і без праблем у ім перамог.

Кэвін жа, які перамог на першым этапе новага сезону WRX у Барселоне, у кваліфікацыях на сваёй радзіме канкурэнтам саступіў, і ў другім паўфінале стартаваў з другога шэрагу, тады як Крыстоферсан размясціўся на першым. Стартаваць Йохан умее, Audi S1 яго новай каманды KYB EKS JC – аўтамабіль хуткі. Але ад непрыемнасцей кшталту праколаў не застрахаваныя нават чэмпіёны.

А на трэцім кругу другога паўфінальнага заезду трохразовы чэмпіён, які на той момант упэўнена лідзіраваў, злавіў ажно двайны пракол і сышоў з дыстанцыі, праляцеўшы міма фіналу. Кэвін Хансан жа яшчэ на першым кругу зрабіў ход канём, наведаўшы джокер-пятлю, затым проста не дапускаў памылак, і пасля таго, як на джокер-пятлю з’ездзілі яго супернікі, што засталіся ў ладзе, выйшаў у лідары і перамог.

Так што ў фінале абодва Хансэны стартавалі побач з першага шэрагу. Пытанне было толькі ў тым, хто з іх захопіць лідарства на старце. Атрымалася гэта ў Цімі, яму дасталася і перамога на этапе. Кэвін заняў другое месца.

Трэцім фінішаваў нідэрландскі гоншчык каманды Unkorrupted Кэвін Абрынг. Ён на сваім Renault Mégane RS быў вельмі хуткім, аператыўна кампенсаваўшы страты пасля заезду на джокер-пятлю на першым кругу. У чэмпіянаце Абрынг пасля свайго подыуму падняўся на чацвёртую пазіцыю і нават абышоў Крыстоферсана. Ачкоў у іх, праўда, роўная колькасць – па 37, таму наўрад ці такое становішча захаваецца надоўга.

Ды і вугорац Крысціан Саба, які выступае за каманду GRX-SET World RX Team на Hyundai i20 і ў Хольесе заняў пятае месца, ці ледзь надоўга замкнуў першую тройку – Крыстоферсана і Абрынга ён апярэджвае ўсяго на тры балы. На двух першых жа пазіцыях засталіся браты Хансаны, хіба што лідарскую цяпер займае старэйшы Цімі, у якога 57 ачкоў. Малодшага Кэвіна ён апарэджвае на шэсць.

Акрамя галоўнай катэгорыі сусветнага ралі-кросу ў Швецыю таксама прыязджалі ўдзельнікі электрычнай RX2e разам з еўракубкаўскімі RX1 і RX3. Мацнейшым «электрыкам» у выніку стаў фінскі гоншчык каманды Olsbergs MSE Джэсі Каліа. Яго напарнік Фрэйзэр МакКонэл, які выступае пад шведскай ліцэнзіяй, быў мацнейшы ў кваліфікацыях, аднак на старце фіналу прапусціў Каліа наперад і заняў другое месца. Трэцім фінішаваў мясцовы гоншчык Ісак С’ёквіст.

У Euro RX1 перамог нарвежац Томас Брынтэсан, які выступае на Volkswagen Polo. Другое месца заняў француз Жан-Бапціст Дзюбург на Peugeot 208, а трэцяе яшчэ адзін нарвежац Андрэас Бакеруд, якому давялося адыгрывацца пасля няўдачы ў трэцяй кваліфікацыі – паломкі прываду яго Škoda Fabia. Яшчэ меней, зрэшты, павязло мясцоваму любімцу Антону Марклунду, які таксама прэтэндаваў на перамогу, але, зачапіўшы парэбрык у джокер-пятлі ў чацвёртай кваліфікацыі, разбіў свой Volkswagen Polo і ўвогуле выбыў з барацьбы.

Мацнейшым у Euro RX3 другі раз запар стаў расіянін Юрый Бялеўскі, які выступае пад швейцарскай ліцэнзіяй за каманду Volland Racing KFT на Audi A1. Бельгійскі дэбютант Кобэ Паўэльс зноў не пазбег праблем (у чацвёртай кваліфікацыі адмовіў матор яго Audi), аднак на гэты раз здолеў заняць другое месца. Трэцім стаў яшчэ адзін расіянін Марат Князеў, які таксама выступае на Audi A1.

Трэці этап чэмпіянату свету па ралі-кросе пройдзе 3-5 верасня ў французскім Лаэаку.

Комментарии

Возможно, ваш комментарий – оскорбительный. Будьте вежливы и соблюдайте правила
  • По дате
  • Лучшие
  • Актуальные